1 KORINTHIANYU 9
9
Apostel Nme Thyü Kezü Lo A-tho
1Tha nme-e akekhin ndi mvu ole? Ale Apostelnyu nme mvu ole? Ale ngun Npugü Jisu hyu mvu ole? Npugü nyu hagun hile atho genyu mvu ole? 2Me kechanyu den zin kipon ale apostel mvu yatse ai hagun denzin kipon we ale apostel laso! kechamvule hagun hile ale Npugü nyu apostel laso tse kethyü mohor gü genyu.
3A ketso tenge tse kehünyu jo kenini shü nrün jo le higü hile. 4Ale tyütsü zü mvu ole? 5Ako apostel kechanyu lo Npugü sikezen nyu dan lo Kefa nyugun hontse tenulo zen-e njwenlo gwa bin mvu ole? 6Nmvu ai Barnaba ayi nti ayi ben pe thathyü mvulo nrün kendinyu letse hü ole? 7Segü le a-npvü a-hon tyütsü pvüo shüpahü thyü hü nla? Segü le vain low tsüshüo a-sha tyü mvula hü nla? Segü le methu nkin-o a-nyüzü tsümvu la hü nla?
8Ale zokebin jo hidan hile temi kendo jo nme ole? Tejvü gü ai tsühontse zo mvu ole? 9Kechamvule Mosa jvünyu ai hihontse thu njü, “Nle methu zen-o shyenyu kethyü ka tha pe a-mün khenla nya.” Tsüle methu phin kerüchün genyu Sunggigü le tson zo ole? 10A-le ngun genyu zo bin mvu ole? Tsüle ngun genyu thu njü nyo, kechamvule tha hyu kelo rüchün-o low tsü zü, lo shyenyu kehünyu ai a-jün hyukelo rüchün-o shyenyu zü kethyü genyu. 11Ale hagun genyu Kapu tsi gwünshüo hagun ka nyu kazü higü hon dan gvütyü lo tsü le tha keda nme ole? 12Me kechanyu le hagun ka tsügü tsü hilo gwa yatselo awe tsonlo zü kvu mvu ole?
Tson yatse ai awe tsonlo zü ai tson hü mvu, ai Khrista jolokegwa gü tson kekhin thyüla lo kenshvu genyu ale tha lihika ai akekheni hünyo. 13Kershvuka nyu lotho thyü kehü dan, lo kershvubin ka kera thyü kehü dan le kershvuka nyu a-gin hyutyü kehü lo tha pe kerüshvu hon dan nyu a-jün hyulo kehü hagun le tsü sha mvu ole? 14Tsühontse Npugü le johokeshü le senyu le jolokegwa zo hü yole tsünyu le jolokegwa gü genyu a-gin hyu tyü zü.
15Ai awe tsühontse kethyü nme ai lotyü hü mvu, nmvue ale tsühontse kethyü nme hyulo titseo jo hidan thu shü bin mvu; kechamvule meno ale hihontseo ketekho kebin gü pe a-kenrun thyü kela nyeki ale sikela we gwa kvu. 16Kechamvule ale jolokegwa pe jünzo kethyü genyu we age teshwen nme-e ndi, kechamvule nmvulokeshvu gü le age bin kela genyu. Keshanyu laka ale jolokegwa gü pe jünzo mvu yatselo awe le thyü lo tiso!. 17Lo ale a npvü akendo thyüo lotho higü thyü hü yatselo, achün khilo ai gwa; ai a npvü akendo kemvu yatselo lotho higü nno thyülo tseo pe atenyen kela genyu le. 18Ashün nyu hyulo tila? Ale jolokegwa zope me zen kehü ka jolokegwa tha tsügü genyu ashün lotyü ai gwa, ai lotyü mvuo jolokegwa zope me zen kehü tsü le ajün.
19Tson-o ale Judanyu hyulo nrün genyu Judanyu kipon ai anyugun hontse laso. 20Lo tejvü hensin kebin nyu hyulo nrün genyu ale tejvü hensin bin mvu ai tejvü hensin kebin nyu hontse laso. 21Ale tejvü kendinyu hyulo nrün genyu tejvü kendinyu hontse laso; tson ai Sunggigü kipon tejvü kendinyu hontse mvule Khrista hensin nyu a-jvü gü zen hünyo. 22A-kerüchün kvu kemvu nyu dan hyulo nrün genyu ale a-kerüchün kvu kemvunyu dan hontse laso. Lihi thyü ai ale temi peha kenilo nrün genyu temi aphu phin rüchün-o ajvü arüla thyü pe shaseni thyü laso.
23Lo tsügü tsü nyu ako jochü hyulo nrün genyu jolokegwa tsügü genyu ale tha tsü aphu thyü hünyo. 24Tin kehü kethyü ka aphu kengüo tin kegwa kenyhen bin ai temi nme nti kegwachün hyulo kehü hagun le shamvu ole? Tsügenyu hagun tsü hyulo nrün genyu tsühotse tin binlo. 25Lo me zen-o kecho kegwa kenyhen nrün nyu le tha aphu ka a-npvü a-kekheni lo ndo nron bin hünyo, anyugun le tsühontseo shvula lo kegwa kvukelo perün hyulo nrün genyu tsühontse hü nyo. 26Lo awe shamvu tse tin bin mvu, ale tsangkenbu gü zen-e kevü bin mvu. 27Ale amin hino akendo nyu binlo nrün genyu ale amin vü kethyü hontse bin hünyo, ale kechanyu ka jünzo tseo a-no akhela lo kenshvu genyu.
Currently Selected:
1 KORINTHIANYU 9: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
