MATTHAI 21

Jesu Vualzou A Jerusalem Lutna

(Mar 11.1-11; Luk 19.28-40; Joh 12.12-19)

1Huchi in Jerusalem khua atun ding kuan ua, Bethphage khua, Olive tang atun un Jesu'n nungzuite nih asawl a, akiang uah, 2“Na mazawn ua khua ah va hoh unla, sabiltung khih, akiang a anou toh na mu ding ua; phel unla, ka kiang ah hon kai un. 3Huan kuapeuh in na kiang ua banghiam agen uleh, ‘Toupa'n adeih a ahi,’ na chi ding uh; ama'n ahon sawl pah mai ding,” achi hi.

4Hiai tengteng zawlnei kam a gen ahong tuntheihna ding in ahong omta hi.

5“En dih, na Kumpipa,

thunuailuttak in, sabiltung tung ah,

sabiltungnou tung ngei a tuang in na kiang ah ahong pai,

chi in Zion tanu hilh in,” achih.

6Huchi in nungzuite ava pai ua, Jesu'n akiang ua thu apiak bang ngei in ahihta uhi. 7Sabiltung leh anou ahon kai ua, atung uah apuante uh aphah ua, huai ah atuangta hi. 8Huan mipi lak a tamzaw in lampi ah apuante uh ana phah ua, midang in singsawl sat in, lampi ah aphah uhi. 9Mipi amalam a paite leh amah zuite'n,

“David Tapa kiang ah Hosanna!

Toupa min a hong pai ahampha hi; tungnungpen ah

Hosanna!” chi in akikou uhi.

10Jerusalem khua ahong lut in akhua in, “Hiai mi kua ahia?” chi in aling souhsouh uhi. 11Mipite'n hiai mi zawlnei Jesu, Galili gam a Nazaret a ahi, achi uhi.

Jesu'n Tempul Ahihsianthouna

(Mar 11.15-19; Luk 19.45-48; Joh 2.13-22)

12Pathian tempul ah Jesu ava lut a, tempul a zuak mite leh lei mite tengteng adelhkhia a, dangka khengte' dohkante leh vakhu zuakte tutphahte leng asawnpaihsak hi. 13Akiang uah, “Ka inn thumna inn achi ding uh, chi a gelh ahi. Himahleh nou bel suamhatte khuk in na bawl zaw uh,” achi hi.

14Huan tempul ah mittawte leh khebaite akiang ah ahong ua; amau ana hihdam hi. 15Himahleh siampu liante leh laigelhmite'n athillamdang hihte leh tempul a, David Tapa Hosanna; chi a naupang kikoute amuh un, alungkim kei mahmah uhi. 16Akiang ah, hiaite thugen na za hia? achi uhi. Jesu'n akiang uah, “Za e, ‘naungekte leh nawi ne laite kam a pawt in pahtawina na hihkimta,’ chih na sim ngei kei ua hia?” achi hi.

17Huan amaute apaisan a, khopi a pan pawt in, Bethani ah apai a; huai ah agiakta hi.

Jesu'n Theipi Kung Ahamsiatna

(Mar 11.12-14; 11.20-24)

18Azing a khopi lam a akik nawn lai in agil hong kialta hi.

19Lampi sik ah theipi kung amu a, ava naihleh anah kia lou ngal muh ding a-om kei hi. Huan akiang ah, “Tangtawn in na gah nawn ke'n,” achi hi.

20Huchi in theipi avuai pah hi. Nungzuite'n huai amuh un, “Bangchidan ahia theipi avuai pah tel?” chi in lamdang asa mahmah uhi.

21Jesu'n akiang uah, “Chihtaktak in ka hon hilh ahi, ginna na neih ua, na ginlah kei uleh, theipi tung a hih bang phet leng na hih kei ding ua, hiai tang kiang ah na kisuan inla tuipi ah na kipailut in, chi le uchin, na chih bang un a-om mai ding hi. 22Bangpeuh gingta a thum a na nget uh na mu ding uh,” chi in adawng hi.

Jesu Thuneihna Ginlelhna

(Mar 11.27-33; Luk 20.1-8)

23Huan tempul alut nung a thu ahilh lai in, akiang ah siampu liante leh vantang upate ahong ua, akiang ah, “Kua thu in ahia hiai thil na hih? Kua'n thu hon pia ahia?” achi uhi.

