1 KORINTHIANYU 7
7
Sunkethyü
1Hagun le lesü thu pe aka ketso keshü gü tsü.
Pechenyu le tenunyu zen-o yhun mvu ai gwa. 2Ai keyüla kela kenshvu genyu pechenyu ligühigü ai no a-nunyu no bin külo, lo tenunyu ligühigü ai a-nyepvünyu no bin külo. 3Lo me nyepvü kethyünyu no a nunyu ge thyü kezügü thyülo, lo me nunyu ai no a-nyepvünyu ge tsühontselo. 4Menu kethyü nyu le a-le mvule a-nyepvü le a-min ge npu thyüla so, lo tsühontse me nyepvü kethyünyu ai a-le mvule a-nu le a-min ge npu thyü laso. 5Peche tenu kejorhün-o gwüngwa nme nyen lo kehithyü titse kethyü genyu kemvu we kekhela nya; ai n npvü n kekheni loho-o satan no nsemen lalo kenshvu genyu kengüni tinla mvulo shvu.
6Ai ale jo higü kezo le tsonlo ai gwa letse kethyü a-men hukum nme hontse shümvu le. 7Temi ligühigüe no a hontselo kethyü we akenyü; tson ai temi ligühigüe Sunggigü kanyu shwikenjün jochü hyu külo hünyo, tsü nme le jochü higü lo kechagü le ligü.
8Tsügenyu sunthyü kemvunyu dan lo maginyu dan we ahontse binlo yatselo gwakvu titse ale zoshü bin nyo. 9Ai anyugun kekheni loho yatselo, anyugun no sunthyülo mvulo shvu, sun loho kebin gü mvule sunthyü kela we gwakvu kethyü genyu.
10Sunthyü kelanyu dan ka we ale hukum hoshü bin nyo, ai tsüle ale mvule Npugü le, tsüle a-nu no a-nyepvü khela nya. 11Ai a-le tinla yatselo a-no kalu mvutse binlo, nmvue a-nyepvü zen-o kengü yhunnilo, lo a-nyepvü ko a-nu khela loshvu.
12Ai kecha dan ka we Npugü le kemvu ai ale zoshü bin nyo, keshanyu laka temi nme le a-nu le tenyen hü kemvunyu ai a-nyepvü zen-o yhun nyü bin yatselo a-no a-nyepvü khela nyalo. 13Lo keshanyu laka tenunyu nme le a-nyepvü le tenyen hü mvu ai a-zen-o yhun nyü bin yatselo a-no a-nyepvü khela nyalo. 14Kechamvule tenyen kemvu a-nyepvü ai a-nu genyu nshünlo la hü nyo, lo tenyen kemvu a-nu ai a-nyepvü genyu nshünlo la hü nyo tsonkemvu we hai nyenyu le Sunggigü shakemvu nyenyu thyü lati; ai ntsoka we tsüdan le Sunggigü hon thyü laso. 15Ai tenyen kemvugü le tinla nyü yatselo a-no tinla lo. Tha tsühontse kethyü nyu nsikezen gü nmvue n lügi phin njü mvu. Sunggigü le nno kengü gwa hülo tse nkolo kela genyu. 16Lo tenugi, nle nnyepvü kenilo titse kethyü dihontse shalo mon? Nmvue me nyepvü nle nnunyu kenilo titse kethyü dihontse shalo mon?
Sunggigü Le Nko Kelo Hontse Yhunlo
17Temi ligühigü ai no Npugü le kenjün pe a-ketsü hontse lo Sunggigü le a-ko kelo hontse yhunlo nye. Lo ale kehun aphu no hihontse kethyü zenlo lotse kethyü zoshü hünyo. 18Temi peha le a-girü pvü kehü kolo le? Tsünyu no a-girü kemvunyu thyüni nya. Temi peha le a-girü kemvunyu kolo le? Tsünyu no a-girü titse fü nya. 19Kechamvule gikerü metse tha kon mvu, nmvu-e girü kemvu ai thakon mvu; ai Sunggigü johokeshü thyü lo zen kehünyu le a-chonpu gü. 20Temi ligühigü ai a-ko kelo ka nyu thyü hüo kolo yo a-no tsü thyü binlo. 21Nle me dothyü bin kehü ka nkolo le? Tha nme mvu. Ai nle n kecha thyü chwilo gwa yatselo tsonlo titse kethyü rüchün lo. 22Kechamvule temi ligühigüe me dothyü hüo kope Npugü denzin shü kelonyu le Npugü le a-hoshü kelanyu so; tsühontse temi ligühigü ai me dothyü bin kemvu ko kelo gü ai a-le Khrista do so. 23Thami pe hagun hilo laso; hagun temi do thyüni tinla nya. 24Tsügenyu apvünyu ju, hagun ligühigü ai nyuthyü hüo hagun kolo yo le, a-no Sunggigü zen-o tsü thyü binlo.
