ROMETE 10
10
Paul Thumna
1Unaute aw, ka lungtang deihlam leh amau a dia Pathian kiang a ka thumna pen zaw, hotdam ahong hihtheihna ding uh ahi. 2Pathian lam ah phatuam angai uh chih ka theihpih ahi, himahleh theihna ahihvak in zaw ahi kei uh. 3Pathian diktatna thei lou in, amau diktatna lamkhiak atum ua, Pathian diktatna ah akipelut sam kei uhi. 4Khrist bel agingta peuhmahte a ding in diktatna amuhtheihna ding un dan tawpna ahi.
Hotdamna Mi Tengteng A Ding Ahi
5Mosi in, “Dan a diktatna zui zaw, huai mi diktatna ziak in ahing ding,” chi in agelh hi. 6Ginna a diktatna in bel huchi in agen: “Na lungsim in, kua ahia van a kah ding? (huai lah ‘tunglam a kipan Khrist va pisuk ding,’ chihna ahi ngal a). 7Ahihkeileh, kua ahia khukthuk a hohsuk ding? Huai lah ‘misi lak a kipan Khrist pitou nawn ding,’ chihna ahi, chi ke'n,” chi in. 8Ahihleh, bang ahia agen? “Thu in ahon naih hi, na kam leh na lungtang ah a-om,” chi in agen ahi; (huai ahi ginna thu ka tangkoupih pen uh). 9Na kam a Jesu, Toupa ahi chih na gup a, misi lak a kipan Pathian in akaithou chih na lungtang a na gintakleh hotdam in na om ding, chih. 10Mi'n lungtang in agingta ua, diktatna amu uh; kam in agum ua, hotdamna leng amu nak uh ahi. 11Laisiangthou in, “Kuapeuh amah gingta azahlak kei ding,” achi hi. 12Juda leh Grik mite bangmah ah alamdang tuan kei ua, Toupa khat avek ua tung ah Toupa ahi a, amin lou peuhmahte tung ah hoihna ahau ngal a. 13“Kuapeuh Toupa min lou tuh hotdam in a-om ding,” chih ahi.
14Ahihleh, agintak louhpi uh bangchi in alou ding ua? Athu azak louhpi uh bangchi in agingta ding ua? Thuhilhmi om lou in bangchi in aza ding ua? 15Sawl ahih kei uleh bangchi in thu ahilh ding ua? “Thil hoih tanchin kipahhuai tunte khe kilawm hi na tel e!” chih gelh bang in. 16Himahleh tanchinhoih azui vek kei uh. Isai in, “Toupa, ka thugen uh kua'n ahia gingta?” achih bang in. 17Huchi in ginna tuh zakna ziak in ahong om a, zakna tuh Khrist thu kigen ziak in ahong om hi.
18Ahihleh abil un aza kei ua hia?
Za na ke, “Ahusa uh gam chih ah athang a,
athu uh kawlmong pha in athangsuakta,” chih ahi.
19Ahihleh,
Israel mite'n aza kei ua hia?
“Mipi dia gen thamlouhte ka hon hazasak dia;
nam pilloute zang in ka hon hehsak ding,” chi in
Mosi in agen masapen hi.
20Huan Isai in hangsantak in,
“Hon zongloute muh in ka omta;
hon kanloute ka kimusakta,” achi hi.
21Himahleh Israel mite thu ah, “Michihmoh leh selhatte a ding in sun nilouh in ka ban ka zak hi,” achi hi.
Currently Selected:
ROMETE 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
