MATTHAI 14

Baptispa Johan Sihna

(Mar 6.14-29; Luk 9.7-9)

1Huai laitak in kumpipa Herod in Jesu tanchin ana za hi. 2Asikhate kiang ah thu agen a, “Hiai Baptispa Johan ahi; misi lak a kipan thounawn ahi; huaiziak in huai thilhihtheihnate'n amah a sem ahi,” achi hi.

3Herod in a-unau Philip zi, Herodias ziak in Johan aman a, ahen a, suangkul ah ana khum hi. 4Johan in akiang ah amah na neih asiang kei, achih ziak in. 5Johan hihlup ut mahleh mipi akihta a, zawlnei hi a apom ziak un.

6Himahleh Herod pian ni ahong tun in alai ah Herodias tanu alam a, Herod akipaksak hi. 7Huai phet in anget peuhmah pe ding in thu akichiam hi.

8Ama'n anu' thuhilh bang in, “Hiai kuang ah Baptispa Johan lutang hon pia in,” achi hi.

9Kumpipa alungkhamta a, himahleh athuchiamte leh a-ankuang umpihte ziak in piak ding thu apia hi. 10Huchi in mi asawl a, Johan lutang atansak hi. 11Huan kuang in alutang ahon la ua, numei naupang kiang ah apia ua, ama'n anu kiang ah apaipihta hi. 12Johan nungzuite'n aluang hong la ua, avui ua, huchi in Jesu ava hilh uhi.

Mipi Sangnga Vakna

(Mar 6.30-44; Luk 9.10-17; Joh 6.1-14)

13Jesu'n huai thu azak in, hiai a kipan long in gamkeu lam ah apaituamta hi. Himahleh mipi'n azaktak un khua a kipan khe a pai in azuita uhi. 14Huchi in amah ahong paikhiakleh mipi tampitak amu a, ahehpih mahmah a, adamloute uh ahihdamsak hi.

15Nitaklam ahong hih in, nungzuite akiang ah ahong pai ua, “Hiai mun gamkeu ahi a, ni akaita a, mipite khuate apai a, amau a ding nek ding aleitheihna ding un paisakta in,” achi uhi.

16Jesu'n akiang uah, “Apaimang uh akiphamoh kei, noumau nek ding pia un,” achi hi.

17Amau akiang ah, “Hiai ah tanghou phel nga leh ngasa nih kia i nei uh,” achi uhi.

18Ama'n, “Huaite ka kiang ah hon la un,” achi hi. 19Huchi in loupa tung a tu ding in mipite thu apia a, tanghou phel nga leh ngasa nihte ala a, van lam en in avualzawl a, abalkham a, nungzuite kiang ah tanghoute apia a, mipite kiang ah nungzuite'n apesawn uhi. 20Huan avek un ane ua, avah chiatta ua; akhamval uh bawmpi sawm-le-nih dim angah uhi. 21Anete numei leh naupang sim louh in, piching ngen sangnga vel ahi uh.

Tui Tung Ah Khe In Jesu Apai

(Mar 6.45-52; Joh 6.15-21)

22Huan mipite asawlmang khit in apai ma a gal khat na pai masa ding in nungzuite long ah atuangsak teitei hi. 23Mipite apaimang nung un thum ding in tang ah atuam in apaitou a, nitaklam ahong hih in huai ah amah kia in a-omta hi. 24Tuipi laitak ah long a-omta a; huih in ahilou lam a asawn ziak in tuikihot in asepta hi.

25Zanven lina ah tuipi tung a khe a Jesu pai a, akiang lam uh hon zuan in amu uhi. 26Nungzuite'n amah tuipi tung a khe apai amuh un, “Sikha ahi,” chi in abuai ua, lau in akikouta uhi. 27Himahleh Jesu'n amaute ahoupih pah a, “Khamuangtak in om un, keimah ka hi, lau kei un,” achi hi.

28Peter in adawng a, “Toupa, nang na hihleh tui tung ah nang kiang a hong pai thu hon pia in,” achi hi. 29Huan ama'n, “Hong pai ve,” achi a, long a kipan Peter akum a, Jesu kiang zuan in tui tung ah khe in apaita hi. 30Himahleh huih nung amuh in alau a, tum ding in akisa a, “Toupa, hon hondam in,” chi in akikou hi.

31Jesu'n asawk pah a, amah alen a, akiang ah, “Nang gintawm, bangziak a ginglah na hia?” achi hi.

32Huan long a atuan uleh huih adaita hi. 33Long a omte'n, “Pathian Tapa na hi taktak hi,” chi in amah abia uhi.

Gennesaret A Damlou Hihdamna

(Mar 6.53-56)

34Huan gal khat lam akai uleh, Gennesaret gam ahong tung uhi. 35Huai mun a mite'n amah atheihtak un, huai kim gam tengteng ah mi asawl ua, damlou tengteng akiang ah ahon pi ua; 36Apuan mong bek khoih theih angen ngutngut ua; huan akhoih peuhmah adam zel uhi.

Currently Selected:

MATTHAI 14: PAITBSI

Highlight

Copy