MATTHAI 20

Grephuan Nasemte Gentehna

1“Van lalgam tuh inn neipa grephuan a sem dingte chial ding a zing a pawtkhia bang ahi. 2Ama'n nasemte toh ni khat a makhai loh dia akituahtak un agrephuan ah asawl chiat hi. 3Huan dak thumna ding vel in ava pawt a, midang dawr mun a dingh maimaite amu hi. 4Akiang uah, ‘nou leng grephuan ah va pai sam ve ua, akilawm hun ka hon pe na ding,’ achi hi. 5Huchi in apaita uhi. Huan dak gukna ding leh dak kuana ding vel in ava pawt nawn a, huchi mah bang in ahih nawn hi. 6Huan dak sawm-le-khatna ding in ava pawt a, midang dinghte amu a; akiang uah, ‘Bangziak a nitum a hiai lai a dingh maimai na hi ua?’ achi hi. 7Amau akiang ah, ‘kuamah in ahon chial louh ziak un,’ achi uhi. Ama'n akiang uah, ‘Nou leng grephuan ah va hoh sam un,’ achi hi.

8“Huan nitaklam ahong hih in, grephuan neipa'n asumkempa kiang ah, ‘Nasemte samkhawm inla, ananungpen a kipan amasapen tan in aloh uh pia in,’ achi hi. 9Huan dak sawm-le-khatna ding khawng a achialte ahong uleh makhai amu chiat uhi. 10Amasapente ahong ua, muh tam deuh akigingta ua; himahleh amau leng makhai mah amu chiat uhi. 11Aloh uh asantak un, inn neipa tung ah aphun uhi. 12Hiai nanungpente'n dakkal khat kia asem ua, kou sun haksa leh kho-ul thuakte toh kibang in na bawl a,” chi in.

13Ama'n bel alak ua mi khat kiang ah, “Lawm, na tung ah bangmah ka hihkhial sam a; makhai loh ding a kithukim i hi kei maw? 14Nang a la inla pai mai in; nang ka hon piak bangmah hiai nanungpen kiang ah ka pe nuam ahi. 15Kei a hiven, ka ut-ut a ka hih asiang kei a hia? Ahihkeileh kei ka hoih ziak in nang na haza a hia?” chi in adawng hi. 16“Huchi in ananungpente, amasapente ahong hi ding ua, amasapente leng ananungpente ahong hi ding uh,” achi hi.

Jesu'n Asihna Ding Genkholhna Thumveina

(Mar 10.32-34; Luk 18.5-43)

17Jerusalem a ahohtouh lai in Jesu'n anungzui sawm-le-nihte apituam a, lampi ah akiang uah, 18“Ngai dih uh, Jerusalem ah i paitou dia, siampu liante leh laigelhmite khut a Mihing Tapa matsak in a-om ding a; amau si ding in atung ah thu ahihpuk ding uhi. 19Nuihza bawlna dia zat ding leh kilhden ding in Zentelte kiang ah ape ding uh; huan, ani thum ni in kaihthoh in a-om ding,” achi hi.

Zebedai Tapate Dia Ngetsakna

(Mar 10.35-45)

20Huai laitak in, Zebedai tapate nu, atate pi in akiang ah ahong a, amah bia in thil banghiam angen hi.

21Huan ama'n akiang ah, “Bang ahia na deih?” achi hi.

Ama'n, “Hiai ka tapa nihte na gam ah na taklam ah khat, na veilam ah khat atuttheihna ding un thu pia in,” achi hi.

22Jesu'n, “Na nget uh thei lou hi uteh. Ka nou dawn ding na dawn thei ua hia? Ka baptisma tan ding na tang thei ding ua hia?” chi in adawng hi.

Amau akiang ah, “Thei e,” achi uhi.

23Ama'n akiang uah, “Ka nou na dawn ngei ding ua; ka baptisma tan ding na tang thei ding uh. Himahleh ka taklam leh ka veilam a tut ding thu zaw kei piak ding ahi kei, ka Pa bawlsakte a ding ahi zaw ding,” achi hi.

24Huchi in sawmkhatte'n huai azak un unau nihte tung ah ahehta uhi. 25Jesu'n amaute asam a, “Zentelte vaihawmte atung uah thu anei mahmah ua, amiliante un atung uah thu anei mahmah lai uh chih leng na thei uh. 26Himahleh nou lak ah zaw huchi ahi kei ding; kuapeuh na lak ua milian hih ut na nasem un a-om zaw ding hi. 27Kuapeuh na lak ua masapen hih ut na nasem un a-om lai ding ahi. 28Mihing Tapa nasepsak a om ding in ahong pai kei a, nasem ding leh mi tampi tatna dia ahinna pe ding a hong pai ahi zaw hi,” achi hi.

Jesu'n Mittaw Nih Ahihdam

(Mar 10.46-52; Luk 18.35-43)

29Jeriko a kipan apawt lai un mipi tampitak in amah azui uhi. 30Ngai dih, mittaw nih lam gei a tute'n Jesu ahong pai chih azak un, “Toupa, Nang David Tapa, ka tung uah zahngai in,” chi in akikou uhi.

31Mipite'n dai ding in atai ua, himahleh amau, “Toupa, Nang David Tapa, ka tung uah zahngai in,” chi in akinak kou semsem uhi.

32Jesu adingh a, amau asam a, “Na tung uah bang ka hih na ut ua?” achi hi. 33Amaute'n akiang ah, “Mitvak ka ut uh,” achi uhi. 34Jesu'n amau ahehpih mahmah a, amit uh akhoihsak a; huchi in amu thei pah ngal ua, amah azuita uhi.

Currently Selected:

MATTHAI 20: PAITBSI

Highlight

Copy