1 KORINTHIANYU 4
4
Khrista Apostel dan
1Tsügenyu temi ligühigü ai ale Khrista gonyu lo Sunggigü jo kentsun dan ntsen kehünyu letselo nye. 2Tsünyeki ai me hon kentsen nyu le meno a-tenyenlo kekünyu mvulo shvu. 3Ai awe hagun no nmvue jo kekera bin nyu a ketso titse kethyü tsüle tha lihi kemvu le, ale a npvüe a ketso hü mvu. 4Kechamvule ale a npvüe akemu nme-e sha kemvu genyu; ai tson le tseo ale ntsenlo la mvu, ai aketso kehü gü tsüle Npugü le. 5Tsügenyu Npugü le ryü kemvuka, a-gwünkho gü ti kemvu ka thame ketso nya. A-le kezün nyu tha kebu pe bin kenjü tsüe kehenshwi pe keben nyu shüti, lo me nyun kendo dan ai shalo ti, tsüka temi ligühigü ai Sunggigü ka nyu teshwen hyu loti.
6Lo apvünyu ju, ale hagun phin kegwa rüchün-o Apola ai ge tha zo kendyü shü le, tsüle hagun no ayi ge thashalo-o ketsinlesü jo dan gwünzü mvulo nrün genyu, tson-o hagun ligühigü ai no nme ge ai ketekho-o kechagü nkhinla mvu nrün genyu le. 7Kechamvule segü le nthyü pe me nyeki kecha thyüshü la? Nle meka nyu hyulo kemvu nyule bin nla? Tsonyatselo, nyu thyü meka kenrun nyuhyulo kemvu hontse kemakin hü nla?
8Ntsoka we hagun le hagun gin nyülo laso? Hagun le nnyalo laso? Agun sin mvu tse raja thyü bin laso? Hagun no raja thyü bin kela we ako a kenyü le, tson-o agun kono hagun zen-o raja thyülo nrün genyu. 9Akerüchün le Sunggigü le agun postelnyu dan thyü pe me nyeki keshen tsin dan me, mele nmuo boshvu lati tse kebin nyu hontsela sele tse bin nyo; kechamvule agun le kazü gü mhundyü nyue meno kenri-i thyü laso. 10Khrista genyu ale kenunyu thyü laso, ai hagun we Khrista nyu thakeshanyu thyülo laso. A we kvumvu, ai hagun we kvu, hagun we teshwe pvü loso, ai awe tetsin pvü laso. 11Ntsoka keti ai awe nnyon lo teri bin hünyo, phi nya-e ndi, lo me benshvu ai pvü, lo abin zhü ai ndi. 12Lo ale a npvü aben pe tha thyüo kenjün thyü bin nyo; mele arho ai ale jochü pe me tsühü nyo, mele a nshwen ai ale nyhenhi bin hünyo. 13Mele azo nshvu ai ale me ge ajo gwa hünyo; a lope kazü hinyu kerhunyu hontse laso, ntsoka hi keti a lope kerhu ketsin nyu thyü laso.
14Ale hagun no kejolo titse kethyü genyu mvu ai hagun lope anyenyu a kesonyu hontseo hagun senzhü shü kenyü genyu ale jo hidan hi thu keshü le. 15Lo hagun le Khrista kipon hagun tsonketsinnyu yietseryü le bin ai hagun pvü hontse kethyü we chon mvu; kechamvule Khrista Jisu kipon Jolokegwa gü genyu hagun nnyu pe anyenyu thyü kelo genyu. 16Tsügenyu hagun cheno ai tsin pe hi keshü then külo nye. 17Hagun no tsühontselo nrün genyu ale Timothi nipe hagun ki shüle. A-le Npugü kipon ale a-tenyenlo kekü anyu a kesogü le, Kehun lika hika-e ale sen-o me senthyü kehü Khrista kipon senkethyü jvü tsüdan a-genyu hagun no rüchün nilo ti.
18Lo hagun peha le ano hagun ki niryü loho nrün hontse rüchün-o ketekho bin ti. 19Ai Npugü kendolo ale nshwen hagun ki ryü ti; lo tsüka ale temi ketekho kehü dan zo mvule anyugun kekvu shalo ti. 20Kechamvule Sunggigü keda le jo nyu mvule kekvu nyu kebin genyu. 21Ano digü khisen-o hagun ka ryü tila? Thün sen ryü tile? Le kebwen Kapu gü nyu kesogü sen ryü tila?
Currently Selected:
1 KORINTHIANYU 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
