MATTHAI 7

Midangte Vaihawmsak Thu A Thuhilhna

(Luk 6.7-38,41-42)

1“Vai hawmsak kei un, vai hawmsak na hihlouhna ding un. 2Na vai hawmsak mah bang un hawmsak in na om ding uh, na tehna ngei mah un hon tehsak nawn ding uh. 3Huan bangziak a, nangmah mit a singtum om ngaihtuah lou a, na unau mit a ninneng neuchik mu na hia? 4Bangchi in na unau kiang ah, na mit a kipan huai ninneng neuchik hon lakhesak ve, na chih theih ding? Ngai in, nangmah mit mahmah ah singtum a-om nilouh ngal a. 5Milepchiah, na mit a kipan singtum lakhe masa in; huchi in na unau mit a kipan ninneng neuchik lakkhiak ding kichiantak in na mu thei ding hi.

Thil Siangthou Nitsakna

6“Ui kiang ah thil siangthou pe kei un; vok ma ah na tuikepsuang uh pai kei un, achilse kha ding ua, huan kihei in nang ahon balzak kha ding uh.

Thum Ding A Thuhilhna

(Luk 11.9-13)

7“Ngen un, piak in na om ding uh; zong un, na mu ding uh; kiu un, hon honsak ding uh. 8Kuapeuh angen in angah a; kuapeuh azong in amu a; akiu peuhmah honsak in a-om ding hi. 9Ahihleh noute kuapeuh na tapa un tanghou ngen taleh, kua'n suang pe ding na hi ua? 10Ahihkeileh ngasa ngen taleh, kua'n gul pe ding na hi ua? 11Huchi hileh nou migilou in bawn, na tate uh thil hoih piakdan na theih un, na Pa uh van a om in angente thil hoih pe zaw sem lou ding hia?

Chindan Hoih

12“Huaiziak in mi'n na tung ua thil bangpeuh hih ding a na deih bang uh, mi tung ah leng hih sam un; huai Dan leh zawlneite thu ahi him hi.

Kong Kochik A Lutna

(Luk 13.24)

13“Kong kochik ah lut un; manthatna a paina kong aza a, alampi leng alian a, huai a lut tam leng atam mahmah uhi. 14Hinna a paina kong akochik a, alampi aneu a, atawnte tawmchik ahi uh.

Sing Leh Agah

(Luk 6.43-44)

15“Zawlnei takloute lak ah pilvang un, amaute belam vun silh in na kiang uah ahong pai nak ua, asunglam uh nge duhgawl pipi ahi uh. 16Amaute agah uah na thei mai ding uh. Khaulingnei gui ah grep gah alou ngei ua hia? Lenling ah theipi a lou ngei ua hia? 17Huchi mah bang in sing hoih peuhmah agah ahoih a; sing sia agah ase nak. 18Sing hoih agah ase thei kei, sing sia agah ahoih thei sam kei hi. 19Sing chih gah hoih lou aphuk ua, mei ah apai uhi. 20Huaiziak in amaute agah uah na thei mai ding uhi.

Toupa Theih Mite

21“Toupa, Toupa, hon chi na peuh van-gam ah alut kei ding uh; ka Pa van a om deihlam hihte alut ding uhi. 22Huai ni chiang in mi tampi'n, Toupa, na min in thute ka gen ua, na min in dawite ka delhkhia ua, na min in thillamdang tampi ka hih zel uh hilou hiam? achi ding uh. 23Huai hun chiang in, ‘Nou thil gilou hihte aw, ka hon thei ngei kei, ka kiang a kipan paimang un, chi in amaute ka hilh ding hi.’

Inn Lamdan Nihte

(Luk 6.47-49)

24“Huchi in michih hiai ka thu za a, zui peuhmah, mipil suangpi tung a inn lammi toh ka tehpih ding hi. 25Vuahpi hong zu in tui ahong khang a, huih ahong nung a, huai inn hon mut zialzial a; himahleh achim kei; suangpi tung a lepkip ahih ziak in. 26Huan michih, hiai ka thu za a zom lou peuhmah, mihai piaunel tung a inn lammi toh ka teh ding hi. 27Vuah hong zu in tui ahong khang a, huih ahong nung a, huai inn hon mut zialzial a; achimta a, huai inn anakchip ngel hi,” achi hi.

28Huan hichi ahong hi a, Jesu'n huai thu agen zoh in, mipi'n athuhilh lamdang asa mahmah uh; 29laigelhmite bang lou a, thuneihna neitak a amaute thu ahilh ziak in.

Currently Selected:

MATTHAI 7: PAITBSI

Highlight

Copy