JAKOB 4
4
Kisaktheihna Siatna Bul Ahi
1Na lak ua kidounate leh kinaknate koi a kipan hong suak ahi ua? Hiaite na pumpi hiangte ua kidouna bawl nak, na nopsak utna ua kipan a hong suakkhete ahi kei ua hia? 2Na lunggulh ua, na nei tuan kei ua, huchi in tual na that uh. Na eng ua, na ngah thei tuan kei ua, huchi in na kidou ua, gal na bawl uh. Na nget louh ziak un, na nei kei uh. 3Na ngen ua, na nget diklouh ziak un na ngah kei uh, na nopsak bawlna ding lel ua zat na tup ziak un. 4Nou angkawm hatte aw, khovel lawm hihna zaw Pathian melma hihna ahi chih na thei kei ua hia? Huaiziak in khovel lawm hih ut peuhmah Pathian melma in akibawl nak hi. 5Ahihkeileh eimah a teng Kha in, “Haza khop hial in ahon deih chih Laisiangthou in agen bangmah lou in na ngaihtuah ua hia?” 6Himahleh ama'n hehpihna tamsem ahon pia hi. Huaiziak in Laisiangthou in, “Pathian in mikisatheite adou a, kingaineute bel hehpihna ape nak hi,” achih.
7Huaiziak in Pathian ah kitulut un. Diabol dou un, hileh noute ahon taimangsan ding hi. 8Pathian naih unla, huchi in ama'n ahon naih ding. Khialte aw, na khut uh silsiang un; lungsim thuah neite aw, na lungtang uh hihsiangthou un. 9Lungkham unla, suun unla, kapkhia un. Na nuih uh suunna suak henla, na lungnopna uh lungngaihna suak hen. 10Toupa mitmuh in kingaineu un, huchi in ahon hihlian ding hi.
Unau Gensiat Dan Bohsiatna
11Unaute aw, kigensetuah kei un. Kuapeuh in a-unau agensiat hiam vai ahawmkhumleh, dan gensia a vaihawmkhum ahi; dan na gensiatleh dan zuimi na hi kei a, vaihawmpa na hi zaw hi. 12Dan pepa leh vaihawmpa, amah hondam theipa leh hihmang theipa khat lel a-om hi; nang na vengte vaihawmkhum kua kisa na hia?
Mihausate Ngaihtuah Khelh
13Tu'n ah noute'n ngai un, “Tuni hiam zingchiang hiam in, huai khopi ah i hoh ding ua, huai ah kum khat i va taam ding ua, i sumsin ding ua, punna i mu ding,” chite aw. 14Zingchiang a bang hong om ding ahia chih na thei kei uhi. Na hinna uh bang ahia? Tuimei sawt lou kal a hong dawk a, mang nawn lel bang na hi uhi. 15Huchi in “Toupa'n pha asakleh i dam dia, hiai hiam, huai hiam i hih ding,” na chih ding uh ahi. 16Himahleh na ki-otsaknate uh na suang zaw ua, huai bang suanna tengteng gilou ahi.
17Huchi in kuapeuh thil hoih ding thei a hih tuan lou zaw amah a ding in khelhna ahi.
Currently Selected:
JAKOB 4: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
