ROMETE 5
5
Pathian Toh Kilemna
1Huaiziak in ginna ziak a siamtansak a om in i Toupa Jesu Khrist pansan in Pathian toh kilem in i om uhi. 2Amah tawn mah in ginna in hiai hehpihna ah luttheihna i nei ua; huai a ding in Pathian thupina i tan ding lametna ah kipak in i om uhi. 3Huai kia leng hilou in, i gimthuakna ah leng kipak in i om uh, gimthuakna in thuakhatna atun hi. 4Thuakhatna in hindan hoih atun a, hindan hoih in lametna atun chih thei in. 5Huan lametna in ahon zahlaksak kei a, huai Kha Siangthou i kiang ua hon piak tawn a Pathian itna i lungtang ua sun a a-om tak ziak in. 6I hat louh lai in ahuntak in Pathian limsakloute sih sik in Khrist ahong sita hi. 7Midik sik a sih, mi a-ut ngel kei hial ding ua, mihoih sik in bel mi kuahiam bek in sih angap khamoh kei ding hi. 8Himahleh Pathian in mikhialte i hih lai a Khrist i sik a asihna ah ahon itna alangsakta hi.
Pathian Hehna A Pan Hotdamna
9Huchi in asisan a siamtansak a i om khit nung in, amah ziak in Pathian hehna a kipan hotdam in i om ngei ding uhi. 10Melma i hih lai a bawn a Tapa sihna ziak a Pathian toh na kilemkik khin i hih ngal uleh, kilem a i om khit nung un ahinna ziak in hotdam in i om sem ding uhi. 11Huai kia leng ahi kei, kilepkikna tua hon musakpa i Toupa Jesu Khrist ziak in Pathian ah leng i kipak ahi.
Adam Ziak A Sihna Khrist Ziak A Hinna
12Huan mi khat ziak in khovel ah khelhna alut a, khelhna ziak in sihna alut a, huchi in mi tengteng akhelh tak ziak un sihna in mi tengteng azelsuakta hi. 13Dan om ma in khovel ah khelhna a-om khin ngal a; dan a-om louh lai in khelhna tuh khelhna a sim ahi kei hi. 14Himahleh Adam om a kipan Mosi om pha in Adam tatlekna bang a thil hihkhialloute tung ah leng sihna in vai ahawm zel hi. Adam tuh hong pai dingpa tehpihna ahi. 15Himahleh thilthawnpiak zaw tatlekna toh akibang kei. Mi khat tatlekna ziak a mi tampi asih ualeh Pathian hehpihna leh mi khat, Jesu Khrist hehpihna thawnpiak akichingzaw sem a mi tampi tung ah vuh in a-om hi 16Huan thilthawnpiak zaw mi khat tatlekna gah toh leng akibang sam kei hi. Mi khat tatlekna tung a vaihawmna in siam louh tansakna atun a, mi tampi tatlekna tung a thilthawnpiak in bel siamtansakna atun hi. 17Mi khat tatlekna ziak a sihna in huai mi khat mah pansan a vai ahawm leh hehpihna kiningching mahmah leh diktatna thawnpiak tangte'n mi khat, Jesu Khrist pansan in hinna ah vai ahawm zaw sem ding uhi.
18Huan mi khat tatlekna in mi tengteng a ding a siam louh tansakna atut mah bang in, mi khat diktatna thilhih in mi tengteng a ding in suahtakna leh hinna ahon tun hi. 19Mi khat thumanlouhna ziak a mi tampi mikhial a bawl ahih bang un, mi khat thumanna ziak in mi tampi midiktat a bawl ahi ding uhi. 20Khelhna latsak semna ding in Dan ahong om behlap a; himahleh khelhna akhanna peuh ah hehpihna akhangsem, 21huchi a khelhna in sihna a vai ahawm mah bang a, hehpihna in leng i Toupa Jesu Khrist pansan a diktatna ziak a tangtawn hinna dong a vai ahawmtheihna ding in.
Currently Selected:
ROMETE 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
