MATTHAI 24

Tempul Siatna Leh Hun Tawp Genkholhna

(Mar 13.1-2; Luk 21.5-6)

1Tempul a kipan Jesu pawtkhia a, apai lai in, anungzuite tempul ensak ding in akiang ah hong pai uhi. 2Himahleh ama'n akiang uah, “Hiai tengteng na mu uh maw? Chihtaktak in ka hon hilh ahi, hihchip louh a suang kichiang hiai ah a-om kei ding,” chi in adawng hi.

Buaina Leh Gawtnate

(Mar 13.3-13; Luk 21.5-6)

3Olive tang a atut lai in nungzuite amau kia in akiang ah ahong ua, “Huaite chikchiang in ahong om dia? Na hong pai nawnna leh khovel tawpna ding chiamtehna bang ahi dia? hon hilh in,” achi uhi.

4Jesu'n amau adawng a, “Kuamah hon khemzohlouhna ding in pilvang un. 5Mi tampi'n, ‘Khrist ka hi, chi in keimah min lou in ahong pai ding uh; mi tampi akhemzoh ding ziak un.’ 6Huan kidou thu leh kidou thuthang na za ding ua; na mangbatlouhna ding un pilvang un; huaite ahong om ding him ahi; himahleh tawpna zaw ahi nai tadih kei ding hi. 7Nam tuam leh nam tuam akidou ding ua, gam tuam leh gam tuam akidou ding ua, mun tuamtuam ah kial ake dia, zin aling ding hi. 8Huai tengteng nauvei kipatna ahi.

Soisakna Genkholhna

9“Huai hun chiang in gimthuak ding in hon mansak ding ua, hon that ding uh. Ka min ziak in nam tengteng huat na hi ding uh. 10Huai hun chiang in mi tampi apuk ding ua, akimansaktuah ding ua, akihotuah ding uhi. 11Zawlnei taklou tampi ahong pawt ding ua, mi tampi akhempuk ding uh. 12Huan hihkhelhna apun ding ziak in mi tamzaw itna ahong dai ding hi. 13Himahleh, atawp tan a thuak ngap peuhmah, huai mi ngei hotdam in a-om ding hi. 14Huan hiai lalgam tanchinhoih nam tengteng theihsakna ding in khovel tengteng ah hilh in a-om ding; huai khit chiang in tawpna ahong tung ding hi.

Dipkuatna Mulkimhuai Hun

(Mar 13.14-23; Luk 21.20-24)

15“Huchi in hihmangbangpa kihhuai, zawlnei Daniel gen, mun siangthou a dingh na muh chiang un, asim peuhmah in a-omdan thei hen. 16Judia gam a omte tang sang ah taimang uhen. 17Inn tung a om in a-inn a banghiam la ding in kum kei hen. 18Huan lou a om inn a puan la ding in kik nawn kei hen. 19Huai ni'n numei gaite leh naunou pomte tung agik ding hi! 20Na taimang hun ding uh phalbi lai hiam, Sabbath ni hiam a ahong tunlouhna ding in thum un. 21Huai hun chiang in gimthuakna thupi a-om ding ziak in, hichibang a thupi leilung pian tung a kipan tutan in a-om ngei nai kei a, chik mah chiang in ahong om nawn sam kei ding. 22Huai nite hihtom hi keileh mihing dam in apawt kei ding uh; himahleh, telte ziak in huai nite hihtom ahi ding hi.

23“Huai hun chiang in kuapeuh in na kiang ua, ‘En dih, Khrist hiai ah hiam, huai ah hiam,’ achih uleh, gingta kei un. 24Khrist taklou leh zawlnei takloute ahong pawt ding ziak un, huaite'n hi thei liaileh telte nangawn leng akhempuk theihna ding un chiamtehna leh thillamdang thupitakte ahih ding uhi. 25Ngai un, ka hon hilhkhol khinta hi.

