MATTHAI 26

Jesu Thah Sawmna

(Mar 14.1-2; Luk 22.1-2; Joh 11.46-53)

1Huan hichi ahong hi a, Jesu'n huai thu tengteng agen khit in, anungzuite kiang ah, 2“Ni nih nung chiang in Paikan Ankuangluina ahong om ding chih na thei ua, Mihing Tapa kilhden ding in amansak ding uh,” achi hi.

3Huai lai in siampu lianpen Kaiapha achih uh huangsung ah siampu liante leh vantang upate akikhawm uhi. 4Jesu khem a mat a, ahihlup theihna ding un akikum uhi. 5Himahleh, “Ankuanglui ni in hi keileh, huchi lou in zaw vantang lak ah buaina ahong piang kha ding,” achi uhi.

Bethani Khua A Jesu Thaunilhna

(Mar 14.3-9; Joh 12.1-8)

6Bethani khua a, miphak Simon inn a Jesu a-om lai in, 7numei khat alabaster bawm a thau gimlim mantam tawi in, akiang ah ahong pai a, an a-um lai in alu ah asung hi. 8Himahleh nungzuite'n huai amuh un aheh ua, “Bangziak a hichibang a hihmangthang mawkmawk ahia? 9Hiai thau mantam tampi a zuak a, mizawngte kiang a piak theih ahi ngal a,” achi uhi.

10Jesu'n huai atheih in, akiang uah, “Bangziak a numei hihbuai na hi ua? Ka tung ah thil hoihtak ahih ahi. 11Mizawngte tangtawn a na kiang ua om ahi kei hiam, kei bel tangtawn a na kiang ua om ka hi kei hi. 12Hiai thau gimlim ka sa a asun, vui ding a hon bawl ding in ahih ahi. 13Chihtaktak in ka hon hilh ahi, khovel tengteng ah koi ah leng hiai tanchinhoih agenna peuh uah hiai numei thilhih leng amah theihgigena ding in agen zel ding uh,” achi hi.

Judas Iskariot Muanhuai Louhna

(Mar 14.10,11; Luk 22.3-6)

14Huai nung in sawm-le-nihte lak a mi khat, Judas Iskariot achih uh, siampu liante kiang ah ahoh a; 15“Amah hon mansak leng, bang na hon pe ding ua?” achi hi. Huchi in dangka sawmthum abuksakta uhi. 16Huai nung siah zuausan a matsakna ding hunlem azongta hi.

Paikan Ankuang Umna

(Mar 14.12-21; Luk 22.7-13; 22.21-23; Joh 13.1-30)

17Huan Tanghou Silngou Soh Louh ani masapen in Jesu kiang ah nungzuite ahong ua, “Paikan Ankuanglui nekna ding koi lai ah hon bawlsak le ung na ut a?” achi uhi. 18Ama'n, “Khopi ah kuahiam kiang ah hoh unla, akiang ah, ‘Sinsakpa'n, ka hun anaita a; na inn ah nungzuite toh Paikan Ankuang ka um ding uh e’ achi, va chi un,” achi hi. 19Jesu'n akiang ua achih bang in nungzuite'n ahih ua; Paikan Ankuang abawlta uhi.

20Huai ni nitaklam in, nungzui sawm-le-nihte toh an a-um uhi. 21An anek lai un, ama'n, “Chihtaktak in ka hon hilh ahi, na lak ua mi khat in kei ahon mansak ding,” achi hi. 22Huchi in alungkham mahmah ua, akiang ah, “Toupa, kei ka hi maw?” achi chiat uhi. 23Ama'n, “Ankuang hon sawkpihpa ngei in kei hon zuausan in hon mansak ding achi hi. 24Mihing Tapa tanchin agelh bang un apai ding hi. Himahleh, Mihing Tapa mansak dingpa tung agik hi; huai mipa zaw piang keileh amah a ding in ahoihzaw ding,” chi in adawng hi. 25Huan amansak dingpa Judas in adong a, “Heutupa, keimah ka hi maw?” achi hi. Ama'n akiang ah, “Hi e,” achi hi.

Nitak Ankuang Nanung

(Mar 14.10,11; Luk 22.14-20; 1 Kor 11.23-25)

26Huan an anek lai un Jesu'n tanghou ala a, avualzawl khit in, abalkham a; nungzuite kiang ah apia a, “La unla, ne un; hiai ka pumpi ahi,” achi hi.

