1 KORINTHIANYU 3
3
Sunggigü Go
1Lo a pvünyu ju, ale Kapu temi kenthon hontse hagun nthon loshvu laso; ai thyümin temi dan ka kezo hontse lo Khrista nyu nyuhonyu dan ka kezo hontse zoshü. 2Ale nyüzü pe hagun gin thyüshü, lo tha kenko pe hagun gin thyü mvu, kechamvule hagun le tsonlo kü kemvu zun genyu, lo ntsoka ai hagun le tsü tyülo kükemvu zun hile. 3Kechamvule hagun le ntsokhin ai thyümin temi thyü bin nyo. Hagun dan nyu khinyunyu shwi pe a-yhüthyü lo kega kebin le, hagun le thyümin nyu bin lo thyümin nyu kebin kechanyu dan zen-o nyun me thyü bin mvu ole? 4Hagun peha le, “Ale Paul kipon,” tse lo peha le, “Ale Apola kipon le,” tse kezo tsüle hagun le thyümin nyu kebin temi mvu ole?
5Kha, tsonlo Apola le segü la? Lo Paul le segü la? Au le melo kethyünyu, au ge hagun no tenyenlo, Npugü le temi ligühigü ai no thyülo tse pe tenyen keshü hontse. 6Ale yishü, Apola le zü pe ntsenshü; ai Sunggigü genyu yhun soryü kelo gwünzin. 7Tsügenyu yi keshü güe lo zü pe ntsen keshü güe thakon mvu, ai no yhun soryü kelo gü tsü le Sunggigü le khishü. 8Lo a-bin sen keshü gü lo zü pe ntsen keshü gü au le ketunkü, lo au nme me tse au tha thyü keshü hontse a-chün hyulo ti. 9Kechamvule agun le kengüo Sunggigü lokethyü nyu, lo hagun le Sunggigü low.
Lo hagun le Sunggigü ka. 10Sunggigü ki shwikenjün gü khipe a tsüshü kela hontse, ka thyü keshanyu hontse ale a-bin jwen shü, lo kechanyu le tsüge ka thyü hünyo, ai ligühigüe tsüge dihontse ka thyü bin yo a-no petsülo nye. 11Kechamvule a-bin jwen pe bin kela gü tsü kemvu we temi nme a-bin jwen kecha thyünilo nrün ndi, jwen pe bin kela tsügü tsüle Jisu Khrista. 12Temi ligühigüe binjwen kenjü tsügü ge suna, rakagi, tso a-minketsen, tesen, hi lo npen ai pe a-ka thyü hü. 13Temi ligühigü tho-e gwa le shvuyo hyulo ti; Khrista gü le khishwishü kethyü jon gü nyü. Tsünyü mah nyu tsinshü nrün genyu; lo mah tsügü tsüle temi ligühigü tho le dihontse thyü njü yo tsekethyü kegwa keshvu tsinshü ti. 14Binjwen tsügü ge thyü kenjü temi ligühigü tho ai binlo yatselo a-le a-chün hyu loti. 15Lo temi ligühigü tho-e rola yatselo a-le nke sati; ai a-le kenikelo hyu loti, tson ai mah nyu kegun hontseo kenikelo hyulo ti.
16Hagun le Sunggigü kershvuka, lo Sunggigü Kapu le hagun ge bin hü nle tse kethyü hagun le tsü shamvu ole? 17Temi ligühigüe Sunggigü kershvuka tsügü bo nshvula hü yatselo Sunggigü ko a-bo nshvula ti. Kechamvule Sunggigü kershvuka tsügü le nshün kethyü genyu, lo hagun le kershvuka tsügü tsüle.
18Temi nme-e no a-npvü a-sala nya, hagun dan nyu temi ligühigü ai kazü higü nyu a-npvü a-le thasha letse rüchün hü yatselo, tsügü no thakeshanyu thyülo nrün genyu a-no kenunyu thyülo. 19Kechamvule kazü hinyu thakesha le Sunggigü mhundyü nyu kenu genyu. Tsü rüla hihontse thu njü, “Ale thakeshanyu dan le kelekelu keso ka anyugun tenlo hünyo”; 20lo zosin kenjü le, “Npugü le thakeshanyu nyun kendo dan tsüle kenrun kenryü letse kethyü tsü sha hü.” 21Tsügenyu següe temi genyu ketekho nya che, kechamvule aphu hagun hon genyu: 22Paul-e, Apola-e, Kefa-e, lo kazü higüe, kerhün-e, kesi-e, ntsoka kebin dan-e, siki ryü nrün dan ai aphu hagun hon le, 23lo hagun le Khrista hon le, lo Khrista le Sunggigü hon le.
Currently Selected:
1 KORINTHIANYU 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
