KILAKNA 7
7
Israel Mi Nuaikhat Singli-le-sangli Chiamtehna
1Hiai thilte zoh in angel li, lei kil li a dinghte'n leitung a huih lite leitung a nung lou ding leh tuipi tung hiam, ahihkeileh sing tung hiam a nung lou ding in akhawlsak uhi. 2Huan amau chiamtehna a pan angel dang kuantou ka mu hi, Pathian hing chiamtehna anei ua; ama'n huai angel lite leitung leh tuipi hihse ding a piak a omte kiang ah aw ngaihtak a kikou in.
3“Pathian sikhate atal ua i chiamteh zoh ma in leitung leh tuipi leh singte hihse kei un,” achi hi.
4Huai chiamteh a omte lak a tampi, nuaikhat singli-le-sangli, Israel suan chiteng a kipan chiamteh zah ka za hi.
5Judah chi a kipan singkhat-le-sangnih chiamteh in a-om ua.
Reuben chi a kipan singkhat-le-sangnih;
Gad chi a kipan singkhat-le-sangnih;
6Asher chi a kipan singkhat-le-sangnih;
Naphtali chi a kipan singkhat-le-sangnih;
Manasseh chi a kipan singkhat-le-sangnih;
7Simeon chi a kipan singkhat-le-sangnih;
Levi chi a kipan singkhat-le-sangnih;
Issakar chi a kipan singkhat-le-sangnih;
8Zebulun chi a kipan singkhat-le-sangnih,
Joseph chi a kipan singkhat-le-sangnih,
Benjamin chi a kipan singkhat-le-sangnih.
Mipi Tampi Muhna
9Hiai thil teng zoh in ka etleh ngai in, mipi tampi kuamah sim seng louh, nam chih leh chi chih leh mi tengteng leh pau tengteng a kipan laltutphah leh Belamnou ma a dingh a, puanngou thupi a kizem a tumnah tawi ka mu a, 10huan amau aw ngaihtak in,
“Laltutphah a tu i Pathian leh
Belamnou kiang ah hotdamna,”
chi in akikou uhi.
11Angel tengteng laltutphah leh upate leh thil hing lite kimvel in adingh ua; laltutphah ma a bokkhup in, Pathian abia uhi:
12“Amen! Vualzawlnate,
leh thupinate, leh pilnate,
leh zahtakhuainate,
leh thilhihtheihnate, leh hatnate,
tangtawn tangtawn in i Pathian
kiang ah om hen,” achi uhi.
13Huan upate lak a khat in ka kiang ah, “Hiai puanngou thupi a kizemte kuate ahi ua, koi a kipan a hong pai ahi ua?” chi in ahon houpih a, 14ke'n akiang ah, “Ka Toupa, nang na thei hi,” ka chi hi. Huan ama'n ka kiang ah, “Hiai mite gimthuakna thupi a kipan hong paite ahi ua, apuan thupi uh sawp in, Belamnou sisan in ahihngou uhi.”
15“Huaiziak in Pathian laltutphah ma ah a-om ua, sun leh zan in
atempul uah amah asepsak uhi;
amah laltutphah tung a tupa'n amau tung ah
apuanin azak ding hi.
16Agil uh kial nawn ke'n chin,
adang uh tak nawn himhim ke'n teh,
amau ni in kang ke'n chin, satna in leng ahihgim kei ding hi.
17Belamnou huai laltutphah
lak a om abelamchingpa uh ahih ding ziak in,
amau hinna tuikhuk ah api ding a;
Pathian in amit ua kipan khitui anulhul ding,” achi hi.
Currently Selected:
KILAKNA 7: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
