1 KORINTHIANYU 14
14
Khwen Seni Lo Sidyü Jo Kezo
1Hagun keso, hü gunlo, lo sidyü jo zo kelogü tsü rüchün nchon-o Kapu ka hyulo kehü dan tsü fü tenge tselo. 2Kechamvule shakemvu khwen nyu jozo kebin gü tsüle temi ka mvu le Sunggigü ka zo hünyo, lo temi nme-e no a-khwen sha mvu le Kapugü nyu a-npvü jo kentsun zo bin kehü genyu. 3Ai sidyü jo zo kebin gü we, me thyü nsoshü lo methukeyhun shü lo me nyun thyü nbwen shü nrün genyu temi ka zo bin hünyo. 4Shakemvu khwen sen-o jozo kebin nyu le a-npvü a-thyü ngwalo hü, ai sidyüjo zo kehünyu le kehun thyü ngwa lo hünyo.
5Lo ale hagun aphu no khwen senni sen-o jozo kethyü le akenyü, ai hagun no sidyü jo zo kethyü we akenyü kvu, ai khwen seni sen-o jozo kebin güle kehun thyü ngwashülo nrün genyu a-kon ai zope mehi kemvu we tsügü nyeki sidyü jo kezo gü we gon kvu. 6Lo apvünyu ju, ale keshanyu laka hagun ki ryüo teshakeshü jo, nmvue thakesha jo, nmvue sidyü jo, nmvue senkethyü jo pe hagun ka zomvuo khwen seni nyu tha zotin la yatselo, agenyu hagun le nyu kechwi hyulo tila? Ale Sunggigü kipon yhenshwi keshü, nmvue thakesha nmvue jolo peha nmvue senkethyü senryü kemvu we.
7A-kerhünronzin kendi kanyü kheli nmvue a-ron kechon le kebin lü kethyü khin tsü ai a-khwen thyü kecha thyüshü mvu yatselo digü le digü khwe yo segü le shalo mon? 8Tsühontse shu khun petsü shü mvu yatselo, segü le teri thyü nrün genyu a-gwün ndolo tila? 9Tsühontse hagun ai meno shalo kegwa jozo shü mvulo, mele dihontse hagun jokezo shalo mon? Kechamvule hagun jokezo le tsangkenhi nyu tinkelai gwünzin lati. 10Kazü hinyu thakhwen kechacha kethyü le chon sa bin tsentsü, lo tsüdan nme ai a-kon kendi nme ndi. 11Tsügenyu ale tha khwen gü kon shamvu yatselo ale jozo kebin gü mhundyü nyu tesin nme thyüla ti, lo jozo kebin gü ai amhundyü nyu tesin thyüla ti. 12Tsühontse hagun ai Kapu jochü dan, fü tserü kebin hontse, kehun thyü ngwa shülo nrü ai fü tenge lo.
13Tsügenyu khwen kechaki jozo kehü gü no a-kon ai zosin shülo nrün genyu hilo nye. 14Kechamvule ale shakemvu khwen sen-o kehithyü yatselo akapu le a-npvü kehi thyü hünyo, ai anyun kipon we thame shalo hümvu. 15Tsonlo ale nyu tsethyü tila? Ale akapu nyu kehi thyüti, ai ale anyun nyu ko kehi thyü ti, ale akapu nyu lüthyü ti, ai anyun nyu ko lüthyüti. 16Tson mvuo nle Kapu nyu nti jochü shü yatselo temi kechanyu le njo shalo mvuo nle Sunggigü shwen keshü nyu dihontseo “Amen” zolo mon? A-le nle nyu zo bin yo shalo mvu laso. 17Kechamvule n we Sunggigü shwen sashü binlo gwa ai me kechanyu we thyü ngwalo mvula so.
18Ale hagun aphu nyeki khwenkecha sen-o tha zo chon kethyü genyu ale Sunggigü shwen binnyo. 19Tson ai kershvuka nyu we khwen kechaki jo yietseryü kezo nyeki, me kechanyu ai senthyüshülo nrün genyu, athakesha kerüchün sen-o jo kon pvün nti kezo we a-kenyü kvu.
20Apvünyu ju, tha kerüchün kipon we hagun ntsenyu thyüla nya, ai gwakemvu kethyü kipon we nyuhonyu hontselo, lo tha kerüchün kipon we peshünyu thyülo. 21Npugü le,
“Ale khwen kecha nyu lo tesin mün nyu
temi hidan ntho ti
ale atemi dan ka zo ti, Npugü le
tson zo.
