1 KORINTHIANYU 5
5
Kehun Nyu Keyüla Kethyü
1Hagun dan nyu keyüla hü tsekethyü mele zo sü laso, lo keyüla tsühontse kethyü tsüle Sunggigü sha kemvunyu dan nyu ai shamvu, tsüle hagun temi nme le a-pvü nu zen bin hü nle tse zo. 2Lo hagun le hagun nyun gwamvuo hagun dan nyu thatho tsühontse thyü kelanyu khela titse kethyü gü mvule hagun le ketekho bin nyo. 3Kechamvule a thyümin le hagun zen bin mvu yatse ai a kapu gü we hagun zen bin nyo, lo thatho tsühontse thyü kelagü nmu laso. 4Npugü Jisu Khrista zan nyu hagun le gü kehun kequen keloka lo a kapu gü ko tse, Npugü Jisu Khrista kekvu sen-o, 5temi tsonkethyü nme tsü khipe satan tsüla lo, tsügü tsüle kechamvule a-thyümin nkelao Npugü Jisu Khrista jon nyü a-kapu gü kenilo nrün genyu.
6Hagun kemakin tsüle gwamvu, “Kebu keshanyu le tensüpvü aphu thyü pe no punla kehü tsü hagun le shamvu le?” 7Hagun tensüpvü kenshün thyülo nrün genyu kebu whe gü tsü khipe shwela chi, kechamvule hagun le kebu lope shü kemvu dan hontse kethyü genyu. Kechamvule Nkenchwikelo Nga ka tanyü nyugü dushvu pe nro thyü kelagü tsüle Khrista gü le. 8Tsügenyu ngun kebu whe gü, nra kepvü lo serikemvu kebu gü sen nya ai kebu no shü kemvu kenshün lo ketsin tensü gü sen-o nkenchwikelo nga gü tsü nga tinu.
9Ale himhundyü thu pe hagun ka keshü a lesü nyu hagun no keyülanyu zen kengü nyalo tseshü. 10Ai tsüle hagun no kazü higü nyu keyüla nyu nmvu ai mehon tepen kehünyu lo kerühu nyu nmvu ai thamen kezü rüshvu kehünyu zen kengü nyalo tse shü mvu, tsühontse kethyü we hagun le kazü higü nkenla mvulo shvu la nrün genyu. 11Ai ale thu keshü ajo gü le ligühigüe hagun zen-o a tsasikezen nyu thyülo kelanyu nme le keyüla, nmvue mehon tepen, nmvue teromen kezü rüshvu, jo gwakemvu zope me tsin, nmvue nzeü-ngo, nmvue rühu hü yatselo hagun no tsünyu zen-o kengü nyalo tseshü; tsonkethyü gü mvule hagun no tsünyu zen-o tyütsüe nyalo tseshü le.
12Kechamvule ale tegwenki kebin nyu we ketso pe nyu thyü mvon? Tsüle hagun ko kehun nyu kebin nyu ketso kehü gwünzin mvu ole? 13Sunggigü le a-npvü tegwenki nyu dan ketso hünyo. Tsügenyu hagun dan nyu temi seri kemvu gü hüla lo.
Currently Selected:
1 KORINTHIANYU 5: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
