1 KORINTHIANYU 15
15
Khrista Le Rhünni Keso
1Lo apvünyu ju, ale nyu kon genyu jolokegwa pe hagun ka jün zo hüyo, ale hagun no tsü rüchün nishü nyü. Hagun le jo tsü zenlo, lo ntsoka ai tsünyu bin nyo. 2Jolokegwa tsügü genyu hagun kenilo laso, tsügü tsüle hagun ale zokeshü jo gü tsü tezen tsekho binlo yatselo, hagun ketenyen le a-kon kendi thyüla mvu.
3Kechamvule ako hyu kelo senkethyü jo keda tsügü ale khipe hagun tsüshü kela genyu; lo tsügü tsüle ketsinlesü le kezo hontse, Khrista le ngun kemu nyu dan genyu sila. 4Tson-o me no a-sunla; lo ketsinlesü le zope bin kenjü hontse a-le jonshen nyü rhünni sola. 5Tson-o a-le gungü Kefa yhühyu thyüshü; lo tseryü kenyhun che dan ai yhühyu thyüshü. 6Tsüsiki a-le gungü gwüngwa thyü ngun pvünyu dan mi tsipvün kela ai yhühyu thyüshü, lo tsüdan kechon ki le ntsoka ai rhün bin zun, ai peha we sila so. 7Tsüsika a-le Jakob ai yhühyu thyüshü, lo tsüsika ko apostelnyu aphu yhühyu thyüshü.
8Lo a-le gunryüo nnyu kü kemvu ka nnyu kelo hontse kethyü ahigü hi ai yhühyu thyü kekhin tsin thyüshü. 9Lo ale nduka we Sunggigü kehun gü nshwen kethyü genyu ale apostelnyu dan nyu keshen tsingü le, lo ale apostel letse kethyü ai kolo kü mvu. 10ai Sunggigü le ashwikenjün genyu ntsoka thyü tin kelagü thyülo laso. Lo a-le ashwi njün keshü tsügü le thaja thyüla mvu. Tson kethyü genyu ale tsüdan nyeki tha thyükvu lo; ai ale mvule Sunggigü ka nyu chwikeryü shwikenjün azen kehügü le a-npvü le. 11Lo a metse lo anyugun metse tsühontse agun le jünzo shü,lo hagun ai tenyenlo laso.
Kesinyu Le Rhünni Keso
12Lo Khrista le kesi nyu rhünniso laso, tsekethyü jo lope jünzo shü hü yatselo, hagun dan nyu peha le nyuthyüo kesinyu le rhünni keso ndi letse zo hü nla? 13Lo kesinyu le rhünni keso ndi yatse kethyü we Khrista le rhünniso la mvu. 14Lo Khrista le rhünniso mvu yatselo, ale jünzo kehü tsü ai a-kenrun, lo hagun ketenyen ai a-kenrun laso. 15Tsüntimvule mele ano Sunggigü jünzo kehü kenku nyu letse lati. Kechamvule kesinyu le rhünni keso ndi ketsin yatselo Sunggigü le Khrista thyü nrhünlo mvu ai ale Khrista gü thyü nrhünlo la sele tse jünzo kehü genyu. 16Kechamvule kesinyu le rhünni keso ndi yatselo Khrista ai rhünniso la mvu. 17Lo Khrista le rhünniso lomvu yatselo, hagun ketenyen ai thaja laso; lo hagun le ntsokhin ai hagun kemu nyu bin zun. 18Tson yatselo Khrista nyu bin-o sikela ju ai nke laso. 19Nle thakegwa hyulo titseo Khrista ka nrin kebin tsüle ntsoka keyhun ka hi nti yatselo, nle temi aphu nyeki n njün kehonyu thyü laso.
20Ai ketsin thyü Khrista le sikelanyu dan nyu a-sha kerigü thyüo kesinyu dan nyu rhünnilo laso. 21Kechamvule temi nme genyu kesi le gunryü kela hontse temi nme genyu kesinyu le rhünni keso ai gunryü la. 22Kechamvule Adam genyu temi aphu sila kehü hontse tsühontse Khrista genyu temi aphu thyü nrhünni-e loti. 23Ai nme me tsekethyü a-gwünkho ka kethen gunti; Khrista le a-sha kerigü, tsüsika a-le gunkeryü ka Khrista temi thyü kebin dan ti. 24Lo a-le me kekheni kehü ju, kekvu kesen ju lo kekvunyu dan bo kemhen kü kela siki a-le a-keda khipe Sunggigü ben nyu shü lati; tsükatsü a-kekhin thyü lati. 25Kechamvule a-le a-shwikerüchün ju aphu pe a-pha sin thyüla kemvuthen keda thyü bin mvulo keshvu genyu. 26Bokemhenla nrün shwikerüchün kekhin gü tsüle kesi. 27“Kechamvule Sunggigü le tha aphu khipe a-phasin shüla kethyü genyu.” Ai tha aphu khipe a-phasin shüla tse kethyü tsüle tha aphu pe a-phasin keshü gü we sinmvu tse kethyü tsentsü bin nyo.
