KILAKNA 5
5
Laibuzial Leh Belamnou
1Huai laltutphah tung a tupa khut taklam ah laibuzial, asunglam leh apolam kigelh chiamtehna sagih a kichiamteh ka mu hi. 2Angel hat khat in aw ngaihtak in, “Kua ahia laibuzial hong a, huai a chiamtehnate phel tham?” chi a puangkhia ka mu hi. 3Huan van tung hi in, leitung hiam, ahihkeileh lei nuai ah leng huai laibuzial hong thei hiam, ahihkeileh atung en thei kuamah a-om kei hi. 4Huchi in huai laibuzial hong a sim tak hiam, ahihkeileh atung en tak kuamah a-om louh ziak in ka kapkap hi. 5Huan upate lak a khat in ka kiang ah, “Kap ke'nla ngai in, humpinelkai, Judah nam a, David Zung in, laibuzial hong thei ding leh huai a chiamtehna sagihte phel thei ding in avualzouta,” achi hi.
6Huan huai laltutphah leh huai thil hing lite leh huai upate lai ah thahsa hileh kilawm, Belamnou, kii sagih leh mit sagih nei dingh ka mu a, huai mit sagihte Pathian kha sagih leitung tengteng a sawlkhiakte ahi uhi. 7Amah ahong pai a, laltutphah tung a tupa khut taklam a kipan laibuzial ala hi. 8Huai laibuzial alaktak in, thil hing lite leh upa sawmnih-le-lite, gosem khat chiat leh dangka-eng belhbute gimnamtui a dim chiat tawi in, Belamnou ma ah abokkhup ua, huaite gimnamtui misiangthoute thumna ahi. 9Huan la thak khat asa uhi:
“Laibuzial la a, huai a chiamtehnate phel tham na hi;
thah in na omta a,
chi chih leh pau chih leh michih leh nam chih a mite
Pathian a ding a na sisan a na lei tak ziak in.
10Ka Pathian kiang uah amau
lalgam leh siampute hi ding in na bawl a;
amaute'n leitung ah vai ahawm ding uh,” chi in.
11Huan ka etleh, laltutphah leh thil hingte leh upate kimvel ah, angel tampi aw ka za hi. Atamdan uh singkhat mun singkhat leh asang mun sang tampi ahi uh; 12Amau aw ngaihtak in:
“Thah a om,
Belamnou in hatnate,
leh hauhsaknate, leh thilhihtheihnate, leh zahtakhuainate, leh thupinate,
leh vualzawlnate mu tham na hi,”
chi in akikou uhi.
13Huan thilsiam khempeuh van a omte, leitung a omte, lei nuai a omte, tuipi tung a omte leh amau a thil omte tengteng in,
“Laltutphah tung a tupa leh
Belamnou kiang ah;
Vualzawlnate, zahtakhuainate,
thupinate leh vaihawmnate,
tangtawn tangtawn in om hen,”
achih uh ka za hi.
14Huan thil hing lite'n, “Amen!” achi ua, huan upate abokkhup ua, abia uhi.
Currently Selected:
KILAKNA 5: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
