JAKOB 3
3
Lei Thuzohna
1Ka unaute aw, na lak uah mi tampi heutu in hong om kei un, heutu in vaihawmna thupi sem atuak ding chih i thei uhi. 2Thil tampi ah i vek un i gilou nak uhi. Kuapeuh thugen lam a agitlouh keileh mi piching ahi a, apumpi vengtheimi ahi. 3Ngai un, sakolte'n i thu aman theihna ding ua akam ua kamkaihna sikkual i batleh apumpi uh i kaihei hi. 4Longpite leng ngaihtuah sam un, alian mahmah ua, huih hat mutleng in a-om nak uhi, himahleh alonghekpa'n apaisak utna lam peuh ah ahekna neuchik petmah in akiheisak hi. 5Hichibang in leitung pumpi hiang neuchik ahi a, nakpitak in aki-uangsak nak hi. Ngai un, meikuang neuchik phet in gammang nak katsak na tel e! 6Huan lei tuh meikuang ahi, pumpi hiangte lak a gitlouhna lumpi, pumpi avek a ninsak a, mihing kisuansawndan pianphungpi kangsak ahi; huai lei mah in gawtmun mei toh apeh hi. 7Sa chi chih, vasa chi chih, ganhing chi chih tuipi ate khoizual theih ahi ua, mite khoizual in a-om uhi. 8Himahleh lei zaw kuamah in akhoizual thei kei uhi; sihna gu a dim gilou om kinken thei lou ahi. 9Huai lei in Pa Pathian i phat ua; huai mah in Pathian bang a bawl mihingte i hamsiat uhi. 10Kam khat a kipan in phatna leh hamsia apawt nak hi. Ka unaute aw, huchibang ding hilou ahi. 11Tuikhuk khat in nak khat mah a kipan in tui lim leh lim lou asuaksak zel a hia? 12Ka unaute aw, theipi kung ah olive thei agah thei a hia? Ahihkeileh grepgui ah theipi agah thei a hia? Huchibang in chikhuk in tui al lou asuaksak thei sam kei hi.
Tunglam A Pan Pilna
13Na lak uah kua apil in, thu atheithei a? Thunuailut leh piltak in athilhihte omdan hoih in ensak hen. 14Himahleh na lungtang uah hazatna thupitak leh kidemna na neih uleh thudik zuausan kei un. 15Huai bang pilna zaw tunglam a kipan a hong paisuk ahi kei a, lei lam thil, khamitlouhna leh dawi lam thil a kipan ahi zaw hi. 16Hazatna leh kidemna omna ah buaina leh thilhihkhelhna chiteng a-om hi. 17Tunglam a kipan pilna bel, atung in asiangthou phot a, huai khit in kituah a-ut a, anunnem a, achihnuam a, zahngaihna leh gah hoih in adim a, khentuam anei kei a, alepchiah kei hi. 18Huan diktatna gah zaw lemna bawlmi in lemna a atuh ahi.
Currently Selected:
JAKOB 3: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
