1 KORINTHIANYU 2
2
Krus Ge Khrista Hü Kethyü Jolo
1Apvünyu ju, ale himhundyü hagun ki ryüo Sunggigü rüla jo kentsun zope hagun hi kethyü ka ajo zokegwa nmvue thakesha sen ryü mvu. 2Kechamvule Jisu Khrista lo a-khipe krus ge hü kela jo gü nyeki hagun dan nyu thakecha nme ai sha loho tse ale rhilo kela genyu. 3Lo ale hagun zen kehü ka kvumvu lo nshvu ho tse lo ake nsü bin hü. 4Lo ale jokezo lo jünkezo nyu temi thakesha jozo kegwa sen-o zomvu le Kapu gü lo a-kekvu gü tsin pe hagun hishü. 5Lo tsüle hagun ketenyen no temi thakesha ge mvule Sunggigü kekvugü ge binlo nrün genyu.
Sunggigü Thakesha
6Tson ai ale peshü kelanyu dan nyu we thakesha jo zo hünyo; ai thakesha jo tsügü tsüle hizonka keyhunnyu thakeshagü kemvu, nmvue hizonka kekvu sen kebin nyu hisiki kenrun thyüla nrün dan thakesha-e mvu. 7Ai ale Sunggigü thakesha kentsun gü pe zo hünyo, thakesha tsügü tsüle nno zankechwi thyü nrün genyu nchweki ndo pe binla so. 8Nzonka keyhun nyu nme ai tsügü shalo mvu laso. Anyugun le tsü sha yatselo zankechwi kethyü Npugü pe krus ge hüla mvu nrün. 9Ai ketsin lesü le hihontse thu njü,
“Nyhütyü pe hyulo mvu kela,
nmvue n nyetin pe nyülo mvu kela,
tha tsühontse kethyü dan Sunggigü
le a-so kehünyu genyu ndo pe bin laso.” 10Ai ngun we Sunggigü le Kapu gü nyu tsüdan kehen shwipe n gun hishü laso. Kechamvule Kapu gü le tha aphu kese hünyo, Sunggigü rüla kentsun dan ai. 11Kechamvule temi nyun ka kebin Kapu gü kemvu we segü le temi rüla shalo hü nla? Tsühontse Sunggigü Kapu gü le kemvu we temi nme-e Sunggigü rüla shalo hümvu. 12Lo nle Sunggigü le kenrun nyu khipe ntsü kela dan shalo nrün genyu kazü hinyu Kapu gü hyulo mvule Sunggigü ka nyu chwikeryü Kapu gü hyulo laso.
13Lo ale temi thakesha jo nyu senthyü mvule Kapu gü nyu senthyü hünyo, Kapu nyu ketsin gü kon zokekho pe Kapu le a-ge kebin nyu hi hünyo. 14Ai a-nyun nshünlo kemvu temi le Sunggigü Kapu gü le kenrun nyu khikeshü dan tsü lo hümvu, kechamvule tsüdan tsüle a-mhundyü nyu lihi kemvu, lo a-le tsüdan shalo nrün ndi, kechamvule Kapu nyu tsüdan rüchün kekholo kehü genyu. 15Kapu le a-nyun nyu kebin nyu le tha aphu rüchün kekholo hünyo, lo temi nme-e a-nmulo nrün ndi. 16ketsinlesü le hihontse zo njü,
“Segü le Npugü nyun shao
a-senthyü logwa tila?” Tson-e, n gun we Khrista nyun pvü hü laso.
Currently Selected:
1 KORINTHIANYU 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
