MATTHAI 22
22
Kitenna Ankuang Gentehna
(Luk 14.15-24)
1Jesu'n amaute houpih in akiang uah gentehna thu agen nawn hi, 2“Van lalgam tuh kumpipa kuahiam atapa a dia kitenna ankuanglui toh teh ahi. 3Huan kitenna ankuang um dia achialte sam ding in asikhate asawl a, himahleh ahong nuam kei uh. 4Ama'n, ka chialte kiang ah, ‘ngai dih ua, ka ankuang amanta; ka bawngtalte leh ka gan vak thaute ka gouta a, bang teng amanta hi; kitenna ankuang um ding in hong paita un,’ chi un, chi in sikha dang asawl nawn hi. 5Himahleh ana limsak kei ua, khat a lou ah akuan a, khat asumsinna ah apaimang hi. 6Midangte'n asikhate aman ua, zumhuaitak in abawl ua, ahihlumta uhi. 7Huchi in kumpipa athangpaita a; asepaihhon asawl a, tualthatte ahihmang a, akhua uh leng ahalsakta hi. 8Asikhate kiang ah, ‘kitenna ankuang man ahita, ka chialte ne tak ahi kei uh. 9Huaiziak in lamlian ah pai unla, mi na muh peuhpeuh uh kitenna ankuang um ding in chial un,’ achi hi. 10Huchi in huai sikhate apawt ua, lamlian a va pai in, amuh peuhmah uh migilou leh mihoihte leng apikhawm vek uhi. Huchi in michialte in kitenna dantan ahong dimta hi.
11“Himahleh kumpipa michialte enkhe ding a ahong lutleh kitenna puan silhloumi khat huai ah amu hi. 12Huchi in akiang ah, ‘Lawm, bangchidan a kitenna puan silh lou a hiai a hong lut na hia?’ achi hi. Amah adai dide hi. 13Kumpipa'n asikhate kiang ah, ‘Akhut leh akhe gak unla, polam mial ah paikhia un; huai ah kah leh hagawi a-om ding,’ achi hi. 14Chialte tampi ahi ua, telte zaw tawmchik ahi uh,” achi hi.
Siah Thu A Dotna
(Mar 12.13-17; Luk 20.20-26)
15Huai lai in Pharisaite athugen a amattheihna ding dan akikum uhi. 16Huan amau anungzuite uleh Herod pawlte akiang ah asawl ua, huai mite'n, “Sinsakpa, midiktak na hi a, diktak in Pathian thu na hilh a, kuamah deihsak tuam leh maivil tuam na nei kei chih ka thei uh. 17Huaiziak in bangchi na sa a, hon hilh in, Kaisar kiang a siah piak asiang hia siang lou?” achi uhi.
18Jesu'n agitlouhdan uh ana thei a, “Lepchiahte aw, bangziak a hon ze-et na hi ua? 19Na siahsum uh hon ensak un,” achi hi. Huan akiang ah makhai ahon la uhi. 20Ama'n akiang uah, “Hiai kua lim leh kua min ahia?” achi hi.
21Amau akiang ah, “Kaisar a,” achi uh. Ama'n akiang uah, “Huchi ahih nung Kaisar thilte Kaisar kiang ah pia unla, Pathian thilte Pathian kiang ah pia un,” achi hi.
22Hiai thute azaktak un lamdang asa mahmah ua, amah nusia in, apaimangta uhi.
Thohnawnna Thu A Dotna
(Mar 12.18-27; Luk 20.27-40)
23Huai ni mah in, akiang ah Saddukaite, thohnawnna a-om kei chite ahong pai ua; 24akiang ah, “Sinsakpa, Mosi in, mi ta nei lou in sileh, a-unaupa'n azi luah in a-unaupa a ding in chi akhahsak ding ahi,” achi hi. 25“Ahi a, koute lak ah sal sagih a-om ua; a-upapen in zi anei a, asi a, chi akhah louh ziak in a-unaupa luah ding in azi anutsiat hi. 26Huchi mah bang in anihna in aluah a, athumna in aluah lai a, asagihna tan in aluah chiat uhi. 27Atawp in avek ua asih nung un numei mah leng hong sita hi. 28Huchi in thohnawnna ah amau sagihte lak ah akua pen zi ahi dia? Avek un lah anei kha chiat ngal ua? chi in,” adong uhi.
29Jesu'n akiang uah, “Laisiangthou leh Pathian thilhihtheihna na theih louh ziak un na ngaikhial nak uhi. 30Thohnawn hun ah zi leh pasal a kitenna a-om nawn kei a, van a angelte bang ahi zawta ding uh,” achi hi. 31Himahleh, misi thohnawnna thu Pathian in na kiang ua agen na sim kei ua hia? 32“Kei Abraham' Pathian, Isak' Pathian, Jakob' Pathian ka hi, Pathian zaw misite Pathian ahi kei a, ahingte Pathian ahi zaw,” chi in adawng hi.
33Mipite'n huai azak un athuhilh lamdang asa mahmah uhi.
Thupiak Thupipen Thu A Dotna
(Mar 12.28-34; Luk 10.25-28)
34Jesu'n Saddukaite selkhia ahi chih Pharisaite'n azak un akikhawm uhi. 35Huchi in alak ua dansiammi khat in, amah ze-et in thu adong hi. 36“Sinsakpa, dan ah bang thupiak pen ahia thupipen?” achi hi. 37Ama'n akiang ah, “Toupa na Pathian tuh na lungtang tengteng, na kha tengteng, na lungsim tengteng in na it ding ahi, chih. 38Huai thupiak thupipen leh poimohpen ahi. 39Huan a zom in, akibatpih hiai ahi, ‘Nangmah na ki-it bang in na inveng leng na it ding ahi, chih.’ 40Huai thupiak nihte ah dan leh zawlneite thu tengteng akikhaikhawm vek,” achi hi.
Messia Tungtang A Dotna
(Mar 12.35-37; Luk 20.41-44)
41Huan Pharisaite akikhop lai un Jesu'n amaute thu adong hi. 42“Khrist bangchi na sa ua? Kua tapa ahia?” achi hi. Amau akiang ah, “David tapa,” achi uh. 43Ama'n akiang uah, “Bangchidan in ahia David in Kha a amah Toupa, achih?
44“Toupa'n, ka Toupa kiang ah,
‘Na melmate na khepek nuai a ka koih masiah ka taklam ah tu in,’ achih?
45David in amah Toupa, achih ngalleh, bangchi in atapa ahi dia?” achi hi.
46Kuamah in kam khat in leng adawng thei kei ua,
huai ni a kipan kuamah in thudang adong ngam nawnta kei uhi.
Currently Selected:
MATTHAI 22: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
