JUDA 1
1
Chibai Bukna
1Juda, Jesu Khrist sikha leh Jakob unau in, Pa Pathian sehtuam siangthoute leh Jesu Khrist a kep leh sap a omte kiang ah: 2Zahngaihna, khamuanna leh itna na tung uah hihkhan in om hen.
Ginna Hutna
3Deihtakte aw, i kikop hotdamna thu na kiang ua gelh teitei ka tup lai in, misiangthoute kiang a ginna khatvei kepsak a om thu a, phatuamngaitak a humbit a pang ding a hon hanthawn ding in, na kiang ua laigelh kiphamoh ahi chih ka na thei hi. 4Mi kuate hiam aguk a hong lut a-om ua, nidanglai a pan hiai siam louh tanna dia sehte; huaite'n thangtatna dia Pathian hehpihna kaikawi in, Toupa Pathian omsun leh i Toupa Jesu Khrist akitheihmohbawl behlap uhi.
Puksante
5Huan bangkim khatvei in thei vek mah le uchin, Toupa'n Aigupta gam a kipan mite asuahtaksak a, huai nung a gingtaloute ahihmanthatdan, nou hon theihsak nawn ka ut hi. 6Huan angelte, amau sawltak hihna zui lou a, a-omna ngei uh paisante ni thupi vaihawmna a ding a mial nuai a tangtawn gawtna a hen kawm in asit hi. 7Sodom leh Gomorrah leh akiangnai ua khuate kingaihna a kipumpiak a, gitlouhna lek lua, amau mihinpihloute nangawn enlah a adelh tak ziak un, tangtawn mei a gawt a om dingte etsakna ding in suankhiak in a-om uhi.
8Himahleh huaite'n leng huchibang mah in, hiai mite'n leng, mang a kinga in sa ahihthanghuai ua, thuneihna anial ua, thupina neite agense nak uhi. 9Himahleh Mikael, angel tungnungpen in bawn, diabol toh kisel a, Mosi luang thu a akinak lai un atungthu gensak in amah agense ngam kei a, “Toupa'n hon tai zaw hen,” achi zawta hi. 10Huai mite'n bel thil atheih louh peuh uh agensia ua, ngaihtuahna nei lou ganhingte bang a theihsiamna pianpih aneihte un, huai lam pang ah amau akihihsia uhi. 11Atung uh agik hi! Kain lampi azui ua, punna delh in Balaam mohna ah atai ua, Korah thukalhna ah amangthangta uhi.
Puksante Tunggikna
12Hiaite ahi uh na itna ankuangluina ua hihmelhemtu leh lauhuai kiselte, amau mah kikhem, angsung ngaihtuah a, maingaltak a tathangte; meipi tuipai lou, huih mutlengte; phavang a singgah lou, nihvei sisa, azung toh bohkhiakte ahi uh. 13Tuipi kihot vonvon, amau zahlakna thankhia ahi ua; aksi vialvak, amau a dia tangtawn mial bing bikbek sitsakte ahi uh.
14Huan Enok, Adam a kipan akhang sagihna in hiai mite tungtang ah, “Ngai un, Toupa amisiangthou sangsawmte toh ahong pai, chi in ana genkhol hi. 15Mi tengteng tung a vaihawm ding leh Pathian limsakloute tengteng Pathian limsaklouhna leh Pathian limsakloute tung a asep tengteng uah leh Pathian limsak lou mikhialte'n atung a thu khauhtak agen tengteng ua siam louh tangsak ding in,” achi hi.
16Huaite phunhatte leh ngohhatte ahi ua, amau utna bang zel in a-om ua, akamte un leng ki-otsakna thu agen gawpgawp ua, punna deih ziak in mite maitangphat adeih uhi.
Vauna Leh Thuhilhna
17Himahleh deihtakte aw, nou zaw i Toupa Jesu Khrist sawltakte'n thu agenkholhte uh theigige un. 18“Hun nanung ah Pathian limsaklouhna lam a amau utna bang zel a om, nuihsan hatte ahong om ding uh,” chih na kiang ua agendante uh. 19Hiai sa mite ahi, Kha nei lou, pawl tuam bawlte. 20Himahleh deihtakte, nou zaw na ginna siangthou tung a noumau leh noumau kilemtou in; Kha Siangthou a thum in, 21tangtawn hinna neihsakna khop i Toupa Jesu Khrist zahngaihna ngak in, Pathian itna ah kikemhoih un.
22Khenkhatte, ginglah a omte hehpih unla; 23khenkhatte, mei a kipan in lakhe zok unla, hondam un; khenkhatte, asa thanghuai banna uh puansilh lam leng kih in, lau kawm in hehpih un.
Phatna Leh Thumna
24Tu in, na puklouhna ding ua hon veng thei leh athupina ma a nakpitak a nuamsa leh nin baang lou a noute hon koihtheipa, 25apil omsun Hondampa, Pathian tak kia kiang ah, i Toupa Jesu Khrist ziak in, hun himhim om ma leh tu leh tangtawn dong in pahtawina, leh thupina, leh vaihawmna, thuneihna omta hen, Amen.
Currently Selected:
JUDA 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
