1 KORINTHIANYU 12
12
Kapu Jochü dan
1Lo apvünyu ju, ale hagun no Kapu le khishü kehü dan shamvu tse bin nyü mvu. 2Hagun le nduka khristian thyü kemvu ka thame rüchün mvutse jozolo keho teromen kezü dan kipon hü kethyü hagun npvü tsü shabin ti. 3Tsügenyu temi ligühigüe Sunggigü Kapu nyu tha kezonyu le, “Jisu swetsü,” hü mvu, lo Kenshün Kapu gü kemvu we temi nme-e “Jisu le Npugü,” letse kethyü zohü mvu tsekethyü hagun no sha nyü.
4Lo Kapu le khishü kehü le kechacha le bin; ai Kapu gü we nme. 5Tson-o lotho-e kechacha kethyü le bin; ai Npugü we nme. 6Lo thatho ai kechacha kethyü le bin, ai tsüdan nyu tha aphu khishü kehü gü le Sunggigü. 7Ai Kapu tho khipe temi ligühigüe tsü keshü le temi aphu kechwi genyu. 8Tson-o Kapu nme tsüge tedo kegwa pe peha tsü, lo thakesha jo zolo kegwa pe peha tsü. 9Lo Kapu tsügü ge ketenyen pe peha tsü, lo Kapu tsügü ge me thyü kesherhünlo kegwa pe peha tsü, 10ndun kethyü tho thyülo kegwa kekvu pe peha tsü, lo sidyü jo zolo kegwa pe peha tsü, lo Kapu dan sha kekholo kegwa pe peha tsü, lo khwen tseryü zolo kegwa pe peha tsü, lo khwen tserü tsüdan kon zoshülo kegwa khipe peha tsü laso. 11Hi aphu Kapu nme le a-npvü a-kendo thyüo kenjün kekho kü pe me tsüshüo aphu nyu tha thyü bin hünyo.
Min Nme Ge Zan Kechon Kebin
12Lo min güle nme ai a-zan ketho kechacha kethyü kechon le bin hünyo, lo min nme ge a-zan ketho kechacha kechon le bin ai aphu kesin pe min nme kethyü hontse Khrista rüla ko tsühontse le. 13Tson-o Judanyue Juda kemvunyue, me do kethyünyue medo thyü kemvunyue kengüo min nme thyü nrün genyu Kapu nme nyu baptaiz thyü külo laso, lo ngun aphu no kengüo Kapu nme nyu tsü külo laso.
14Tsüntimvule nmin le zan nme nti mvu, ai kechon pe thyü njü. 15Keshanyu laka npha le, “Ale me ben kemvu genyu me min ge zan nme kemvu le,” tson bin ai me min ge zan ketho nme thyümvu keloi mvu. 16Tsühontse me nyetin le, “Ale me yhütyü kemvu genyu me min ge zan ketho nme kemvu le,” tson bin ai a-le me min ge zan ketho nme thyü mvu keloi kemvu. 17Nmin aphu no nyhütyü thyü küla yatselo nyu lope tha khwen nyü mon? Nmin aphu no n nyetin thyüla yatselo nyu lope tharün sha mon? 18Ai Sunggigü le a-npvü a-kendo thyüo a-zan ketho kechacha kethyü dan khipe nmin ge shüla so. 19Ai tsüdan aphu no zan nme nti thyüla yatselo nyu lope nmin thyü mon? 20Tsühontse zan kechon le bin ai min nme.
21N yhütyü le npha ka, “Ale nsen mvu ai gwa,” tse zolo nrün ndi, nmvue nben le npha hvuka,“Ale hai sen mvu ai gwa,” tse zolo nrün ndi. 22Tsonkethyü gü mvule nmin ge zan ketho kechacha kethyü kvukemu hontse kethyü gü ai sen mvulo shvu tsin hü nyo. 23Lo nle nmin ge zan kechacha kethyü dan nyu rüchün nshe kehü dan, nle tsüdan tsü ai rühvuo hen kezegwa thyü pvü bin hü nyo, tson-o a-ge zan ketho keshvunyu no zegwa kvu bin hünyo. 24Ai n ge zan kegwa dan we a-kehen sen mvue gwa, ai nge teshwen kendi zan ketho dan no teshwenpvülo nrün genyu Sunggigü le nmin thyü keren pe tsühontse shü laso. 25Tsügenyu min gü ge kenjün kekho kethyü ndi, ai zan kechacha kethyü tsüdan le khinyu khinyu phin rüchün bin hünyo. 26Lo nme le kenjün thyülo yatselo kechanyu ju aphu tsügü zen-o kenjün thyü hünyo; lo nme le teshwe pvülo yatselo kechanyu aphu a-zen-o a-kenyü kü hünyo.
27Ntsoka we hagun le Khrista min gü laso, hagun nmeme hile tsügü ge zan nme me le. 28Tson-o Sunggigü le kehun nyu kejü küshü, kerigü le Apostel ju, kenyhun gü le sidyükesha ju, kenshen gü le senkethyü dan, tsüsika le ndun kethyü tho thyükelo dan, lo kehokenyü thyü kesherhün kelo ju, me keche kehü dan, me ketsen shü kehü ju, lo khwen seni zolo kehü ju ai khin nya. 29Tsüdan aphu apostel kü ole? Aphu sidyükeshanyu kü ole? Aphu senkethyü nyu kü ole? Aphu ndun kethyü tho thyü kehünyu kü ole? 30Tsüdan aphu me thyü kesherhün shü kehü jochü le bin kü ole? Aphu khwe seni sen-o jozo kü ole? Aphu khwen seni kon zo külo kehünyu ole? 31Ai jochü kegwa tsin dan nnyü tserülo nye. Lo tson ai ale tson kegwa tsin nme tsin pe hagun hishü ti le.
Currently Selected:
1 KORINTHIANYU 12: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
