3 JOHAN 1
1
Chibai Bukna
1Upa in, deihtak Gaias thutak a ka it kiang ah; 2deihtak, na kha in vualzawlna amuh bang in, bangkim a vualzawlna na muh leh na damtheihna ding in ka thum zel hi. 3Unaute ahong pai un, thutak a na hindan leh na muanhuaidan ahon theihpih ziak un ka kipak mahmah hi. 4Ka tate thutak ah a-om uh chih ka zak kan a kipahna thupizaw ka nei kei hi.
Gaias Thilphalna
5Deihtak unaute mikhual himah le uh, atung ua na hih peuh ah muanhuaitak in na hih zel a; 6huaite'n saptuamte ma ah na itna atheipihta uhi; amau tuh azinna ua Pathian mite hihtuak him a na khakkhiakleh na hihhoih ding hi. 7Amau Khrist min a azinna uah Zentelte kiang a kipan bangmah la lou in apawt zel ngal ua. 8Huchi in thutak a seppihte i hihtheihna ding in huchibang mite, eite'n i kipahpih ding mah ahi.
Diotrephes
9Saptuamte kiang ah thu neukha zaw ka gelhta; himahleh Diotrephes, alak ua tungnun ut nakpa'n akipahpih kei hi. 10Huaiziak in ka hong paileh athilhihte ka pholhkhe ding a, i tung ua thu dikloupi agen a akamtamdan ka theikhesak ding hi. Huan huai leng hun asa kei a, amah ngei in unaute akipahpih kei a, akipahpih nuamte leng khou in saptuamte lak a kipan adelhkhia hi.
11Deihtak, giloumi omdan zui ke'n, ahoih zui zaw in. Kuapeuh thil hoih hihmi tuh Pathian a pan ahi; thil gilou hihmi in Pathian amu ngei kei hi.
Demetrias
12Demetrias in mi tengteng phat aloh a, thutak a phat nangawn aloh behlap hi; eite'n leng i phat ua, hiai phatna adik ahi chih na thei hi.
Mangpha Khakna
13Na kiang ah thu tampi gelh ding ka nei, himahleh laitui leh laipuan a gelh ka ut kei hi. 14Sawt lou nung chiang in hon muh ka lamen hi, huchi in kimaituah in i kihou ding. 15Khamuanna na tung ah om hen. I lawmte'n chibai ahon buk uhi. Amin uh lou chiat in lawmte chibai hon buksak in.
Currently Selected:
3 JOHAN 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.