MATTHAI 23

Laigelhmite Leh Pharisaite Demna

(Mar 12.38-39; Luk 11.43,46; 20.45-46)

1Jesu'n mipite leh anungzuite kiang ah thu agen hi. 2“Mosi tutphah ah laigelhmite leh Pharisaite atu uhi. 3Huaiziak in ahon hilh peuhmah uh hih unla zui zel un; amau thilhih bang zaw hih tuan kei un, gen zaw agen ua, ahih tuan kei uh. 4Puakgik haksatak abawl ua, mite asuan ua, amau lah akhutzung un leng akhoih nuam kei uh. 5Athilhih tengteng uh mihing muh ding in ahi, ahih zawk uh, athil buh uleh akhipte uh aliansak ua, apuan mongkai uh asausak ua, 6ankuangluina ah mun hoihpen leh sinagogte ah tutphah hoihpen leh, 7dawr mun a chibai buk leh mi'n, ‘Rabbi, Rabbi,’ achih bang uh adeihtuamse uhi. 8Nou zaw, Rabbi chih in om kei un; sinsakpa khat na nei ua, nou tengteng unaute na hi uhi. 9Huan leitung ah kuamah Pa, chi kei un; na Pa uh khat kia van a om ahi. 10Heutute chih in om sam kei un, heutu khat na nei ua amah Khrist ahi. 11Na lak ua thupipen na sikha ua a-om zawk ding ahi. 12Kuapeuh kiliansak adai ding, kuapeuh kingaineu pahtawi in a-om ding hi.

Pharisaite Lepchiahna Mohpaihna

(Mar 12.40; Luk 11.39-42; 11.44,52; 20.47)

13“Himahleh nou laigelhmi leh Pharisai lepchiahte aw, na tung uh agik hi; van-gam lampi mite na khaksak ngal ua; nou lah na lut ngal kei uh, mi alut dingte lut ding leng na phal kei zel uh. 14Laigelhmi leh Pharisai lepchiahte aw, na tung uh agik hi; meithai innte na negai ngal ua, thumna saupi mi khemna ding in na nei ua, huaiziak in mohna liansem na mu ding uhi.

15“Nou laigelhmi leh Pharisai lepchiahte aw, na tung uh agik hi; phungkai khat lel bawl ding in tuipi leh gam na pai kimvel ngal ua, huchibang a ahong omtak in, amah noumau lehnih in gawtmun ta in na bawl uhi.

16“Nou makai mittaw, kuapeuh tempul lou a kichiam bangmah ahi kei; kuapeuh tempul a dangka-eng lou a kichiam zaw tangtunsak ding ahi chite aw, na tung uh agik hi. 17Nou mihai leh mittawte aw; abang pen athupizaw a, dangka-eng hia, ahihkeileh dangka-eng siangthousak tempul? 18Kuapeuh maitam lou a kichiam bangmah ahi kei; atung a thilpiak om lou a kichiam in atangtunsak ding ahi, na chi uh. 19Nou mittawte aw, abang athupizaw a, thilpiak hia thilpiak siangthousak maitam? 20Huchi in ‘maitam lou a kichiam peuhmah zaw maitam leh atung a om tengteng lou a kichiam ahi. 21Huan tempul lou a kichiam peuhmah zaw tempul leh asung a tengpa lou a kichiam ahi. 22Huan van lou a kichiam peuhmah leng Pathian laltutphah leh atung a tupa lou a kichiam ahi.’

23“Nou laigelhmi leh Pharisai lepchiahte aw, na tung uh agik hi; pudina, mohuri, zira sawm-a-khat na pia ua, dan khawkzaw, diktatna, zahngaihna, ginomna na limsak ngal kei uh; himahleh hiaite ei ve na hih ding uh, adangte hih lou tuan lou in. 24Nou makai mittawte, thousi khisiang a sangawngsau nawmvalhte aw!

25“Laigelhmi leh Pharisai lepchiahte aw, na tung uh agik hi; nou leh kuang polam na hihsiang ua, asung lah lepgukna leh kideklouhna in adim uhi. 26Nou Pharisai mittaw, nou leh kuang sunglam hihsiang masa un, apolam leng ahong siantheihna ding in.

27“Laigelhmi leh Pharisai lepchiahte aw, na tung uh agik hi; hansuang nuhngou, polam a kilawmtak a kilang, asunglam misi guhte leh nin chiteng a dim bang na hi uh. 28Nou leng huai bang in polam ah mihing mitmuh in diktattak in na kilang ua, na sunglam uh bel lepchiahna leh gitlouhna in na dim uhi.

Jesu'n Athuakna Ding Agenkholhna

(Luk 11.47-51)

29“Nou laigelhmi leh Pharisai lepchiahte aw, na tung uh agik hi; zawlneite han na lam ua, midiktat hante leng na zem uhi. 30‘I pipute dam lai a na om hi taleng, zawlneite sisan suahna ua pang lou ding hi hang a,’ na chi uhi. 31Huchi in zawlneite thatte suante na hi uh chih na kitheisak uhi. 32Na pipute uh hih bang in sem zom tou ngal un. 33Gulte leh gul suante aw, Gehenna vaihawmna bangchi in na pel thei ding ua? 34Ngai dih ua, huaiziak mah in na kiang uah, zawlneite, mipilte, laigelhmite ka hon sawl ding; khenkhat na that ding ua, kros ah na kilhden ding uh, khenkhat na sinagogte uah savun khau in na zep ding ua, kho teng ah na sawi zel ding uhi. 35Huchi in Abel midiktattak sisan a kipan, tempul leh maitam kikal a Barak tapa Zekariah na thah uh sisan tan in, leitung a midiktat sisan na suah tengteng uh noumau tung ah ahong tung ding hi. 36Chihtaktak in ka hon hilh ahi, huai tengteng tu khang tung ah ahong tung ding hi.

Jerusalem Khopi Jesu'n Akahkhum

(Luk 3.34-35)

37“Aw Jerusalem, Jerusalem, zawlneite that, na kiang ua ahon sawlte uh suang a na denglum a, akpi in anoute akha nuai a a-opkhum bang in na tate bangzah vei opkhum ka tum a, himahleh na ut kei uhi. 38En un, na inn uh avuak a taisan in a-omta hi. 39K'on hilh ahi, ‘Toupa min a hong pai ahampha hi, na chih masiah uh tuban na hon mu nawnta kei ding uh,’ ” achi hi.

Currently Selected:

MATTHAI 23: PAITBSI

Highlight

Copy