MATTHAI 15

Thugousiah Thu A Thuhilhna

(Mar 7.1-13)

1Huai khit in Jesu kiang ah Jerusalem a kipan Pharisaite leh laigelhmite ahong pai ua, 2“Bangziak a upate thugousiah a na nungzuite talek nak uh ahia? Tanghou anek chiang un akhut uh asil ngei kei uh,” achi uhi.

3Jesu'n akiang uah, “Nou leng bangziak a na thugousiah ziak ua Pathian thupiak a talek na hi ua? 4Pathian in, ‘Na nu leh na pa zahtak in, kuapeuh anu hiam apa hiam gensia si ngeingei heh’ achi hi. 5Nou bel, ‘kuapeuh anu hiam apa hiam kiang a, na hon zatna ding Pathian kiang a piak ahih peuhmah chiang in, 6anu leh apa azah ding ahi nawn kei,’ na chi uhi. Huchi in na thugousiah ziak un Pathian thu bangmah lou na suah uhi. 7Nou lepchiahte, Isai in na tungtang thu uh ana genkhol dik mahmah hi;

8“Hiai mite'n akam un ahon zah ua, amuk un ahon phat ua,

himahleh alungtang un ahon gamlat uh.

9Himahleh, athuhilhna ua mihing thupiak ahilh ziak un ahon biak uh athawn mai ahi,” chi in adawng hi.

Mihingte Ninsakte

(Mar 7.14-23)

10Huan mipi asam a akiang uah, “Ngaikhia unla, theisiam un; 11kam a lut in mihing ahihnin kei a; himahleh kam a pawt, huai ngei in mihing ahihnin zaw hi,” achi hi. 12Huai lai in anungzuite ahong pai ua, akiang ah, “Pharisaite'n huai thu azak ua alungkimlouhdan uh na thei hia?” achi uhi. 13Ama'n, “Kung tengteng ka Pa van a om suan louh bohkhiak in a-om ding. 14Amaute awlmoh kei un; mittaw makai ahi uh; huchi in mittaw in mittaw mah apileh kokhuk ah akekhawm ding uh,” chi in adawng hi.

15Huan Peter in akiang ah, “Huai gentehna thu hon hilhchian in,” chi in adong hi. 16Ama'n, “Tutan a nou leng thei nai lou lai na hi uh maw? 17Kam a lut peuhmah gil ah alutsuk a, dailenna ah paihkhiak in a-om chih na thei kei ua hia? 18Kam a pawtte bel lungtang a kipan a hong pawt ahi ua; huaite ngeingei in mihing ahihnin nak hi. 19Lungtang a kipan ngaihtuahna giloute, tualthahna, angkawmna, kingaihna, guktakna, hekna, gensiatna ahong pawt nak hi. 20Huaite ahi mihing hihnin; khut sil lou a an nek in mi ahihnin kei,” achi hi.

Zentel Numei Hihdamna

(Mar 7.24-30)

21Jesu hiai a kipan pawt in Tura leh Sidon uk ah apaita hi. 22Huan ngai dih, huai gam a kipan Kanaan numei khat ahong pai a, “Toupa, David Tapa, ka tung ah zahngai in, ka tanu dawi in lungkhamhuaipi in ama'n,” chi in akikou hi. 23Ama'n bel kam khat in leng adawng kei hi. Anungzuite'n, “I nung ah akikoukou a, paisak mai in,” chi in hong gen uhi. 24Ama'n bel, “Israel inkote nam lak a belam mangte kiang lou ngal ah sawl ka hi kei,” chi in adawng hi. 25Himahleh numei ahong pai a, “Toupa hon huh in,” chi in abia hi. 26Huan ama'n, “Tate tanghou laksak a, uite kiang a paih akilawm kei,” chi in adawng hi. 27Numei in, “Toupa, hih zaw ahi tham hi; himahleh, uite'n leng apu uh dohkan a kipan a tanghou nen kia ane zel sam ve ua oi,” achi hi.

28Huaitak in Jesu'n akiang ah, “Numei, na ginna thupi na tel e; na deih bangtak in na tung ah om hen,” chi in adawng a, huchi in atanu huai hun ngei in adamta hi.

Mi Tampi Hihdamna

29Huai a kipan Jesu apai a, Galili tuipi kiang ahong tung a; tang ah apaitou a, huai ah atu hi. 30Huchi in akiang ah mipi tampi ahong ua, khebaite, mittawte, pau theiloute, piangsualte leh midang tampi ahon pi ua, ama'n amaute ana hihdam chiat hi. 31Mipite'n pau theiloute hong pau a, piangsualte hong hoih a, khebaite khe a pai a, mittawte'n hon mutheita uh chih amuh un lamdang asa mahmah ua; huchi in Israel' Pathian aphatta uhi.

Mipi Sangli Vakna

(Mar 8.1-10)

32Huchi in Jesu'n anungzuite asam a, “Ka kiang ah mipite ni thum a-omta ua, nek ding bangmah aneih louh ziak un, ka lainat mahmah; an ngawl in ka paikiksak ut kei hi, huchi lou in zaw lamkal ah abahsegawp kha ding uh,” achi hi.

33Nungzuite'n akiang ah, “Mipi hiai zahzah vahna khop tanghou huai zahzah gamdai ah koi a kipan i mu dia?” achi uhi.

34Huan Jesu'n akiang uah, “Tanghou phel bangzah na nei ua? achi hi. Amau akiang ah, phel sagih leh nga neu tawmchik toh,” achi uhi.

35Huan ama'n lei a tu ding in mipite thu apia a, 36huan tanghou phel sagih leh ngate ala a, kipahthu gen in, abalkham a, nungzuite kiang ah apia a, huchi in nungzuite'n mipite kiang ah apesawn uhi. 37Huan avek un ane ua, avah chiatta ua; akhamval nen uh bawmpi sagih adim hi. 38Anete tuh numei leh naupang sim louh in, piching ngen sangli ahi uh. 39Huan mipite asawlmang nung in long ah Jesu atuang a, Magadan gam atung hi.

Currently Selected:

MATTHAI 15: PAITBSI

Highlight

Copy