TITAS 2
2
Sinsak Ding Tuamtuamte
1Nang zaw thuhilhna hoih toh kituak thu gen in. 2Putekte kidek thei, zahtakhuai, lungsim hoihtak, ginna leh itna leh kuhkalna a diktak hi ding in hanthawn in. 3Pitekte leng huchibang in, sianthouna toh kimeh, khohei a zahdan siam ding leh heh hat lou, uain hai lou, thil hoihte zilsakte hi zaw ding in hanthawn in. 4Nungak deuhte tuh apasalte uh leh atate uh it ding leh lungsim hoihtak pu a om ding a ahilhtheihna ding un, 5Pathian thu gensiat a a-omlouhna ding in theisiamtak a kithunun thei, beven lou, amau insung kem hiathiat, chingkam leh apasalte thuthu a om ding a athuhilh theihna ding in.
6Huai bang in, tangvalte lungsim hoihtak pu ding in hasuan in. 7Thil bangkim a thil hoih hih lam a etton ding in kibawl inla; na thugin sinsakna ah diktatna, chihtakna leh, 8gensiat vual louh paukamte langsak lechin alehlam a nang hon demte'n nang tungtang thu a thusia gen ding nei lou a azumtheihna ding un.
9Sikhate, apute uh sel lou a athuthu a om ding leh bangkim a akipahna ding ua om ding in thuhilh in. 10Pathian i hondampa thuhilhna thu bangkim a akilawmsak theihna ding un, khut them nei lou ding, muanhuai a nna hoih tengteng hihlang zaw ding in sinsak in.
Lametna Kipahhuai
11Mi tengteng kiang ah hotdamna hon tun in i Pathian hehpihna ahong tungta hi. 12Pathian limsaklouhna leh khovel duhgawlna tawpsan in, tulai khovel ah kidek leh diktattak leh Pathian limsak in i om ding uh chih theisak in. 13Lametna kipahhuai, i Pathian thupi leh Hondampa Jesu Khrist thupina kilakna ngak in. 14Ama'n tatlekna tengteng lak a kipan in ahon tattheihna ding in leh chitel tuam, thil hoih hih a phatuamngai, amah a ding a ahihsiangthou theihna ding in i sik in akipeta hi.
15Thuneitak in huai thute hilh inla, hanthawn inla, taihilh in. Kuamah in nang hon musit kei uhen.
Currently Selected:
TITAS 2: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
