ROMETE 14
14
Khristian Noplenna Zatdan Dik
1Huan ginna hat lou mi, angaihdante gense lou in ngai un. 2Mi khat in thil bangkim ne thei ding in akigingta a, mihat lou in bel anteh-louhing kia ane hi. 3Ane mite'n nelou a kidekte simmoh kei henla; nelou a kidekte'n leng anete soisel tuan kei hen; Pathian in amah akipahpih khinta ngal a. 4Midang sikha tung a soiselpa nang kua na hia? Apu a ding in ahi adin hiam ahihkeileh apuk. Himahleh amah zaw dinsak in a-om ding, Toupa'n adingsak thei hi.
5Mi khat in ni khat nidang sang in athupi ngaih tuam a, midang in ni tengteng kibang chiat in angai. Michih amah lungsim ah kitheichian hen aw. 6Ni tangpa'n Toupa pahtawina ding in atang hi. Huan bangkim nepa'n, Pathian kiang a kipahthu agen ziak in, Toupa pahtawina ding in ane a; aneloupa'n leng Toupa pahtawina ding in ane kei a, Pathian kiang ah kipahthu agen hi. 7Kuamah eimah a dia hing i hi kei ua, kuamah eimah a dia si leng i hi sam kei. 8I hinleh Toupa a ding in i hing a; i sih in leng Toupa a dia si i hi ngal a; huaiziak in i hin in leng, i sih in leng Toupa a i hi uhi. 9Khrist sihna leh ahin nawnna pen, mihing leh misi Toupa ahihtheihna ding ahi. 10Himahleh nang bang achia na unau soisel na hia oi? Ahihkeileh nang bang achia na unau simmoh na hia oi? Pathian' thukhenna tutphah ma a dingh vek ding lah i hi ngal ua.
11“Toupa'n, kei ka hin bang in, mi tengteng ka ma ah akun ding ua,
lei tengteng leng
Pathian kiang ah akipulak ding uh chi in ka chiam ahi,” achi, chih gelh ahi.
12Huchi in i vek un Pathian kiang ah eimah tanchin i gen chiat ding uhi.
Kitundingtuahna
(Gal 6.1-2)
13Huaiziak in kisoisel nawn kei ni, kuapeuh in a-unau lampi ah kisuihna hiam dalna hiam koih louh tum zaw hen. 14Amah mawngmawng a siang lou bangmah himhim a-om kei chih Toupa Jesu ah ka thei mahmah hi; thil khatpeuh siang lou a seh pen bel aseppa a ding in siang lou ahi mai hi. 15Na banghiam nek ziak a na unau lungsim anatleh itna dan in na gamta kei' a ahi. Asih sik a Khrist in asihsakpa na thil nek in hihmang kei hen. 16Huchi in nou a dia hoihna, gilou lam a gen in om kei hen. 17Pathian lalgam nek-le-dawn thu hilou in Kha Siangthou a diktatna, kituahna leh kipahna ahi zaw hi. 18Kuapeuh huai thu ah Khrist nasem Pathian kipahpih leh mihing phat in a-om hi.
19Huchi in kituahna ding leh kihihhat tuahna ding thilte i delh ding uh. 20Na thil nek ziak in Pathian nasep hihse ke'n. Thil tengteng asiangthou ngei a, himahleh banghiam anek in mi ahihpukleh anepa a ding in gilou ahi. 21Na unau pukna ding ahihleh, sa neklouhte, uain dawnlouhte, thil bangpeuh hih louh ahoih ahi. 22Ginna na neih Pathian ma ah nangmah kia theih in nei mai in. Ama hoihsak lam a siam louh kitan lou tuh mihampha ahi. 23Himahleh ginglelpa'n anekleh, ginna a anek louh ziak in, siam louh atang hi; bangpeuh ginna lou a hih zaw khelhna ahi.
Currently Selected:
ROMETE 14: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
