MATTHAI 19

Kimak Thu A Sinsakna

(Mar 10.1-12)

1Huan hichi ahong hi a, Jesu'n huai thute agen zoh in, Galili gam a kipan apawt a, Jordan lui gal Judia gam ah ahoh hi. 2Mipi thupitak in azui ua; amaute ahihdam zel hi.

3Huan Pharisaite akiang ah ahong ua, amah ze-etna ding in, “Bangziak peuh in mi'n azi mak asiang hia?” achi uhi. 4Ama'n, “Atung a kipan amau bawlpa'n numei leh pasal abawlleh, 5hiai ziak in pasal in anu leh apa apaisan ding a, azi alen ding. 6Huchi in anih un sapum khat ahong hita ding uh, achi chih na sim kei ua hia? Huchi in nih ahita kei ua, sapum khat ahi zawta uhi. Huaiziak in Pathian in agawmsa mihing in khen kei hen,” chi in adawng hi.

7Amau bel akiang ah, “Ahihleh, bangziak a Mosi in kimakna laipiak a mak ding chi a thu pia ahia?” achi uhi. 8Ama'n akiang uah, “Mosi in na lungtang uh khauh ziak in ei ve na zite uh mak aphal; himahleh atung a kipan huchibang ahi ngei kei hi. 9Ke'n zaw ka hon chi ahi, kuapeuh kingaihna ziak hilou a, zi ma a midang nei angkawm ahi; maksa nei peuhmah leng angkawm ahi,” achi hi.

10Nungzuite'n akiang ah, “Azi lam thu a pasal huchibang ahihleh kiten louh ahoihzaw,” achi uhi. 11Ama'n akiang uah, “Huai thu ahihleh, apiaknate kia lou ngal, mi napeuh in apom thei kei ding uh. 12Michilgeh, anu gilsung ua kipan huchibang a piang himte a-om ua; michilgeh, mihing khut a gehte leng a-om sam ua; michilgeh van-gam ziak a chilgeh a kibawltawmte leng a-om sam uhi. Kuapeuh apom thei in pom hen,” achi hi.

Jesu'n Naupang Neute Avualzawl

(Mar 10.13-16; Luk 18.15-17)

13Huai lai in atung ua akhut koih a, athumsak ding in, akiang ah naupang neute ahon pi ua; nungzuite'n ana tai uhi. 14Himahleh Jesu'n, “Naupang neute ka kiang ah hon paisak unla, kham kei un; van-gam hichibang mite a ahi ngal a,” achi hi. 15Huan atung uah akhut akoih a, huai a pan in apaita hi.

Tangval Hausa Gentehna

(Mar 10.17-31; Luk 18.18-30)

16Huan mi khat akiang ah ahong a, “Pu, tangtawn hinna ka neihtheihna ding in thil hoih bang ka hih ding?” achi hi. 17Ama'n akiang ah, “Thil hoih thu bangziak a hon dong? Hoih khat kia a-om; himahleh, hinna a na lut utleh thupiakte zui in,” achi hi.

18Ama'n akiang ah, “Akoi pen maw?” achi hi. Jesu'n, “Tual na that ding ahi kei; Ang na kawm ding ahi kei; Na gu ding ahi kei; Na hek ding ahi kei; 19Na nu leh na pa zahtak in, chihte leh nangmah na ki-it bang in na vengte na it ding ahi chih,” achi hi.

20Tangval in akiang ah, “Huaite teng ka zui zel; bang ka sam lai a?” achi hi. 21Jesu'n akiang ah, “Hoihkim a om na utleh, pai inla, na neih tengteng zuak inla, mizawngte kiang ah pia in, huchi in van ah gou na nei ding; huan, hong pai inla, hon zui in,” achi hi. 22Tangval bel mihausa ahih ziak in, huai thu azak in lungkhamtak in apaimangta hi.

23Jesu'n anungzuite kiang ah, “Chihtaktak in ka hon hilh ahi, mihausa a dia van-gam lut haksapi ahi. 24Huan ka hon hilh ahi, Pathian lalgam a mihausa alut sang in phimbil a sangawngsau lutsuak abaihlamzaw,” achi hi.

25Huan nungzuite'n huai azak un, lamdang asa mahmah ua, “Kua hotdam in a-om zou dia?” achi uhi. 26Jesu'n amau a-en a, akiang uah, “Huai mihing hih vual ahi kei, Pathian a di'n bangkim hihtheih ahi,” achi hi.

27Peter in akiang ah, “Ngai dih, kou bangkim paisan in ka hon zuita ua; bang ka mu ding ua?” chi in adong hi.

28Jesu'n akiang ah, chihtaktak in ka hon hilh ahi, “Khovel thak ah, athupina tutphah a Mihing Tapa atut chiang in, nou kei hon zuite, Israel nam sawm-le-nihte tung a vaihawm in, laltutphah sawm-le-nih ah na tu sam ding uhi. 29Huan michih a-innte, a-unaute, asanggamnute, apa, anu, atate, agamte ka min ziak a paisan peuhmah in aleh za amu ding ua, tangtawn hinna atang ding uh. 30Himahleh mi tampi, amasapen a omte, ananungpen ah a-om ding ua; ananungpen a omte leng amasapen ah a-om ding uh,” achi hi.

Currently Selected:

MATTHAI 19: PAITBSI

Highlight

Copy