Ale tesin dan mün nyu jo zoti,
ai tson-e atemi dan le akhwen
nyü shü loho.” tson kethyü tejvü gü nyu thu pe bin njü nyo. 22tsügenyu jo kecha zo kethyü we ketenyen nyu dan genyu mvule tenyenkemvu nyu dan genyu tha zansü nme le; ai sidyükesha jo kezo we tenyen kemvu nyu genyu mvule ketenyen nyu dan genyu.
23Tsügenyu, keshanyu laka kehun nyu aphu gungü kequen-o a-khwen kechacha kethyü sen-o tha zo kü tinkela nme thyüo mishün nmvue tenyen kemvunyu peha le yüryülo, tsüdan le hagun le nnu tinla sele tse mvu ti ole? 24Ai aphu sidyü kesha jo zo bin-o tenyen kemvunyu nmvue mishün nme le yüryü yatselo, tsüdan aphu genyu a-le a-npvü a-kemu shalo hünyo, lo tsüdan aphu genyu a-le a-rüla rüchün petsü lo hünyo. 25Tson-o anyun nyu kebu pvü kebin dan khishwi shü hünyo, “Lo hagun dan nyu Sunggigü le bin ketsin,” tse kethyüzo-o nkhün tsügü Sunggigü rüshvu soti.
Kehun Nyu Tha Lihi-e Keshvusen Kethyü
26Lo dihontse mon? Apvünyu ju, hagun le gunryüo kequen kelo ka, hagun ligühigüe peha no lüthyü shü, peha no senthyü, peha no teshakeshü jo zo, peha no khwen kechaki tha zo, lo peha no tsüdan kon zoshülo, tha lihi thyüe me thyü ngwa lo nrün genyu thyülo nye. 27Kehun nyu peha le khwen kechacha kethyü nyu jozo hü yatselo, mihvu nmvue chon ai mishen no zolo, lo tsüdan ai no keseri-o zolo, lo temi nme no a-kon zo kentsen thyüshü lo. 28ai a-kon zokeshü temi ndi yatselo, anyugun no kehun nyu ntsema bin tinla; lo tsügü no a-npvü a-nthon lo Sunggigü nthon bin tinla lo. 29Sidyükesha jo we mihvu mishen no zoshü, lo kechanyu dan we no ketsin le mvuyo nyülo. 30Keshanyu laka a-khoka dun kebin nyu nme le teshakeshü jo nme shalo yatselo jozo kerigü no nra mvu bin tinla. 31Kechamvule hagun aphu nme me tse sidyükesha jo zo külo gwa, tson-o aphu no shalo, lo aphu no a-nyun pechelo nrün genyu. 32Lo sidyükeshaju Kapu le sidyükesha ju zo zen hünyo. 33Kechamvule Sunggigü le kevü keben kethyü gü mvule bwenye tse kethyü gü genyu; kenshün nyu kehun aphu nyu tsühontse bin hünyo.
34Lo tenunyu dan no kehun nyu ntsema tse binlo' kechamvule anyugun no jozo mvuo tejvü gü nyu zo kehü hontse anyugun no me jozenlo lotse kehü genyu. 35Lo anyugun le tha lihi-e shalo nyü yatselo, anyugun no ka ki anyugun nyepvünyu ka ketsolo. Kechamvule tenunyu le kehun nyu jozo kethyü le tha kejokepvü nme genyu.
36Nyu letse? Sunggigü jo le hagun ka binzen shwi ole? Le hagun ka nti gunryü ola? 37Hagun dan nyu ligühigüe a-le sidyükeshanyu nmvue Kapu temi letse rüchün hü yatselo tsügü no ale jo thu pe hagun ka shü kethyü dan rüchün-o tsüle Npugü johokeshü dan letse kethyü shalo nye. 38Keshanyu laka ligühigüe jo hi nyü mvu yatselo tsügü khwen nyü nya.
39Tsügenyu apvünyu ju, sidyükesha jo zonyü tenge lo, lo khwen kecha sen-o tha kezonyu-e khin nya. 40Ai tha lihi thyüe thyükezü gü nyu kesithen to tseo thyülo.
Currently Selected:
1 KORINTHIANYU 14: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