Sunthyü Kemvunyu Lo Maginyu
25Lo sunthyü kemvunyu dan genyu we Npugü ka nyu jo hyulo mvu, ai ale Npugü shwikenjün nyu tenyenlo kekünyu nme hontse a kerüchün zoshü ti.
26Lo hijonka hagun le kenjünthyü pe tsühontse kebin genyu akerüchün tsügü tsüle ligühigü ai no tsühontse binlo yatselo gwati. 27Nle sunthyü binla sele? Kekhe kela rüchün nya. Nnunyu ndi le? Sunkethyü rüchün nya. 28Ai nle tenulo yatse ai tsügenyu we nle mu mvu, lo lünyu nme le kalu yatse ai a-le mu mvu le; tson ai sunthyü kelanyu le thyümin denzin kenjün thyü ti; lo hagun le tsü nrhilo yatselo ale akenyü ti.
29Ai apvünyu ju, ale zokebin gü le; a-gwünkho le züri laso. Tsügenyu ntsoka gerhonyu a-nunyu kebin nyu no bin kemvunyu hontselo. 30Lo chü kehünyu no chü bin hü kemvunyu hontse binlo; lo a-kenyü kehünyu no a-kenyü bin kemvunyu hontse binlo; lo tha heikelonyu no a-hon kendinyu hontse bin lo. 31Lo kazü higü kenyü sen kehünyu no tsü sen hü kemvu hontse tinla lo, kechamvule kazü higü rüla dan le ndi güzhü kelasi genyu.
32Ai ale hagun no tha rüchün pe hagun nyun kenjün thyü mvu kebin le akenyü. Temi ligühigü ai sunthyü kemvunyu le dihontselo Npugü kenyü thyülo tiyo tseo Npugü rüla rüchün bin hünyo. 33Ai sunthyü kelanyu le dihontselo a-nunyu kenyü thyülo tiyo tseo kazünyu rüla rüchün pe a-nyun le keho thyü tinla hünyo. 34Lo tenunyu sunthyü kemvunyu lo lünyu le dihontse a-thyümin metse lo a-kapu ai nshünlo tiyo tsekethyü Npugü rüla denzin rüchün tinla hünyo. Ai kalu kelagi we dihontse lo a-nyepvü kenyü thyülo tiyo tsekethyü kazü gü kenyü rüla denzin rüchün tinla hünyo.
35Ale jo higü kezo le hagun kechwi le kebin genyu kezo, ale hagun khinla titse kethyü genyu mvu, ai hagun no a-kezügü thyü, lo hagun nyun aphu sen-o Npugü rüshvulo nrün genyu le.
36Sunthyü titse kenthon njüo sunthyümvu tse bin ti tse rhilo kelanyu le keshanyu laka a-kekhenilo ho-o sunthyü mvulo shvu yatselo sunthyülo ai kemu ndi. 37Ai ligühigüe a-nyun ki sunthyü mvue gwa tse rüchün-o a-kekheni binlo titse rhilo la yatselo, a-le sunthyü mvutse rhiton lo kela hontse ketso kenjü gü zen yhun mvu ai gwa. 38Tsügenyu a-le ketso kenjügi zen bin kethyü güe gwa lo sunthyü mvu kelagü we gwa kvu.
39Menunyu le a-nyepvü le rhün kebin then tejvü no a-phin bin-o titi, ai a-nyepvü le sila yatselo a-npvü a-kendo ka kalu titse ai a-kekhin ndi; ai Npugü kendo nyu mvulo shvu. 40Ai a kerüchün we a-le kalu mvu tse binlo yatselo asherhün kvuti, lo akerüchün le ale Sunggigü Kapugü hyulo laso.
Currently Selected:
1 KORINTHIANYU 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
