1 KORINTHIANYU 10
10
Teromen Kezü Kerüshvu Genyu Petsülo
1Lo apvünyu ju, nduka nbon nyu dan aphu nmha hensin züda pvüthü chwi kethyü ale hagun no shanyü. 2Lo anyugun aphu Mosa denzin nmha gü lo züda gü nyu baptaiz thyü külo. 3Lo tsüdan aphu kapu chvü nme tyü kü. 4Lo anyugun aphu kapu zü nme tsü kü. Kechamvule anyugun sithen kehü kapu Tsonye gü ge chwikeryü zü tsükü kethyü genyu, lo Tsonye tsügü tsüle Khrista. 5Tson ai Sunggigü le temi tsüdan kechon ge a-kenyü mvula, tsügenyu tehen nyu anyugun no sila.
6Tsüdan le tha tepen rüsi kethyü hontse nno tha gwakemvu tepen rüsi mvulo nrün genyu, nno petsülo lotse kethyü tsinhi nme thyü shü. 7Nmvue tsüdan peha hontse teromen kezü rüshvu kehünyue thyü tinla nya; tsüdan rüla thu pe bin kenjü le hihontse: “Temi dan le bin-o tyütsülo njüo sogü nashü tinla.” 8Nmvue tsüdan peha le keyülao khenyüme jon nyü temi yie nki kenshen le sikela hontse, ngun ko tsüdan hontse keyüla mvulo tinu. 9Nmvue tsüdan peha le Npugü semen-o peri no anyugun ndushvu kela hontse ngun we tsüdan hontse Npugü semen mvulo tinu. 10Nmvue tsüdan peha le tha kenyon shüo temi nkela kehü gü no tsüdan nke kela hontse ngun we kebükerü nya nu.
11Temi tsüdan ge tha tsüdan thyü kela nno hyuo petsülo nrün tsinhi nme, ai a-gwünkho kekhin gü ka keyhun nyu ngun senzhü shü nrün genyu tsüdan thu njü nyo.
12Tsügenyu temi ligühigüe solo sele tse rüchün kehü gü no chela mvulo nrün genyu petsülo nye. 13Temi le shahü kemvu, kesemen le hagun semen la mvu, Sunggigü le joketsin kezo gü, lo a-le hagun no nyhen lo kegwa nye kerüche no hagun semen loho; tson kethyü gü mvule kesemen le gunkeryü ka a-le hagun no tin chwilo nrün tson ndoshü hünyo.
14Tsügenyu akesonyu dan, hagun teromen kezü kerüshvu tsü nrhilo nye. 15Ale hagun le tha keshanyu letseo hagun ka zo hünyo; hagun npvü ajo rüchün shwita. 16Nle khipen-o jochü kehü jochü honpen gü tsüle nle Khrista zi gü nyu kengü nme kethyü zansü nme mvu ole? Nle boshwen tyü kehü tensü pvü gü tsüle Khrista min gü nyu kengü nme kethyü zansü nme mvu ole? 17Kechamvule tensü nme, tsühontse n gun temi kechon le min nme, kechamvule nle kengüo tensü pvü nme nti kenjün tyü kehü genyu.
18Israel nyu rüla rüchün shü shwi; tha pe rüshvu keshü dan tyü kehünyu le kershvubin gü nyu rüshvu shü kethyü gü zen-o kengü kepvüshen bin mvu ole? 19Ale tsü pe nyundyüo zo bin nla? Ketyüketsü pe teromen kezü kerüshvu le thakon le, nmvue teromen kezü tsüle thakon le? 20Nmvu, ale zo kebin gü le Khristian kemvunyu dan le tha pe rüshvu kethyü le anyugun le tero gwakemvu rüshvu bin nyo, lo Sunggigü rüshvu bin mvu, ale hagun no tero gwakemvu dan zen keme kethyü tsü akendo mvu. 21Hagun le Npugü honpen gü lo tero gwakemvu dan honpen au nyu tsü kesinlo nrün ndi. Hagun le Npugü miz ge lo tero gwakemvu dan miz au kenyhun nren ge tha tyülo nrün ndi. 22Hagun le Npugü nyun gwünkekhen pe a-no a-yhüthyü lati ole? Ngun le a-nyeki kvu ole?
23“Ngun le tha lihi thyü titse ai nkekhin ndi,” anyugun le tson zo hü. Tsü le ketsin, ai tha aphu nkechwi le bin kü mvu. “Ngun le tha lihi thyü titse ai nkekhin ndi,” ai tha aphu nthyü nso küshü hü mvu. 24Temi nme-e a-npvü a-genyu kegwa gü fü nya ai a-kazonkazin genyu kegwa fülo nu.
25Thyü kejwen bin nyu tha lihi jwen bin yatse ai nnyun nkhi-o tha lihi ketso bin nya, ai hei tyülo chi. 26“Kechamvule kazü higü lo hinyu kebin aphu Npugü hon kethyü genyu.”
27Keshanyu laka tenyen hü kemvunyu nme le hagun no gü holo tse hagun ko-o hagun le günyü lo hagun nyun ki a-zü le a-zümvu yo tsekethyü ketso mvu tse tha khipe hagun ketsü tsü tyülo nye. 28Ai peha le hagun ka, “Higü hile teromen kezü rüshvu kela hon le,” tsonzo yatselo zo pe hagun zen keshü gü phin kerüchün genyu lo a-kerüchün genyu hagun le tha tsügü tyü nya. 29Tsüle nkerüchün kemvu ai kechanyu kerüchün.
Lo nyuthyüo kechanyu kerüchün nme genyu akekhin ndi kela hi nmulo gwa tila? tse ketso bin lo gwa. 30Lo ale Sunggigü shwen-o tyü bin yatselo, nyuthyüo meno ale shwen kebin gü nkhinlo gwa tila?
31Tsügenyu hagun tha tyütsü nmvue tha lihi thyü hü ai Sunggigü zankechwi genyu thyü külo. 32Hagun le Judanyu metse Griknyu metse nmvue Sunggigü kehun dan-e no hagun genyu phakensü thyü nya. 33Ale a npvü aphin ajün kegwa fü mvule temi kechon kenilo nrün genyu temi kechon phin kegwa füo tha lihi kethyü aphu nyu temi aphu kenyü thyü titse fü hünyo.
Currently Selected:
1 KORINTHIANYU 10: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