24Jesu'n akiang uah, “Ke'n leng thu kam khat ka hon dong sam ding a, huai na hon hilh uleh, kua thu in hiam hiai thilte ka hih chih ka hon hilh sam ding hi. 25Johan baptisma koi a kipan ahia? Van a kipan hia, ahihkeileh mihing a kipan?” chi in adong hi. Amau akingaihtuah ua, “Van a kipan chi lehang, bangziak a amah ginglou na hi ua le?” ahon chi dia; 26“Mihing a kipan chi lehang, mipi i kihta ngal ua; mi tengteng in lah Johan zawlnei in apom ngal ua,” achi uhi. 27Huchi in Jesu adawng ua, “Thei kei ung,” achi uhi. Ama'n leng akiang uah, “Ke'n leng kua thu in ahia hiai thilte ka hih ka hon hilh sam kei ding,” achi hi.

Tapa Nih Gentehna

28“Himahleh nou bangchi na sa ua? Mi kuahiam in tapa nih anei a, akhatna pen kiang ah ava hoh a, ‘Tapa aw, kuan inla ka grephuan ah va sem ve,’ achi hi. 29Ama'n, ‘Ka ut kei,’ chi in adawng hi. Himahleh aden chiang in alungsim kheng in, akuanta hi. 30Huan anihna pa kiang ah leng ava hoh a, tua bangmah in ava chi hi. Ama'n ‘Pu, ka kuan ding,’ ” chi in adawng a, himahleh akuanta kei hi. 31“Huai mi nihte akua zaw in apa uh deihlam ahih a le?” achi hi. Amaute'n, “Amasapen in,” achi uhi. Jesu'n akiang uah, “Chihtaktak in ka hon hilh ahi, siahkhonte leh kizuakte'n Pathian lalgam ah nou hon lutsan ding uh. 32Diktatna tawn in na kiang uah Johan ahong a, amah na gingta kei uh; siahkhonte leh kizuakte'n amah agingta ua; noute'n huai na muh nung un leng amah na gintakna ding un na kisik nuam tuan kei uh.

Grephuan Loukemte Gentehna

(Mar 12.1-12; Luk 20.9-19)

33“Gentehna thudang ngaikhia un; mi kuahiam inn neitu a-om a, huai mi'n grephuan abawl a, dai in a-umsuak a, grep sukna khuk atou a, inn sang alam a; loukemte kiang ah khohloh ding a pia in gamdang ah apaita hi. 34Huan agah loh hun in agah lakhawm ding in loukemte kiang ah asikhate asawl hi. 35Loukemte'n tua sikhate ana man ua, khat avua ua, khat pen that in, adang khat suang in adeng uhi. 36Huai zoh in sikha dang amasa pawl sang a tamzaw asawl nawn hi. Amau tung ah leng ama ua mite ahih bangmah un ana hih nawn uhi. 37Huai nung in, ‘Ka tapa azahtak kha ding uh,’ chi in atapa akiang uah asawl hi. 38Himahleh loukemte'n atapa ana muhtak un, hiai mipa gouluah dingpa ahi; that ni in agouluah ding tansak ni, akichi uhi. 39Huchi in amah aman ua, grephuan a kipan paikhia in athat uhi. 40Huchi in grephuan neipa ahong pai chiang in huai loukemte tung ah bangchi in ahihta dia le?” achi hi.

41Amaute'n akiang ah, “Huai migiloute haksatak in ahihmangthang ding a, grephuan loukem midang aloh hun teng a agahte akiang a pe zel dingte kiang ah khohloh ding in ape ding,” achi uhi.

42Jesu'n akiang uah, “Inn lam mite suang deih louhpen huai ngeingei aning a suang phatuampen ahong hita. Huai Toupa hih ahi, i mitmuh in alamdang ahi, chih Laisiangthoute na sim ngei kei ua hia?”

43“Huaiziak in Pathian lalgam na kiang ua kipan laksak ahi dia, namdang kiang ah agahsuah ding piak ahi ding, chih ka hon hilh ahi. 44Huai suang tung a puk tuh akitamgawp dia; adelhkhak mi agawizan ding,” achi hi.

45Huan siampu liante leh Pharisaite'n agentehna thute azak un amau tungthu gen ahi chih atheita uhi. 46Huchi in amah mat atum ua; himahleh mipi'n zawlnei a apom ziak un akihta uhi.

Currently Selected:

MATTHAI 21: PAITBSI

Highlight

Copy