ROMETE 6
6
Khelhna Sihsan Theihna
1Bang i genta dia le? Hehpihna akhansem theihna ding in khelhna ah i om nilouh ding ua hia? 2Om nilouh lou hial ding! Eite khelhna lam a sisa, khelhna ah bangchi in i hing thei lailai dia? 3Eite Khrist Jesu a baptis lut a om tengteng asihna ah baptis lut in i om chih na thei kei ua hia? 4Huaiziak in asihna a baptis lut a om in amah toh vuikhawm in i om uhi, huchi a Pa thupina in misi lak a kipan a Khrist akaihthoh tak bang a eite leng hinna thak a i khosak theihna ding in.
5Asihna kibatpih a amah toh i kizop khit ngalleh athohnawnna kibatpih in leng i kizom ngei ding uhi. 6I mihing lui akiang ah kilhden in a-om samta chih i thei; huchi a khelhna pumpi hihmanthat a a-omtheihna ding leh tua kipan a khelhna sikha a i omlouhna ding in. 7Kuapeuh sisa khelhna lak ah asuaktata hi. 8Huan Khrist toh i sih samleh akiang ah i hing sam ding chih i gingta uhi. 9Misi lak a kipan Khrist kaihthoh in a-omta, asi nawn kei ding chih i thei ngal ua; sihna in amah tung ah thu aneita kei hi. 10Asihna khelhna lam thu ah tangtawn a ding in khatvei kia asi a, ahinna bel Pathian lam thu ah ahing ahi. 11Huchi mah bang in, nou leng khelhna lam thu ah sisa in kisep unla, Pathian lam thu ah bel Khrist Jesu ah hing in kisep un.
12Huaiziak in na pumpi uh duhgawlna thumang ding in na pumpi sithei uah khelhna vai hawmsak kei un. 13Na pumpi hiangte uh leng diktatlouhna vanzat ding in khelhna kiang ah pe phal sam kei un; himahleh misi lak a kipan hing nawn bang in Pathian kiang ah kipia unla, na pumpi hiangte uh leng diktatna vanzat ding in Pathian kiang ah pe phal zaw un. 14Noute dan thunuai a om hilou a, hehpihna nuai a om na hih ziak un khelhna in na tung uah thu anei nawn kei ding hi.
Khelhna Sikhate Pathian Sikha Suahna
15Bangchi in ahita dia le? Dan thunuai a om i hi kei ua, hehpihna nuai a om i hih zawk ziak in i khial ding uh ahi diam? Hilou hial ding! 16Kua kiang peuh ah leng athu mang ding a asikha dia na kipiak un sihna khop a khelhna sikha hiam, diktatna khop a thumang sikha hiam, athu na man uh sikha na hi uh chih na thei kei ua hia? 17Himahleh Pathian kiang ah kipahthu om hen; noute khelhna sikha na hita mah le uchin, thuginpi a na kipiakna uh na lungtang taktak un na zuita uhi. 18Khelhna lak a kipan suahtaksak in na omta ua, diktatna sikhate na hong hita uhi. 19Na sa uh hat louh ziak in mihing dan in thu ka gen hi; na sahiangte uh nitna leh tatlekna ding a tatlekna kiang a sikha ding a na piak phal bang un, tu in na sahiangte uh sianthouna ding in diktatna kiang ah sikha ding in pe zaw un.
20Khelhna sikhate na hih lai un diktatna lak ah na siang uhi. 21Huai na thil zahpihsate uah, huai lai in gah bang ahia na muh zel uh? Huai thilte tawpna zaw sihna ahi. 22Tu'n ah bel khelhna lak a hihsiang a om in, Pathian sikhate na hong hih un, sianthouna mu khop in na gah uh na nei uh akei hiam, huai tawpna tangtawn a hinna toh. 23Khelhna man sihna ahi ngal a, Pathian thilthawnpiak bel i Toupa Khrist Jesu ziak in tangtawn a hinna ahi.
Currently Selected:
ROMETE 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