27Huai zoh in nou leng la a, kipahthu agen khit in, akiang uah apia a, “Na vek un dawn un; 28hiai ka sisan a thukhun thak, khelhnate ngaihdamna dia mi tampi a dia pawt ding ahi. 29Himahleh ka hon hilh ahi, ka Pa gam a noute toh athak ka dawn ni atun masiah tuban grepgui gahtui ka dawn nawnta kei ding,” achi hi. 30Huan la asak zoh un apawt ua, Olive tang ah apaita uhi.

Jesu'n Nungzuite Taihsan Ding Thu Agenkhol

(Mar 14.27-31; Luk 22.31-34; Joh 13.36-38)

31Jesu'n amau kiang ah, “Tuzan chiang in na vek un ka tungthu a lungkia in na hon taisan vek ding uh;

‘Belamchingpa ka zep ding a,

belamhonte adalh ding uh’ chih gelh bang in.

32“Himahleh ka thohnawn nung in Galili gam ah na ma uah ka pai ding,” achi hi. 33Peter in akiang ah, “Avek un na tungthu ah lungkia in om mah le uh kei zaw lungkia in ka om kei hial ding,” chi in adawng hi. 34Jesu'n akiang ah, “Chihtaktak in ka hon hilh ahi, tuzan in ak khuan ma in, nang thumvei na hon kitheihmohbawl ding,” achi hi. 35Peter in akiang ah, “Na sihna a leng si sam ding himah leng ka hon kitheihmohbawl kei hial ding,” achi a. Huchibang mah in nungzuite'n leng achi chiat uhi.

Jesu, Gethsemani Huan Ah

(Mar 14.32-42; Luk 22.39-46)

36Huai zoh in amau toh mun khat Gethsemani achih uh atung ua; anungzuite kiang ah, “Pam a ka va thum kal in hiai ah na tu un,” achi hi. 37Peter leh Zebedai tapate nih api a, alungkham in ahong mangbang mahmahta hi. 38Huan akiang uah, “Ka kha alungkham mahmah a, sihna khop hial ahi; hiai ah om unla, hon venpih un,” achi hi.

39Neukha in malam ah ava pai zek a, bokkhup in, “Ka Pa aw, ahihtheihleh hiai nou in hon pel mahmah hen; himahleh kei thu hilou in, nang thuthu hi zaw hen,” chi in athum hi.

40Huan nungzuite kiang ah ahong pai a, amaute ihmu in ahong mu a, Peter kiang ah, “Nou dakkal khat lel leng hon hahpih zou lou na hi uh maw? 41Khemna a na lutlouhna ding un kiging gige in thum un; kha in zaw angap a, sa bel ahat kei,” achi hi.

42Nihveina ah ava pai a, athum nawn a, “Ka Pa aw, ka dawn louh a hiai nou in ahon pelh theih keileh nangmah thuthu hi hen,” achi hi. 43Ahong pai nawn a, amaute ihmu in ahong mu nawn hi; a-ihmut uh asuah mahmah ziak in.

44Huan apaisan nawn a, athumveina ah agen ngei gen in athum nawn hi. 45Huai khit in nungzuite kiang ah ahong pai nawn a, akiang uah, “Na ihmu lailai uh maw, na tawlnga lailai uh maw? Ngai dih uh, ahun ahong tungta, mikhialte khut ah Mihing Tapa khot khit ahita. 46Thou unla, pai ni, en dih uh, hon mansak dingpa ahong naita,” achi hi.

Jesu Matna

(Mar 14.43-50; Luk 22.47-53; Joh 18.3-12)

47Huan agen lai mah in Judas, sawm-le-nihte lak a mi khat, siampu liante leh laigelhmite leh upate kiang a kipan mipi tampitak leh namsau leh khetbukte toh ahong tung hi. 48Amansak ding pa'n chiamtehna ding ahilhkhol sipsip a, “Ka tawp penpen amah na man ding uh,” chi in.

49Huchi in Jesu ava naih a, “Chibai, Heutupa,” chi in atawp hi.

