TITAS 3
3
Khristian Tatdan Kilawm
1Vaihawmte leh thuneite nuai a kitahlut a thumang ding leh thil hoih chiteng sem ding a mansa a om ding in sinsak inla, 2kuamah gensiatlouhdan ding, vuallemtak a omdan ding, mi tengteng lak a thunuailutna chiteng hihlang a, nunnem ding in amaute theikhe thaksak nawn in. 3Ei leng nidanglai in mihai, thumang lou, khem a om, utna leh kipahna chiteng sem, gilou leh hazat hat a om, kihhuai leh kihotuahte i hi uhi. 4Himahleh Pathian, i hondampa migitdan leh mihing tung a a-itdan ahong kilat lai in, 5diktatna a i thilhihte ziak hilou, azahngaihna ziak a pianthakna a sawp in leh Kha Siangthou a thaksakna in eite ahon hondamta hi. 6Huai Kha Siangthou, Jesu Khrist i Hondampa ziak in nakpitak in i tung ah asungbota hi. 7Huchi a ahehpihna a siamtansak a om in, lametna a tangtawn hinna gouluahte i hihtheihna ding in. 8Hiai thugen adik ahi. Hiai thilte na phut tinten ka hon deih hi, huchi a Pathian gingtasate'n thil hoih hih ding a apilvan theihna ding un; hiaite mihingte a ding in ahoih in aphatuam uhi. 9Himahleh dotna haihuai, khangthu suina, kiselna, dan thu a kilaina nungngatsan in; huaite thil phatuam lou leh bangmah lou ahi. 10Ginna tuam neimi zaw khatvei nihvei hilh nung in deih ke'n. 11Huchibang mi lampial leh gilou ahi chih thei in, amah mah siam louh akitangsak ahi.
Thuhilhna Nanungte
12Artemas hiam, Taikikas hiam, na kiang a ka hon sawl chiang in, Nikopolis ah ka kiang ah hong pai teitei in; hiai mun a phalbi zat ka tum hi. 13Dansiam, Zenas leh Apollos azinna ua bangkim ataksaplouhna ding un, phatuamngaitak in na panpih un. 14I mite'n leng ataksap khawktakte uh asuktuah theihna ding un leh gah lou a a-omlouhna ding un thil hoih hih a kuhkal ding in zil uhen. 15Ka kiang a om tengteng in chibai ahon buk uhi. Ginna a kei hon itte chibai hon buksak in. Na vek ua kiang ah hehpihna om hen, Amen.
Currently Selected:
TITAS 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
