PHILEMON 1
1
Chibai Bukna
1Paul, Khrist Jesu hentapa leh i unaupa Timothi in, ka deihtak leh ka sepgimpih uh Philemon kiang leh, 2ka sanggamnu uh Apphia kiang ah, ka sepaihpih uh Arkippas kiang leh na inn a saptuam kikhawmte kiang ah leng: 3Pathian i Pa leh Toupa Jesu Khrist kiang a kipan hehpihna leh khamuanna na kiang uah om hen.
Philemon Itna leh Ginna
4Ka thumnate ah na min lou gige in, ka Pathian kiang ah kipahthu ka gen hi. 5Toupa Jesu lam leh misiangthou tengteng lam a itna leh ginna na neih za in. 6Na ginna kikoppihna, noumau a om thil hoih chiteng theihkimna lam ah Khrist lam a ahong phattuam theihna ding in. 7Unaupa aw, nangmah ziak a misiangthoute lungtang ahong halh tak ziak in na itna ah ka kipak in ka kha amuang mahmah hi.
Onesimas A Dia Ngetsakna
8Huaiziak in akilawm hun hih ding in nang thu hon piak Khrist ah kingap mah leng, 9itna ziak in, Paul putek hial hita leh, tu a Khrist Jesu hentapa hita in, anget in ka hon ngen zaw hi. 10Ka ta Onesimas, kolbun kawm a ka neihkhiak, amah a ding in na kiang ah ka ngetsak hi. 11Tuma lam in nang a ding in aphatuam kei a, tu'n zaw kei leh nang a ding in aphatuamta hi. 12Amah, ka lungtang mahmah na kiang ah ka hon sawlkik nawn hi. 13Amah tanchinhoih a ka kolbutna a nangmah sik a nna ahon sepsak theihna ding in ka kiang a omsak nilouh ka ut mahmah hi. 14Himahleh na hehpihna hehpihsak teitei bang hilou in, na thu bang ahihtheih zawkna ding in, na thu lou in bangmah hih ka ut kei hi.
15Sawt lou kal nang ahon khen tangtawn a amah na neih tawntungna ding ziak ahi kha mai ding hi, 16himahleh sikha bang hi nawn lou a, sikha sang a hoih unau deihtak bang zaw in; kei a ding in deihtak ahi diak a, nang a ding ngial in sa leh Toupa ah nak hihna in chia!
17Huchi in lawm a na hon simleh keimah bang in amah na kipahpih in. 18Huan na tung a banghiam ahihkhelh a, na thil banghiam abatleh keimah bat in bawl in. 19Kei Paul in, keimah khut ngei a ka gelh ahi. Keimah in ka ditsak ding hi; ka kiang a nangma'n leng bat na neih sam dan hon hilh bel ka hi kei hi. 20Ahi, unaupa aw, nangmah ziak in Toupa ah kipahna hon neisak inla, Khrist ah leng ka lungtang hihhalh in.
21Ka gen sang a thupizaw tham in na hih ding chih ka theih ziak in, na hon thuman ding chih muang in na kiang ah ka gelh ahi. 22Akoi abang hitaleh, huai kia hih lou in, tunna ding hon na suktuahsak in; na thumnate uh ziak in na kiang ua piak ka hi ding chih ka kigingta hi.
Chibai Bukna Nanung
23Epaphras, Khrist Jesu a ka hentakpihpa'n chibai ahon buk hi; 24huchi mah bang in ka seppih Marka, Aristarkhas, Demas leh Lukate'n leng chibai ahon buk uhi.
25I Toupa Jesu Khrist hehpihna na kha uah om hen, Amen.
Currently Selected:
PHILEMON 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
