1 KORINTHIANYU 8
8
Ketyüketsü Pe Teromen Kezü Kerüshvu Rüla
1Lo ketyüketsü pe teromen kezü rüshvu kela rüla we, “Ngun aphu sha,” tsekethyü hagun le zohü nyo. Thakesha le ketekho la hünyo, ai keso le tsüthyü nsoshü hünyo. 2Temi ligühigü ai a-le tha peha shabin letse yatselo a-le sha kezügü ai shalo mvu zun. 3Ai temi ligühigüe Sunggigü sohü yatselo, a-no a-shalo hünyo.
4Lo teromen rüshvu kela hon ketyü rüla we, kazü hinyu teromen tsüle lihi kemvu tsekethyü nle shabin nyo, lo Sunggigü tsüle nme nti. 5Kechamvule teronyu ai kechon, lo npu ai kechon letse kethyü hontse tsangge ai lo kazü nyu ai teronyu letse kethyü le bin yatse ai; 6ngun genyu we tha aphu a-genyu chwiryü lo a-genyu ngun le yhun kebin Pvü gü Sunggigü le nme nti, lo tha aphu a-genyu yhun kelo, lo n ai a-genyu yhun kelogü le Npugü Jisu Khrista nti.
7Tson ai temi aphu hi sha bin mvu; lo peha le gunryüo ntsoka keti hi ai teromen kezü rüla rüchün kenye gunryü kela genyu tha khipe teromen kezü rüshvu kela dan tyü kethyü ka tsügü rüla rüchün bin hünyo; lo anyugun nyun kvu kemvu genyu anyugun nyun thyü nrhula hünyo. 8Ai nketyüketsü le nzen-o Sunggigü kho nni gunryü loho; nle tsü tyümvu ai shvu kecha thyü loho; nmvue nle tsü tyü ai gwakenye kvue loho.
9Ai hagun npvü hagun kendo thyülo kegwa tsügü tsü pe temi a-kerüchün kvu kemvunyu tson kekhin thyüla lo kenshvu gü tsü rüchün tonlo. 10Lo nle thakeshanyu nme, keshanyu laka teromen kezü kerüshvu ka nyu ho bin-o temi nme le nhyu shülo, temi tsügü tsüle a-kerüchün nkomvu yatselo, a-le teromen kezü rüshvu kela hon dan tyütsü titse kethyü a-nyu pechela mvuti ole? 11Lo tsühontseo n thakesha tsügü genyu a-kerüchün nko kemvu tsügü thyü nshvu laso, lo temi tsügü tsüle Khrista le a-sun thyüo si kenjü nsikezen gü. 12Lo tsühontseo hagun le hagun tsagü sikezen nyu ge kemu thyüo anyugun nyun nko kemvu thyü nshvu hü yatselo, hagun le Khrista ge kemu thyü bin nyo. 13Tsügenyu ketyüketsü genyu a-sikezen nyu güno chela hü yatselo, asikezen gü no chela lo kenshvu genyu ale thame ka ai thyü tyülo hoso.
Currently Selected:
1 KORINTHIANYU 8: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
