MATTHAI 2

Mipilte' Vehna

1Huan kumpipa Herod vaihawm lai a Judia gam a, Bethlehem a Jesu ahong pian lai in, ngai in, suahlam a kipan Jerusalem ah mipilte ahong pai uhi. 2“Koi ah ahia Judate' Kumpipa ahong pian? Suahlam ah ama aksi ka mu ua, amah be dia hong pai ka hi uh,” achi uhi. 3Kumpipa Herod in huai azak phet in alungzing a, Jerusalem tengteng leng alung uh azing sam hi. 4Huchi in siampu liante leh mite laigelhmi tengteng asamkhawm a, Khrist pianna ding thu adongta hi.

5Huan amau akiang ah, “Judia gam a Bethlehem khua ah zawlnei in hichi in agelh akei hiam:

6“Nang, Judia gam a Bethlehem aw, Judia khopite lak ah na neupen kei hial,

na sung a kipan ukpa hong suak ding ahi ngal a, ka mi Israelte vengpa ding,” chih, achi uhi.

7Huai nung in Herod in aguk in mipilte asam a, ngenteltak in aksi kilat lai adongkheta hi. 8Huan amau Bethlehem ah apaisak a, “Paita unla, naungek thu ngenteltak in dongkhia un, ke'n leng amah ka hong biak theih samna ding in, na muh chiang un hong hilh un,” achi hi.

9Huan kumpipa thu azak un apaita ua, ngai in suahlam a aksi amuh uh naungek omna tung zawn atun a akhawl masiah ama uah apai zel hi. 10Aksi amuh un, akipak lo mahmah uhi. 11Inn sung ah ava lut ua, anu Mari kiang a naungek om amuh un, abokkhup ua, abia uhi. Agoubawm uh ahong ua, akiang ah kipahna dangka-eng, begaw leh murrah alan uhi.

12Herod kiang a kik nawn lou ding in amang ua vauhilh a a-om ziak un, amau kholam, lam tuam ah apaita uhi.

Aigupta A Jesu Khrist Taipihna

(Hos 11.1)

13Huan apai nung un, ngai in, Joseph kiang ah amang in Toupa angel akilak a, “Thou inla, naungek leh anu pi inla, Aigupta gam ah taipih in, ka hon hilh nawn masiah huai ah om gige in; Herod in naungek hihsiat dia zong ding ahih ziak in,” achi hi. 14Huchi in athou a, azanzan in naungek leh anu api a, Aigupta gam ah apaita hi. 15Herod sih mateng huai ah a-om gige hi. Toupa'n zawlnei kam a, “Ka tapa Aigupta gam a pan ka samkhia,” chi a agen ahong tuntheihna ding ahi.

Herod In Naupangte Athahna

16Huchih lai in Herod in mipilte' khem a om ahih lam akitheihtak in aheh mahmah a, mi asawl a, ahun laitak thu ngenteltak a mipilte adotkhiak bang in, Bethlehem khua leh akim tengteng a pasal naupang kum nih chiang nuailam avek un athatta hi. 17Huchih lai in zawlnei Jeremiah in:

18“Ramah ah husa aza uh,

suunna, kah thawm, misi ngai a mau vengvungte,

Rakil in atate akah a, a-om nawn louh ziak un akhamuan theih kei,”

chi a ana gen ahong tungta hi.

Aigupta A Pan Kikna

19Himahleh Herod asih nung in, ngai in, Aigupta gam a Joseph kiang ah Toupa Angel amang in akilak hi. 20“Thou inla, naungek leh anu pi inla, Israel gam ah pai in; naungek thah tumte asih tak ziak un,” achi hi. 21Huchi in athou a, naungek leh anu api a, Israel gam ah apaita uhi.

22Himahleh Arkelaus in apa Herod sik in Judia gam ah vai ahawm chih azak in, huai lam a pai alau a; amang a vauhilh a a-om ziak in Galili gam ah apai a, 23Nazaret kichi khua khat ah atengta hi. “Amah zaw Nazaret mi achi ding uh,” chi a zawlneite na gen ahong tuntheihna ding in.

Currently Selected:

MATTHAI 2: PAITBSI

Highlight

Copy