MATTHAI 25

Nungak Siangthou Sawm Gentehna

1“Huai hun chiang in van-gam tuh nungak siangthou sawm, akhawnvak uh tawi a mouneipa dawn ding a pawtte toh teh ahi ding hi. 2Huchi in alak ua nga ahai ua, nga apil uhi. 3Ahaite'n akhawnvak uh atawi ua, atui atawi kei uhi. 4Apilte'n bel akhawnvakte uh tawi in, a-um ah atui leng atawi uhi. 5Huan mouneipa hong zekai ziak in avek un alusu ua, ana ihmuta uhi.

6“Ngai dih uh! Zan lai in, ‘Mouneipa ahong e; adawn ding in hong pawt un,’ chi in kikou ging ahong omta hi. 7Huaitak in nungak siangthoute athou vek ua, akhawnvakte uh ahahsiang uhi. 8Huan ahaite'n apilte kiang ah, ‘Na khawnvaktui uh hon pe sam un; ka khawnvak uh mit ding in akisa,’ achi uhi. 9Himahleh, apilte'n, ‘Kou leh nou a ding in akiching kei ding; azuakte kiang ah pai unla, va lei zaw un,’ chi in adawng uhi. 10Huan lei ding a apaimang kal un mouneipa ahong tungta a; huchi in amansate amah toh kitenna ankuang um ding in alut ua; huan, kongkhak akhakta uh.

11“Huai nung in nungak siangthou dangte leng ahong tung ua, ‘Toupa, toupa, hon hon in,’ achi uhi. 12Himahleh ama'n, ‘Chihtaktak in ka hon hilh ahi, ka hon thei ngei kei,’ chi in adawng hi.

13“Huaiziak in kiging un, ani leh ahun na theih louh ziak un.

Talent Gentehna Thu

14“Van lalgam tuh mi gamdang a pai dia kisa, asikhate sam a, akiang ua asumte kemsak bang ahi. 15Sikha khat kiang ah talent nga apia a, sikha dang kiang ah talent nih apia a, sikha dang kiang ah talent khat apia a; ahihtheih hundan ding chiat ua pia in apaita hi. 16Talent nga mupa huai in ava sumsin pah a, talent nga dang amukheta hi. 17Huchi mah bang in talent nih mupa'n leng talent nih dang amukhia hi. 18Talent khat mupa bel ava kuan a, lei atou a, apu dangka aphumgu zawta hi.

19“Hun sawtpi nung in huai sikhate pu amau toh asum tungtang hihfel ding in ahong pai hi. 20Talent nga mupa ahong pai a, talent nga dang ahon tawi a, ‘Pu, nang talent nga na hon kemsak a; en dih, talent nga dang ka mukhia,’ achi hi. 21Apu'n akiang ah, ‘Sikha hoih leh muanhuai, na hihhoih hi, tawmchik tung ah na muanhuai a, tampi tung ah ka hon omsak ding; na pu kipahna ah lut in,’ achi hi.

22“Talent nih mupa leng ahong pai a, ‘Pu, nang talent nih na hon kemsak a; en dih, talent nih dang ka mukhia,’ achi hi. 23Apu'n akiang ah, ‘Sikha hoih leh muanhuai, na hihhoih e, tawmchik tung ah na muanhuai a, tampi tung ah ka hon omsak ding; na pu kipahna ah lut in,’ achi hi.

24“Huan talent khat mupa leng ahong pai a, ‘Pu, mi chihhakpi na hi chih ka hon thei a; na tuhlouhna ah leng na at a, na thehlouhna ah leng na khawm hi. 25Huaiziak in ka lau a, ka va pai a, lei ah na talent ka selgu a; en in, nang a ngei na mu nawn,’ achi hi.

26“Apu'n akiang ah, ‘Sikha gilou leh zongzaw, ka tuhlouhna ah ka at a, ka thehlouhna ah leng ka khawm chih na thei maw? 27Huchi ahih ngalleh sumsinte kiang a ka dangka na koih ding hi a, huchi a ka hong pai a kei a apung toh ka muh nawn ding ahi. 28Huaiziak in atalent khat laksak unla, talent sawm neipa kiang ah pia un. 29Kuapeuh anei piak behlap ahi ding a, ahong hau ding; kuapeuh anei lou aneihsun nangawn laksak ahi ding. 30Huan sikha phatuam lou polam mial ah paikhia un, huai ah kah leh hagawi a-om ding,’ chi in adawng hi.

Vaihawmna Ni

31“Himahleh, Mihing Tapa, a-angelte tengteng toh athupina a kivan a ahong pai hun chiang in, athupina laltutphah ah atu ding hi. 32Ama ah nam chih akikhawm ding ua; belamchingpa'n kel lak a pan belamte akhenkhia bang in amaute akhenkhe ding hi. 33Belamte ataklam ah akoih ding a, aveilam ah kelte akoih ding hi. 34Huai hun chiang in Kumpipa'n ataklam a mite kiang ah, ‘Ka Pa deihsakte aw, hong pai un, khovel siamchil a pan nou a dia gam bawlsa luah un. 35Ka gil akial in, nek ding na hon pia ua; ka dang atak in, dawn ding na hon pia uh; mikhual ka hih in na hon zintun ua; 36vuaktang ka hih in, puan na hon silhsak uh; ka chi anat a, ka kiang a na hong ziak un,’ achi ding hi.

37“Huai hun chiang in, midiktatte'n, ‘Toupa, chik in ahia gilkial a ka hon muh ua nek ding ka hon piak uh? Dangtak a ka hon muh ua, dawn ding ka hon piak uh? 38Chik in ahia mikhual a ka hon muh ua, ka hon zintun ua, vuaktang a ka hon muh ua, puan ka hon silhsak uh? 39Chik in ahia china in hiam suangkul ah hiam ka hon muh ua, na kiang a ka hong uh?’ chi in adong ding uh. 40Kumpipa'n amaute kiang ah, ‘Chihtaktak in ka hon hilh ahi, hiai ka unau neupente lak a mi khat tung a na hih uh ka tung a hih na hi uh,’ chi in adawng ding hi.

41“Huai khit in, aveilam a mite kiang ah leng, ‘Nou hamse thuakte aw, tangtawn mei diabol leh asawltakte dia mun bawl ah hon paimangsan un; 42Ka gil akial in, nek ding na hon pe kei ua; ka dang atak in, dawn ding na hon pe kei ua; 43mikhual ka hih in, na hon zintun kei uh; vuaktang ka hih in, puan na hon silhsak kei ua; china leh suangkul a ka om a, na hon veh louh ziak un,’ achi ding hi.

44“Huai hun chiang in amau leng, ‘Toupa, chik in ahia gilkial hiam, vuaktang hiam, china hiam, suangkul ah hiam ka hon muh ua, na nna ka hon sepsak louh uh?’ chi in adong ding uh. 45Ama'n akiang uah, ‘Chihtaktak in ka hon hilh ahi, hiai mineupente lak a mi khat tung a na hih louh uh ka tung a hih lou na hi uh’ chi in adawng ding hi. 46Huan huaite tangtawn gawtna ah apai ding ua; midiktatte bel tangtawn hinna ah apai ding uhi,” achi hi.

Currently Selected:

MATTHAI 25: PAITBSI

Highlight

Copy