1 KORINTHIANYU 13
13
Keso
1Ale temi khwen nmvue ronzin nyu khwen sen-o jozolo ai keso le anyun ka bin mvulo, ale lazo ketsin kethyü khwen nmvue tegi khun pe kejon keshü khwen hontsela ti. 2Lo ale sidyükesha jochü hyulo-o jo kentsun dan lo thakesha aphu senlo ai, nmvue ketenyen aphu le bin-o kazüthun nikelalo la ai keso le anyun ka bin mvulo ale tha lihi kemvu so. 3Lo ale ahon aphu pe kendinyu gin thyü la-e lo amin hi-e pe me tsüo meno aroshvula ai keso le anyun ka bin mvu yatselo tsügenyu akechwi nme ndi.
4Keso le nyhenhi thonlo hünyo, lo meshwi njün hünyo, keso le meshwi pe a-yhüthyü hü mvu, nmvue kemakin hü mvu, keso le a-npvü a-rüchün ngo hü mvu. 5Me mhundyü nyu shwikeshvu tho-e thyü hümvu, a-npvü a-jün kegwa-e fü hümvu, mele a-ge tha gwakemvu thyüshü ai a-kenyümvu whütsela hümvu, lo tha gwakemvu rüchün hümvu. 6Lo tha gwakemvu kipon a-kenyü mvule ketsin kipon a-kenyü hünyo. 7Keso le tha aphu ka a-keshathyü tse bin hünyo, tha aphu rüchün ngwa hünyo, tha aphu ka gwalo ti ado tse rüchün hünyo, tha aphu nyu nyhen binlo hünyo.
8Keso le thame ka-e ndila loho. Ai sidyükesha jo zolo bin ai tsüle a-keni thyü lati, khwen seni kezo le bin ai tsüdan ai zomvu lati, thakesha jo le bin-e tsü ndi lati. 9Kechamvule nle aphu mvuo keshanyu nti sha kehü gwünzin, lo sidyükesha jo ai keshanyu nti zo kehü genyu. 10Ai tha lihi ka-e gwati gwapen kethyü gü le gunryülo, shapen kemvu tsüle bin mvu lati.
11Ale ntsenyu thyü ketseka ntsenyu hontse jozo, ntsenyu hontse tha rüchün, ntsenyu hontse tha ndo, ai ale peshü kelo siki ntsenyu jvü tsü khe küla so. 12Kechamvule nle ntsoka shyeshwi ka nshye hyu nryü tseo hyu hü ai khenyüme we kemhun hyu nrün genyu, ale ntsoka aphu mvuo keshanyu nti sha kehü gwünzin, ai khenyüme we Sunggigü le arüla shati kethyü hontse tsühontse ako tha sha penlo ti.
13Lo tson-o ketenyen, sidyü, keso, hidan kenshen hile bin ti ai tsüdan nyu keda tsin gü le keso.
Currently Selected:
1 KORINTHIANYU 13: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