50Jesu'n akiang ah, “Lawm, na hong nangawn hih in,” achi hi. Huaitak in, Jesu alen ua, amanta uh. 51Huan ngai dih, Jesu ompihte lak a khat in akhut zankhia in anamsau adokkhia a, siampu lianpen sikha aban a, abil abankhiaksak hi. 52Himahleh Jesu'n akiang ah, “Na namsau akoihna ah koih nawn in; namsau pan peuhmah namsau mah a asih ding ziak in. 53Ka Pa ngen leng angel sangguk mun sawm-le-nih hon sawl pah ding ahi; ngen thei lou in na hon ngaihtuah ua hia? 54Himahleh, ngen leng bangchi in ahia Laisiangthou in hichibang a hong om ding achihte atangtun theih ding?” achi hi.

55Huai laitak in Jesu'n mipite kiang ah, “Namsaute, khetbukte tawi in suamhat man ding bang in keimah man ding a hong pawt na hi uh maw? Tempul ah niteng in thuhilh in ka tu a, na hon man ngal kei uhi. 56Himahleh zawlnei Laisiangthou thute atunkimna dia hiai tengteng hong tungta ei ve,” achi hi. Huchi in nungzui tengteng in amah anusia ua, ataimangta uhi.

Siampu Lianpen Mai A Jesu Dinna

(Mar 14.53-65; Luk 22.54,55,63-67; Joh 18.13-14,19-24)

57Jesu mante'n siampu lianpen Kaiapha inn a, laigelhmite leh upate omkhawmna ah amah apita uhi. 58Himahleh Peter in gamlatak ah siampu lianpen huangsung tan in amah zui in ava lut a, atawpna tan thei ding in sikhate lak ah ava tu hi. 59Amah ahihlup theihna ding un siampu liante leh vaihawmte tengteng in Jesu hekna ding azong uhi. 60Theihpih taklou tampi toh hong pai mah le uh ngohna ding bangmah amu thei kei uhi. Aden chiang in mi nih ahong pai ua, 61hiai mipa'n, “Tempul hihsia a, ni thum sung a lam nawn thei ka hi, achi,” achi uhi.

62Huchi in siampu lianpen adingtou a, akiang ah, “Bangmah adawng lou ding maw? Hiaite hon hekna bangchidan ahia?” achi hi. 63Jesu bel adai dide hi. Huan siampu lianpen in akiang ah, “Pathian hing min in ka hon ngen ahi, Khrist, Pathian Tapa na hi hia? Hon hilh in,” achi hi.

64Jesu'n akiang ah, “Hi e, himahleh, ka hon hilh ahi, tunung chiang in Mihing Tapa thilhihtheihna taklam a tu a, van meipi tung a hong pai na mu ding uh,” achi hi.

65Huan siampu lianpen in apuansilh abotkek a, “Pathian agenseta e! Theihpih dang bang i kiphamoh nawn dia? Ngai dih uh, Pathian agensiatdan tu in na zata uh. Bangchi na sa ua?” achi hi. 66Amaute'n, “Si tak ahi,” chi in adawng uhi. 67Huan amai ah chil aphih ua, atum ua; khenkhat in akhutpek ua beng in, 68“Nang Khrist, kua ahia hon tum hon hilh in?” achi uhi.

Peter In Jesu Kitheihmohbawl

(Mar 14.66-72; Luk 22.56-62; Joh 18.15-18,25-27)

69Vaihawmna huangsung polam ah Peter atu a; nungaknou khat akiang ah ahong pai a, “Nang leng Galili gam a mi, Jesu kiang a om na hi ve,” achi hi. 70Ama'n bel, “Na thugen ka thei kei,” chi in avek ua ma ah akitheihmohbawl hi. 71Huan inlim a apawttak in nungak dang in amah amu a, huai a omte kiang ah, “Hiai mi Nazaret Jesu kiang a ompa ahi,” achi hi. 72Peter kichiam in, “Huai mipa ka thei kha kei,” chi in kitheihmohbawl nawn hi. 73Huan sawt lou nung in, akiang a dinghte'n Peter kiang ah, “Nang leng alak ua mi na hi vo oi, na pau ah akithei,” achi uhi.

74Ama'n bel huai mipa ka thei kha kei, chi in hamsia kiloh in akichiamta hi. Huchi in ak akhuang pah ngal hi. 75Huan Peter in, “Jesu'n ak akhuan ma in nang thumvei na hon kitheihmohbawl ding,” chi a akiang a athugen aphawkkhia a, apawtkhia a, akap huphup hi.

Currently Selected:

MATTHAI 26: PAITBSI

Highlight

Copy