26“Huchi in na kiang uah, ‘ngai un, gamdai ah a-om’ hon chih uleh, ‘paikhe kei un; dantan sunggil ah a-om, hon chih uleh, taksang sam kei un’. 27Khua, suahlam a ahong phiat a, tumlam tan a akilat zel bang in, Mihing Tapa ahong pai nawnna huchibang ahi ding hi.

28“Siluang omna mun peuh ah musanete leng a-omkhawm ding uh.

Mihing Tapa Hong Paina

(Mar 13.24-27; Luk 21.25-28)

29“Himahleh huai gimthuakna nite nung zek in, ni hihmial in a-om ding a, kha avak nawnta kei dia, van a kipan aksite ahong ke ding ua, van thilhihtheihnate hihlin in a-om ding uh. 30Huai hun chiang in van ah Mihing Tapa chiamtehna ahong lang ding a, huai hun chiang in leitung a nam tengteng in asuun ding ua, ‘Mihing Tapa thilhihtheihna leh thupina lian toh van meipi tung a hong pai amu ding uh.’ 31Huan a-angelte pengkul ging thupi toh asawlkhe ding a, amau atelte lei ning lite a kipan, van tawp a kipan alehlam tawp pha in akaikhawm ding uh.

Theipi Kung A Pan Sinlai

(Mar 3.28-31; Luk 21.29-33)

32“Huchi in theipi kung ah gentehna thu zil un; ahiang ahong nou a, anah ahong sel in nipi anai chih na thei uh. 33Huchi mah bang in nou leng huai tengteng na muh chiang un, amah ahong naita a, kongkhak bul ah a-om chih thei un. 34Chihtaktak in ka hon hilh ahi, huai tengteng atunkim masiah hiai khang amang kei ding. 35Lei leh van amang dia, ka thu ahihleh amang kei ding hi.

Kiveng Gige A Om Poimohna

(Mar 13.32-37; Luk 17.26-30; 17.34-36)

36“Himahleh, huai ni leh hun thu Pa kia lou ngal kuamah in, van a angelte'n leng, Tapa in leng athei kei uh. 37Noah dam lai bang in Mihing Tapa hong pai nawnna ah ahi ding. 38Huai ni, tuichim tun ma in, long a Noah alut ni tan in, ane un adawn ua, zi leh pasal in akinei ua; 39tuichim ahong tung a, avek ua alakmang masiah bangmah athei kei uh; Mihing Tapa hong pai nawnna huchi mah bang ahi ding. 40Huai hun chiang in lou ah mi nih a-om ding ua; khat paimangpih in a-om dia, khat nutsiat in a-om ding. 41Numei nih buh gawinelna ah buh gawinel in a-om ding ua, khat paimangpih in a-om dia, khat nutsiat in a-om ding hi.

42“Huaiziak in kiging un, bang ni'n ahia na Toupa uh ahong pai ding na theih louh ziak un. 43Himahleh, hiai thei un, guta hong pai hun ding inn neitu in theileh, aveng ding a, a-inn aphenvangsak kei ding hi. 44Huaiziak in nou leng kiging gige in om un, na gin louh dak ua Mihing Tapa ahong pai ding ziak in.

Sikha Hoih Leh Hoih Lou Gentehna

(Luk 12.41-48)

45“Sikha muanhuai, piltak, apu'n ahun teng a atan ding uh hawmsak ding a a-inkuanpihte tung a heutu dia akoih, kua pen ahi dia le? 46Apu hong pai chiang in sikha huchibang hih a amuh pen ahampha ding hi. 47Chihtaktak in ka hon hilh ahi, aneih tengteng tung ah heutu ding in akoih ding hi. 48Himahleh sikha gilou in alungtang in, ka pu ahong zok kei ding, chi in 49asikha hihpihte na vua henla, nekham-takhamte kiang ah ne in dawn taleh; 50huai sikha pu agintak louh ni'n, atheih louh lai in, ahong pai ding a, 51tum nih asuah ding a, milepchiahte tan bangbang atangsak ding; huai ah kah leh hagawi a-om ding hi.”

Currently Selected:

MATTHAI 24: PAITBSI

Highlight

Copy