MATTHAI 17

Mellamdanna

(Mar 9.2-13; Luk 9.28-36)

1Huan ni guk nung in Jesu'n atuam in tang sangtak ah Peter, Jakob leh a-unau Johan apaitouhpih hi. 2Huan ama uah amel omdan ahong lamdangta a; amai ni bang in ahong tang a, apuansilhte vuk bang in ahong ngouta hi. 3Huan ngai dih, Mosi leh Elijah, amah kihoupih in akiang uah akilak uhi. 4Huan Peter in Jesu ahoupih a, “Toupa, ei a di'n hiai a om ahoih, na utleh hiai ah aidakbuk thum ka bawl ding a; nang a ding in khat, Mosi a ding in khat, Elijah a ding in khat,” achi hi.

5Agen laitak in, mei ngoutak in amaute aliahta a; ngai dih, mei a kipan aw in, “Hiai ka Tapa deihtak, ka kipahna mahmah ahi; amah thu ngai un,” achi hi.

6Huan nungzuite'n huai azak un bokkhup in apuk ua, alau mahmah uhi. 7Jesu'n amaute ahong khoih a, “Thou unla, lau kei un,” achi hi. 8Huan adakkhia ua, Jesu kia lou ngal kuamah amuta kei uhi.

9Huan tang a kipan akum lai un, Jesu'n akiang uah, “Misi lak a kipan Mihing Tapa athohnawn masiah na thil muh uh kuamah hilh kei un,” chi in thu apia hi. 10Huan anungzuite'n akiang ah, “Laigelhmite'n Elijah hong pai masa ding ahi, bangchidan a chi ahi ua?” chi in adong uhi.

11Ama'n, “Elijah ahong pai ding him ahi a, bangkim asiam hoih ding hi. 12Himahleh ka hon hilh ahi, Elijah zaw ahong pai khinta, amah athei kei ua, atung ah a-utut un ahihzawta uhi. Huchi mah bang in Mihing Tapa in leng alak uah athuak sam ding,” chi in adawng hi.

13Huaitak in, nungzuite'n akiang ua Baptispa Johan thu gen ahi chih atheita uhi.

Pasal Naupang Dawimat Hihdamna

(Mar 9.14-29; Luk 9.37-43)

14Huan mipi kiang ahong tun un mi khat akiang ah ahong pai a, ama a khukdin in, 15“Toupa ka tapa tung ah zahngai in, amah phungzawl vei ahi a, anak thuak tel mai; tamveipi mei ah apuklut a, tamveipi tui ah leng apuk nak hi. 16Na nungzuite kiang ah ka hon pi a, ahihdam thei kei uh,” achi hi. 17Jesu'n, “Ginna nei lou leh khang genhakte aw, bang tan ahia ka hon thuakzoh ding, amah ka kiang ah hon pi un,” chi in adawng hi. 18Huan Jesu'n dawi atai a, asung a kipan apawt a; huai dak in naupang adamta hi.

19Huai zoh in, atuam in Jesu kiang ah nungzuite ahong pai ua, “Bang achia kou delhkhe thei lou ka hi ua?” achi uhi.

20Ama'n akiang uah, “Na gintak louh ziak un ahi. Chihtaktak in ka hon hilh ahi, ankam tang khat bang ginna na neih uleh, hiai tang kiang ah, ‘Hiai a kipan huai a pam ah va kisuan in,’ na chi ding ua, akisuan mai ding; nou a ding in hihtheih louh bangmah a-om kei ding,” achi hi. 21Akoi abang hitaleh, hichibang zaw thumna leh an ngawlna lou ngal in apaikhe kei ding hi.

Jesu'n Asihna Ding Genkhol Nawn

(Mar 9.30-32; Luk 9.43-45)

22Galili gam a a-om lai un Jesu'n akiang uah, “Mihing Tapa zaw mihingte khut ah matsak in a-om ding a, athat ding ua; 23ani thum ni in kaihthoh in a-om ding hi,” achi a, huchi in alungkham mahmah uhi.

Tempul Siah Piakna

24Kapernaum khua ahong tun un, Peter kiang ah sumkhonte ahong pai ua, “Na pu un siah pe zel lou hia?” achi uhi. 25Ama'n, “Pe zel e,” achi hi. Huan insung a ava lut in, Jesu'n akiang ah, “Simon, bangchi in na ngai a? Lei a kumpipate'n siah leh leiman sumte kua a pan ahia alak zel uh? Atate ua pan hia, mituam a pan?” chi in ana gentuh hi. 26Peter in, “Mituam a pan,” achihtak in, Jesu'n akiang ah, “Huchi ahihleh tate awl uh ahi mai vo oi. 27Himahleh nang tuipi ah va hoh inla, ngakuai diah inla, nga hong suak masapen man in, akam kek lechin dangka nih na mu ding; huaite la inla kei leh nang a ding in akiang uah pia in, huchi lou in zaw amaute i hihlungkim kei kha ding,” achi hi.

Currently Selected:

MATTHAI 17: PAITBSI

Highlight

Copy