KILAKNA 6
6
Chiamtehna Honna
1Belamnou in chiamtehna sagihte lak a khat aphel lai ka mu a, thil hing lite lak a khat aw in, vanpiging bang mai in, “Hong pai in,” achih ka za hi. 2Huan ka etleh ngai in, sakol kang leh atung a tupa thalpeu tawi ka mu a; amah kiang ah lallukhu piak in a-om a; amah vualzou a vualzou zou zel ding in ahong paikhia hi.
3Huan chiamtehna nihna aphel lai in, thil hing nihna in, “Hong pai in,” achih ka za hi. 4Sakol dang asan khat ahong paikhia a; huai tung a tupa kiang ah leitung a kipan lemna lakhe ding a thupiak ahi a, huchi a amau akithahtuahna ding un; amah kiang a namsau thupi piak ahita hi.
5Huan chiamtehna thumna aphel lai in thil hing thumna in, “Hong pai in,” achih ka za hi. Ka etleh ngai in, sakol vom ka mu hi; atung a tupa'n akhut in bukna atawi hi. 6Huan thil hing lite lai ah aw hileh kilawm in, “Huit buh tehna dan khat dinari khat, huan barli buh tehna dan thum in dinari khat, huan thau leh uain zaw hihse ke'n,” achih ka za hi.
7Chiamtehna lina aphel lai in, thil hing lina aw in, “Hong pai in,” achih ka za hi. 8Ka etleh ngai in, sakol daang ka mu hi; atung a tupa min Sihna ahi a, Misikhua toh akizui uhi. Namsau, kial leh sihna leh leitung a gam sahangte thah ding in amau kiang ah leitung seh li suah seh khat tung a thuneihna piak ahita hi.
9Chiamtehna ngana aphel lai in, Pathian thu ziak leh azuih uh theihsakna ziak a amau thah a omte maitam nuai ah ka mu hi. 10Amaute aw ngaihtak a kikou in, “Toupa Tungnungpen aw, siangthou leh dik bang tan ka sisan man uh amau leitung a tengte tung a thuk lou leh vaihawm lou ding na hia?” achi uhi. 11Amaute kiang ah puanngou thupi piak in a-om chiat ua; amau asikha hihpihte uleh a-unaute uh amau bang a thah a om dingte akim mateng uh na khawl tadih un chi a hilh in a-om uhi.
12Chiamtehna gukna aphel lai ka mu a, zinling thupitak a-om hi. Nisa tuh samul sai-ip puan bang in ahong vom a, kha leng apum in sisan bang in asan hi. 13Van aksite theipi kung huihpi in amutling a, ahutte apulh bang in leitung ah apulh uhi.
14Van laibuzial bang a kizial zou in suanmang in a-omta; tang sangte leh tuikulh gam teng amun ua pat suanmang in a-omta uhi. 15Huchi in leitung kumpipate, miliante, heutute leh ahat leh ahaute, salte leh sal lou teng leng tang sangte leh suangpi heng leh kokhukte ah akisel uhi. 16Tang sangte kiang leh suangpite kiang ah, “Hon delhlum unla, amah laltutphah tung a tupa leh Belamnou thangpaihna mai a kipan hon sel un; 17athangpaihna ni thupi hong tung hi; kua adingh zou dia?” achi uhi.
Currently Selected:
KILAKNA 6: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
