KILAKNA 1
1
Thumasa
1Jesu Khrist kilakna, Pathian in asikhate kiang a lahkhiak ding a amah apiak, thil hong om pah mahmah dingte. Huan ama'n asikha Johan kiang ah a-angel sawl in chiamtehna in atheisak hi. 2Johan in Pathian thu leh Jesu Khrist tungtang a athil muhte tengteng atheisakta hi. 3Hiai genkholhna thute sim a, athute za a, huai a thil kigelhte zuite ahampha uhi; ahun anai tak ziak in.
Chibai Bukna Leh Phatna
4Johan in Asia gam a om saptuam sagihte kiang ah, amah omlel, omsa leh hong pai ngei dingpa a kipan leh alaltutphah ma a om, Kha sagihte a kipan in hehpihna leh khamuanna na kiang uah om hen; 5huan Jesu Khrist, theihpihpa ginom, misite lak a piang masapen leh leitung a kumpipate vaihawmpa a kipan. Eite hon it a i khelhna a kipan a asisan a hon sawppa amah kiang ngei ah; 6leh lalgam hi ding a hon bawl, Pathian leh a Pa kiang a siampute hi ding a hon bawl, amah kiang ah thupina leh vaihawmna, tangtawn tangtawn in om hen, Amen.
7Ngai in, meipi toh ahong pai hi;
mit teng in amah amu ding ua,
amah sunte'n leng;
leitung a nam tengteng in amah asuun ding uh, huai bang hi hen, Amen.
8“Kei Alpha leh Omega, abul leh atawp,” Toupa Pathian, omsa, omlel leh hong pai ding Bangkim hihthei in achi hi.
Khrist Muhna
9Kei, Johan, na unau uleh Jesu a om haksa thuakna leh lalgam leh kuhkalna a na tanpihpa uh, Pathian thu ziak leh Jesu theihpihna ziak in tuikulh gam Patmos kichi ah ka om hi. 10Toupa ni in Kha in ka om a, ka nunglam ah aw ngaihtak in pengkul ging bang mai ka za hi. 11Aw in, “Kei Alpha leh Omega, abul leh atawp ka hi, na thil muhte laibu ah gelh inla, Asia gam a saptuam sagih, Ephesa, Smarna, Pergamos, Thiatira, Sardis, Philadelphia leh Laodisia kiang ah khak in,” achih ka za hi.
12Huan kei hon houpih huai aw muh tum in ka kihei hi. Huchi a ka kiheileh dangka-eng khawnvak koihna sagih ka mu hi. 13Huai khawnvak koihna lai ah kuahiam Mihing Tapa toh kibang, akhepek tuampha puansilh, a-awm kimvel dangka-eng gakna a kigak ka mu hi. 14Alu leh asamte samul ngou leh vuk bang in angou a; amitte meikuang bang ahi. 15Akhepekte sumsan nawttet meipi a halsiangsa abang a, huan a-aw tui tampi ging bang ahi. 16Huan akhut taklam in aksi sagih atawi a; akam a kipan in namsau hiamtuah asuakkhia a; huan amel nisa asat san lai bang ahi.
17Huchi a amah ka muhtak in, misi bang in akhebul ah ka puk hi. Huan ama'n ka tung a akhut taklam koih in, “Lau ke'n, amasapen leh ananungpen ka hi. 18Huai ahingpa ka hi; ka sita a, ngai in tangtawn in ka hing hi, sihna leh misi kho chabi ka nei hi. 19Huaiziak in na thil muhsate, thil omlelte leh tunung a thil hong om dingte gelh in. 20Ka khut taklam a aksi sagih na muhte leh dangka-eng khawnvak koihna sagihte thuguk hiai ahi: Aksi sagihte saptuam sagihte angelte ahi ua; khawnvak koihna sagihte saptuam sagihte ahi uh,” achi hi.
Currently Selected:
KILAKNA 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
