MATTHAI 16

Chiamtehna Ngetna

(Mar 8.11-13; Luk 12.54-56)

1Huai zoh in Pharisaite leh Saddukaite ahong pai ua, amah ze-etna ding in van a kipan chiamtehna amaute ensak ding in angen uhi. 2Ama'n akiang uah, “Nitaklam ahong hih in, khua apha dia ahi ding e, meisan asuak a, na chi nak uh. 3Huan zingsang in, tuni'n khua se dia ahi ding e, meisan asuak a, aniamkai, na chi nak uh. ‘Van omdan na theisiam ngal ua, himahleh, hun chiamtehnate na theisiam thei kei uhi.’ 4Khang gilou leh angkawmte'n chiamtehna azong ua, himahleh, Jonah chiamtehna lou ngal akiang uah chiamtehna piak ahi kei ding,” chi in adawng hi. Huan amaute paisan in apawtkheta hi.

Pharisaite Leh Sadukaite Silngou

(Mar 8.14-21)

5Huan nungzuite gal khat lam atun un tanghou apo mangngilh ua, 6Jesu'n akiang uah, “Pharisaite leh Saddukaite silngou lak ah kiveng unla, pilvang un,” achi hi.

7Amau, “Tanghou i puak louh ziak uh ei ve,” chi in akingaihtuah uhi.

8Jesu'n huai athei a, “Nou ginglahte aw, bang achia tanghou na neih louh ziak ua kingaihtuah maimah na hi ua? 9Tu nangawn in na lungsim un na thei nai kei lailai uh maw? Mi sangnga nek tanghou phel nga leh akhamval uh bawmpi bangzah na dimsak zah uh na theigige kei ua hia? 10Mi sangli nek tanghou phel sagih leh akhamval uh bawmpi bangzah hiam na luahdim uh chih thei lou uh maw? 11Tanghou thu na kiang ua gen lou in, Pharisaite leh Saddukaite silngou a pan pilvang un, chih gen ka hi zaw chih bang achia thei lou na hi ua?” achi hi.

12Huaitak in tanghou silngou lak a pilvang ding in asawl kei a, Pharisaite leh Saddukaite thuhilhna a pan pilvang ding in amau asawl zaw chih atheita uhi.

Peter In Jesu Hihna Aphuankhiakna

(Mar 8.27-30; Luk 9.18-21)

13Kaisaria uk a Philippi mun ahong tun in Jesu'n anungzuite kiang ah, “Mite'n Mihing Tapa kua ahi achi ua?” chi in adong hi.

14Amau, “Khenkhat in Baptispa Johan ahi, achi ua; khenkhat in Elijah; khenkhat in Jeremiah hiam zawlnei kuahiam ahi,” achi uh, achi uhi.

15Ama'n akiang uah, “Ahihleh nou kua ka hi na hon chi ua?” achi hi.

16Simon Peter in, “Khrist Pathian Hing Tapa na hi,” chi in adawng hi.

17Jesu'n akiang ah, “Simon, Bar Jonah, hampha chia; sa leh sisan in hon theihsak na hi kei a, ka Pa van a om hon theihsak na hi zaw hi. 18K'on hilh ahi, nang Peter na hi, hiai suangpi tung ah ka saptuam ka lamtou ding a, misi khokulh kongkhakte'n hiai azou kei ding uh. 19Van lalgam chabite ka hon pe ding a, leitung ah bangpeuh na hen van ah leng hen ahi ding a, leitung ah bangpeuh na phel van ah leng phel ahi ding,” achi hi.

20Huai zoh in Khrist ahi chih kuamah hilh lou ding in nungzuite achi bikbek hi.

Jesu'n Asihna Leh Thohnawnna Ding Genkhol

(Mar 8.31—9.1; Luk 9.22-27)

21Huai nung in Jerusalem a apai ding dan, upate, siampu liante, laigelhmite a pan thil tampi athuakdan ding leh hihlup a a-omdan ding, ni thum ni a kaihthoh a a-omdan ding Jesu'n anungzuite atheisak panta hi.

22Huai phet in Peter in amah apituam a, “Toupa, hi kei hen! Huaite na tung ah tung ngei kei hen!” chi in ataihilh hi.

23Jesu akihei a, Peter kiang ah, “Setan, ka nung ah pai in, kei a di'n pukna na hi; Pathian thilte ngaihtuah lou in mihing thilte na ngaihtuah zaw hi,” achi hi.

Nungzuihna Man Piakna

(Mat 10.34-37; Mar 8.34-38; Luk 9.22-27)

24Jesu'n anungzuite kiang ah, “Kuapeuh in hon zuihnopleh amah kimangngilh in, ama kros pua in hon zui hen. 25Kuapeuh ahinna humbit ut in atan ding a; kuapeuh keimah ziak a ahinna tan in ahumbit ding hi. 26Mi'n khovel apumpi in nei henla, ahinna tanleh amah a ding in bang aphatuam dia? Ahihkeileh mi'n ahinna sik in bang ape thei dia?

27“Mihing Tapa a-angelte toh, a Pa thupina a kizem a ahong pai ding ziak in. Huai hun chiang in michih anasep bang un adin chiat ding hi. 28Chihtaktak in ka hon chi ahi, hiai adingh akhente, agam a Mihing Tapa hong pai amuh masiah uh, sihna chiam lou hial ding a-om uh,” achi hi.

Currently Selected:

MATTHAI 16: PAITBSI

Highlight

Copy