1 KORINTHIANYU 11
11
1Ale Khrista rothyülo kehü hontse hagun ko a hontselo nye.
Kerüshvu Nyu Tenunyu le Pe Hen Kepvü
2Lo hagun le tha lihika ai a rüchün-o ale pe hagun tsükeshü senkethyü jo dan zen bin kehü genyu ale hagun shwen bin nyo. 3Ai Khrista le peche nyu pe gü, lo pechenyu le tenunyu pe gü, lo Sunggigü le Khrista pe gü tsekethyü ale hagun no sha nyü. 4Pechenyu ligühigüe a-pe henpvüo kehithyü yatselo a-pe gü rühvu mvu laso. 5Ai tenunyu ligühigü ai a-pe henpvü mvuo kehithyü nmvue senthyü hü yatselo a-npvü a-pe gü rühvu bin mvu laso, tsüle a-pe thu kelanyu hontse laso. 6Lo tenunyu le a-pe hen mvulo a-no a-shün tsela ai gwa, ai tenunyu le a-shün tsela nmvue thu kela le tha kejo kepvü nme genyu a-no a-pe henpvü lo. 7Lo pechenyu we a-pe henpvü mvue gwa, kechamvule a-le Sunggigü rhenrhü gü lo a-ge Sunggigü no zankechwi thyülo nrün gü kethyü genyu; ai tenugi we peche gü no a-ge teshwen pvülo nrün gi genyu. 8Kechamvule peche gü le tenugi ge yhunlo mvule tenugi le pechegü ge yhunlo. 9Nmvue tenugi genyu peche gü thyüshü mvule peche gü genyu tenugi thyüshü. 10Tsügenyu tenunyu le ronzin nyu dan ai anyugun nri bin kehü genyu me hensin kebin zansü a-pe henpvü zü. 11Tson ai Npugü kipon we tenugi ai peche gü nyeki kecha thyü mvu, lo peche güe tenugi nyeki kecha thyü mvu. 12Kechamvule peche gü ge tenunyu le chwikeryü hontse tsühontse tenunyu ge pechenyu yhunlo hünyo, ai tsü aphu Sunggigü kipon kenchon.
13Hagun npvü rüchün shwi, tenunyu le a-pe hen mvu tseo Sunggigü ka kehithyü kethyü le a-zü le? 14Lo pechenyu le a-shün no kethon thyü pvü yatselo mele a-rühvu hü kemvu temi jvü nyue hagun le tsü shalo hü mvu ole? 15Ai tenunyu le a-shün kethon thyü pvülo a-gwün kezegwa; kechamvule pehü pe a-tsü keshü le a-no pe a-pe henpvü hü lotse kethyü genyu. 16Ai temi peha le lile hile tse bin yatse ai, a ai lo Sunggigü kehun dan-e tejvü kecha nme-e sen hümvu.
Npugü Keho
17Ai ale hagun ka zoshü titse kebin higü nyu ale tha konme genyu hagun shwen loho; tsügü tsüle hagun le gwalo nrün genyu mvule shvukvula nrün genyu gun gü Kequenlo kehü gwünzin le. 18Lo jo kerigü le higü hi: ale sha kethyü le hagun le gungü kehun kelo ka a-dan kechacha thyüla hü nle tse nmhi-e la? Lo amhundyü ka we ketsin thyü bin nrün hontse. 19Kechamvule hagun dan nyu ketsin thyü kehünyu sha kecha thyülo nrün genyu kepvükho kethyü ai soryü tsentsü nrün genyu. 20Lo hagun le gungü kehun kelo tsüle Npugü kerüchün chvü tyü nrün genyu kemvu. 21Kechamvule hagun le tsü ketyü ka khinyunyu kekhwen mvule a-npvü a-gin kenyü thyü tyülo la la tse kehü genyu, tson-o peha le nnyon bin lo peha le nzeü binla hünyo. 22Kha, hagun le tyü lo tsü nrün genyu hagun ka ndi bin ole? Le hagun le Sunggigü kehun gü süjün mvu lo thame kendinyu no kemeni titse hü nla? Ano hagun ka nyu zoti la? Higenyu ano hagun shwe ti le? Ale hagun shwe loho!
23Kechamvule ale Npugü ka nyu nyu hyulo yo ale tsü khipe hagun ai tsüshü laso. Lo tsüle Npugü Jisu tenshü nrün je a-le tensü khipenlo. 24Tson-o a-le Sunggigü shwe shüo tensü boshwenlo njüo, “Higü hile hagun genyu khikeshü amin gü le, hagun arüchün hülo nrün genyu higü tyülo nye?” 25Lo tha tyü kelo sika a-le tsühontse honpen gü ko khipenlo njüo, “Honpen higü hile azi nyu kejozenkelo keshün gü le; hagun le higü hi ketsü tsen arüchün hülo nrün genyu tsü hü nye,” tsonshü.
26Kechamvule hagun le tensü higü ketyü tsen lo honpen higü ketsü tsen Npugü le nigunryü kemvuthen Npugü kesi rüla tsin pe mehi kebin genyu. 27Tsügenyu temi ligühigüe kümvu tseo tensü tsügü tyü nmvue Npugü honpen gü tsü hü yatselo Npugü thyü lo a-zi kipon mula ti. 28Temi ligühigüe a-npvü a-rüla rüchün kegwa thyüo tensü tsügü tyü lo honpen tsügü tsü nye. 29Lo temi ligühigüe Npugü min gü rüchün kegwa thyü mvuo tyü lo tsü yatselo, temi tsügü le a-npvü a-kemu tyü lo tsülo la hünyo. 30Higenyu hagun dan nyu temi kechon le kvumvu, lo hobin hü nyo, lo temi kechon le sila so. 31Ai nle n npvü nketso ketsin thyü hü yatselo Sunggigü le nketso loho. 32Tson ai nno kazü gü zen kesin-o nmu mvulo nrün genyu Npugü le nketso keso ka n nthyü nnyüo nsenthyü hünyo.
33Tsügenyu apvünyu ju, hagun le tsü tyü nrün genyu ryü kequen kelo ka khinyunyu kekhwenlo nye. 34Hagun le gü kehun kethyü tsüno mula mvu nrün genyu temi ligühigüe nnyon bin yatselo a-npvü a-ka ki tyülo la chi, lo thakon kecha dan we ale gunryülo yatselo tsin pe hagun hishü ti.
Currently Selected:
1 KORINTHIANYU 11: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
