MATTHAI 8

Phak Hihdamna

(Mar 1.40-45; Luk 5.12-16)

1Huan tang a kipan a ahong paisuk nung in mipi tampitak in amah azuita uhi. 2Ngai in, akiang ah phak khat ahong pai a, “Toupa, na utleh na hon hihsiangthou thei hi,” chi in abia hi. 3Jesu'n sawk in akhoih a, “Ka ut hi, na siangthouta in,” achi hi. Thakhat in phak hong siangthou pah hi. 4Jesu'n akiang ah, “Kuamah hilh lou ding in pilvang in, himahleh siampu kiang ah va kilak inla, Mosi in thilpiak ding achihte lan in; amau hon theihchetna ding un,” achi hi.

Sepaih Zaheutu Sikha Hihdamna

(Luk 7.1-10)

5Kapernaum a lut in, akiang ah sepaih zaheutu ahong pai hi. 6“Toupa, inn ah ka sikha alum maimah a, nakpitak a hihnat in a-om,” chi in ana ngen hi.

7Huan ama'n akiang ah, “Ka hong pai dia, ka hihdam ding,” achi hi.

8Sepaih zaheutu'n, “Toupa, ka insung na lutna tak ahi kei, thu kia gen lechin ka sikha adam mai ding. 9Kei leng mi thunuai a om ka hi a, ka nuai ah sepaihte a-om ua, ‘nang pai in,’ ka chihleh apai zel a; midang kiang ah, ‘nang hong pai in,’ ka chihleh ahong pai zel; ka sikha kiang ah leng, ‘hiai hih in’ ka chihleh ahih zel,” chi in adawng hi.

10Huan Jesu'n hiai thu azak in lamdang asa a, amah zuite kiang ah, “Chihtaktak in, ka hon hilh ahi, Israelte lak ah hichi tel a ginna thupi ka mu kei hi. 11K'on hilh ahi, suahlam leh tumlam a pan mi tampi ahong pai ding ua, van-gam ah Abraham, Isak leh Jakob kiang ah atu ding uh. 12Gam tate zaw polam mial ah paihkhiak in a-om ding uh; huai ah kah leh hagawi a-om ding,” achi hi. 13Huan Jesu'n sepaih zaheutu kiang ah, “Paita in, na gin bang in na tung ah tung hen,” achi a, huchi in sikha adamta hi.

Peter Sungnu Leh Mi Tampi Hihdamna

(Mar 1.29-34; Luk 4.38-41)

14Peter inn ah Jesu alut a, azi nu khosik a lum amu hi. 15Akhut akhoihsak a, akhosik adaita; athou a, a-nna asepsakta hi.

16Huan nitaklam ahong hih in akiang ah dawimatte tampi ahon pi ua; thu in dawite adelhkhia a, damlou tengteng ahihdam hi. 17Zawlnei Isai in, “Amah ngei in i hatlouhnate ala a, i natnate apua,” chi a agen hong tangtun theihna ding in.

Nungzui Dingte Theihna

(Luk 9.57-62)

18Jesu'n akimvel a mipi tampitak amuh in, gal khat lam a pai ding in thu apia hi. 19Laigelhmi khat ahong pai a, akiang ah, “Heutupa, na paina peuh ah ka hon zui ding,” achi hi.

20Jesu'n akiang ah, “Sehalte'n kua anei ua, tungleng vasate'n leng bu anei uh, himahleh Mihing Tapa in zaw lungakna ding mun anei kei,” achi hi. 21Huan anungzuite lak a midang khat in, “Toupa, ka pa hon vuisak phot in,” achi hi. 22Himahleh ama'n akiang ah, “Hon zui in; misi in amau misi kivui uhen,” achi hi.

Jesu'n Huihpi Daisak

(Mar 4.35-41; Luk 8.22-25)

23Huan long sung ah alut a, anungzuite'n azui uhi. 24Ngai in, tuipi ah huihpi hattak ahong nung a, huchi in tuikihot in long atumtou a; himahleh amah a-ihmu hi. 25Huan akiang a hong pai in aphawng ua, “Toupa, hon hondam in, mangthang ding ka kei uhiam,” achi uhi.

26Ama'n akiang uah, “Nou ginglahte aw, bangziak a lau na hi ua?” achi hi. Huchi in athou a, huih leh tuipi atai a; huan ahong dai sipsipta hi.

27Huan mite'n lamdang asa mahmah uhi. “Hiai mi bangchidan ahia, huih leh tuipi nangawn in athu aman uh?” achi uhi.

Dawimat Mi Nih Jesu Hihdamna

(Mar 5.1-20; Luk 8.26-39)

28Huan gal khat lam Gadaren mite gam atun in dawimat nih, han a kipan hong pawt in, ahon tuak ua; ahang mahmah ua, huchi in huai lampi ah kuamah apai thei kei uhi. 29Ngai in, amau, “Pathian Tapa kou leh nang bang ahia i kizolhna om? Hunchiam tun ma a koute hon gawt ding a hong pai na hi maw?” chi in akikou uhi.

30Huan a-omna ua kipan gamla khop ah vokhon tampi agamta uhi. 31Huan dawite'n, “N'on delhkhiak aleh huai a vokhonte sung ah hon lutsak in,” chi in akiang ah nakpi in angen uhi.

32Ama'n akiang uah, “Pai un,” achi a, huchi in ahong pawtkhia ua, vok sung ah alut ua; ngai in, vokhon tengteng tui gei ken lak ah ataisuk ua, tuipi a tailut in, tui ah amangthangta uhi.

33Huan ganvulte atai ua, khua ah apai ua, dawimatte tung a thil hong tungte bangkim ahilhta uhi. 34Ngai in, akhua in Jesu mu ding in ahong pawt ua; amah amuhtak un agam ua kipan a pawtkhe ding in nakpi in angen uhi.

Currently Selected:

MATTHAI 8: PAITBSI

Highlight

Copy