28Lo tha aphu pe a-hensin shülo la ntsin, tsontsin Nyugü ko a-npvü tha aphu pe a-hensin shü kelagü hensin bin tin lati, lo tson-o Sunggigü npvü tha aphu nyu aphu so gon lati. 29Tson mvu yatse kethyü we, temi dan le kesi sunka baptaiz kethyü a-kon le nyu la? Kesinyu le rhünni keso ndi shü yatselo, temi tsüdan le nyuthyüo tsügenyu baptaiz thyü hü nla? 30Ngun ai nyuthyüo tegi kevü ja aphu kenshvu nyu bin hü nla? 31Ngun Npugü Jisu Khrista nyu ale hagun genyu ketekho kehü hontse ale khenyütsen si hünyo. 32Temi jvü hontse zoti yatselo, Efesa nyu tehenthyü dan zen kenren gunryü yatse ai ale nyu kechwi hyulo la? Kesinyu le rhünni keso ndi yatse kethyü we “Ngun tyü lo tsü bin nu! Nle senduki sila tiso!”
33Tha rüchün züla nya; gwakemvunyu zen kepvüshen kethyü le a-jvü kegwanyu ai thyü nshvu la hünyo. 34Ntsen nzhü nilo, lo kemu thyü sin nya; kechamvule hagun peha le Sunggigü rüla denzin thame shamvu bin hünyo; ale jo higü kezo le hagun no kejolo nrün genyu le.
Rhünni Keso Min gü
35Ai temi peha le, kesinyu le dihontse rhünlo mon? Lo anyugun min le dihontse gunryü mon? tson-o ketso logwa. 36Kenugü, nle ntsi sen tsügü gwün keshü gü ai sila kemvu we tsü chwiryü hümvu. 37Lo hisiki a-min thyü chwiryü nrün gü we nle gwün shü mvu, ai nle sen tsügü gwün keshü gü le thoshye nmvue ntsi kecha nme gwünzin. 38Ai Sunggigü le a-kendo nyu kejükelo hontse min nme khishü, lo thatsi kechacha ge a-min kechacha kethyü khi küshü.
39Kechamvule a-thyü aphu keme mvu, ai temi thyü le kecha, lo nyukhu phazi dan thyü kecha, lo tegü thyü kecha lo tsehü thyü ai kecha.
40Tsüntimvule tsangge kehü min ai bin, lo kazü nyu kehü min ai bin; ai tsangge kehü dan zekegwa kecha, lo kazü nyu kehü dan zekegwa ai kecha. 41Yhüko ai a-zekegwa kecha, lo shye ai a-zekegwa kecha; kechamvule shyenyü ai khinyu khinyu zen-o a-kezegwa kechacha kü kethyü genyu.
42Kesinyu le rhünni keso ai tsühontse ti. Gwün keshü le tenrenla lokegwa pe gwünshü, ai rhünni keso we tenrenla lo keho thyü lati. 43Zegwakemvu nyu gwünshü, ai zekegwa nyu rhünniso lati; pe gwün keshü ka a-kekvu ndi, ai rhünni keso ki we a-kekvu le bin loti. 44Ntsoka keyhun thyü min pe gwünshü, ai rhünni keso ki we Kapu min gü thyü lati. Ntsoka keyhun min ai bin, tsünhontse Kapu min ai bin ti. 45Ketsinlesü le zo, “Temi kerigü Adam no rhün kehü temi thyülo,” ai Adam kenyhun gü we kerhünronzin pe me tsü kehü Kapu gü thyü laso. 46Ai Kapu rüla dan le gunryü ri mvuo, thyümin rüla le ryü ti, tson-o tsüsiki Kapu rüla le gunryü. 47Temi kerigü we kazü higü temi, lo nnyon pe thyü, temi kenyhun gü we tsangge ryü. 48Nnyon pe kethyü temi le nnyon pe kethyü temi hontse ti, lo tsangge temi le tsangge temi hontse ti. 49Lo nle nnyon lope kethyü gü joja khipvü kela hontse, nle tsangge tsükeryü gü joja ai khipvü loti.
50Ai apvünyu ju, ale hagun ka zoshü tile, nle nthyü lo nzi khipvüo Sunggigü keda gweno nrün ndi, nmvue nmhenla lo kegwa gü le nmhen lalo keho gü gwenlo nrün ndi.
51Hire, ale jo kentsun nme pe hagun ka zoshü ti, ngun aphu siküla loho, ai ngun aphu kecha thyü küla ti. 52Shu kekhun kekhin gü ka keshanyu jaka yhütyü kemi gwa ka tson lati. Kechamvule shu tsügü khun shüti, tsontsin kesinyu dan le tenrenla mvu tse rhünsolo ti, lo n gun ai kecha thyü lati. 53Kechamvule tenrenla lo kegwa higü hile tenrenla lo kehogü khibenlo mvulo shvu, lo si lalo kegwa higü hile sila lo kehogü khibenlo mvulo keshvu genyu. 54Ai tenrenla lo kehogü khibenlo ntsin lo sila lo kegwagü le sila lo kehogü khiben lo ntsin, “Kvukelo nyu kesigü nyilo laso!” tson kethyü thu pe bin kenjü gü jo le penlo lati.
55“Hire, kesi, nkvukelo le dikipon bin nla?
Hire, kesi, nshin le dikipon bin nla?” 56Kesi shin gü tsüle kemu, lo kemu kekvu gü. 57Ai ngun Npugü Jisu Khrista genyu kvukelo khipe ntsü keshü gü Sunggigü cheno.
58Tsügenyu apvünyu akesonyu ju, Npugü genyu hagun tho tsüle a-kenrun thyüla loho tsekethyü shao hagun ketenyen nyu nko binlo.
Currently Selected:
1 KORINTHIANYU 15: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
