TITAS 1
1
Chibai Bukna
1Paul, Pathian sikha leh Jesu Khrist sawltak, Pathian mitelte, aginna uh lamtou ding leh Pathian limsakna toh kithuah thutak theisak ding a sem in; 2huai tangtawn hinna lametna a kinga, Pathian zuaugen thei lou in khovel om ma a achiam, 3himahleh amah huntak ah thugenna zang in athu ahihlangta, huai thugenna Pathian i Hondampa thupiak bang zel a kepsak ka hi.
4Ginna kibang a ka tapa diktak Titas kiang ah, Pathian leh Khrist Jesu i Hondampa kiang a kipan hehpihna, zahngaihna leh khamuanna om hen.
Upate Sehna
5Hiai ziak in ahi huai Kret tuikulh a nang ka hon nutsiat, thilhih zoh nailouhte na hihzoh theihna ding leh thu ka hon piak bang a, khua teng a upate na sehtheihna ding in. 6Upa ding zaw gensiatbei, zi khat nei, tate Pathian gingta, nopsak bawl luatna lamsang a gensiat loh lou, dan bang lou a om lou, nei ahih peuhmah uleh, 7saptuam heutu Pathian nasep enkaimi ahih ziak in gensiatbei ahih ding ahi; migenhak, lunggam, uain khamhat, mivuak hat, punna nin a huaihammi hi ding hilou ahi. 8Mi kipahpihdan siam, hoih lam deih, lungsim diktak, midiktat, misiangthou, kidektheimi ahih ding ahi. 9Asinsa thuhilhna dik midang sinsak thei leh selhat mite siam louh tangsak thei ding a sinsak a om thugin muanhuai lenkip mi ahi ding hi.
Sinsakmi Takloute
10Dan bang lou a om, thu mawk gengen leh mikhem chingmi tampi, abik in zeksumte lak a mi a-om uhi. 11Huai mite kam humsak ding ahi, punna nin deih ziak a thuhilh louh ding hilh in, mite a-inkuankuan un apisia uhi. 12Amaute lak a mi azawlnei khat un houh:
“Kret tuikulh a mite zaw zuautheite,
gamsa giloute, thadah
anhaite ahi uh,” achi hi.
13Hiai theihpihna adik ahi. Huaiziak in ginna a adiktheihna ding un leh, 14Judate tangthu phuahtawmte a kisubuai lou ding leh thutak nungngatsan nakte thupiak alimsaklouhna ding un naktak in taihilh in. 15Siangthoute a ding in bangkim asiangthou hi; himahleh minin leh gingloute a ding in bangmah siangthou a-om kei, alungsim uh asia-le-pha theihna uh leng anin hi. 16Pathian thei akichi ua, himahleh athilhih un anawlkhin nak uhi. Kihhuaite, thumangloute, thil hoih sep ding peuhmah a deihlouhte ahi uhi.
Currently Selected:
TITAS 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
