JAKOB 1
1
Chibai Bukna
1Jakob, Pathian leh Toupa Jesu Khrist sikha in, nam sawm-le-nih dalhzakte kiang ah chibai abuk hi.
Ze-etna Gahsuah
2Ka unaute aw, na ginna uh ze-etna in kuhkalna asiam chih thei in, khemna chiteng na tuah chiang un kipahna ngen in sim un. 3Na ginna ze-etna un kuhkalna asiam chih thei in. 4Bangmah tasam lou a na kim ua, na vek ua na bit theihna ding un, kuhkalna in semkim hen. 5Na lak ua kuapeuh in pilna ataksapleh mi tengteng kiang a itlou leh tai lou a pepa Pathian kiang ah ngen hen, huchi in akiang ah piak ahi ding hi. 6Himahleh ginglel het lou in ginna nei in ngen hen, ginglelmi zaw tuipi kihot huih mutleng leh sep bang ahi. 7Huchibang mi'n Toupa a kipan bangmah muh kiging kei hen. 8Lungsim det neiloumi athilhih tengteng ah akip kei hi.
Mizawng Leh Mihaute
9Unau daikil kal a om dopsang a a-om ziak in kipak hen; 10mihau hihneu a a-om ziak in kipak zaw hen; loupa pak bang a aman ding ziak in. 11Ni hong suak a huihlum ahong nun in loupa avuai a; apak apulh a; akilawmna amangthang hi; huchi mah bang in mihau apaina ah avuai ding hi.
Ze-etna Leh Khemna
12Khemna thuak teitei mi ahampha hi; ze-et a a-om nung in Hinna Lallukhu, Toupa'n amah itte kiang a achiam amuh ding ziak in. 13Kuamah in khemna atuah lai in Pathian khem ka hi, chi kei hen. Pathian gitlouhna toh khemvual ahi kei, ama'n leng kuamah akhem ngal kei a. 14Michih amau utna a hip leh pimang a a-om chiang un khemna atuak uh ahi zaw hi. 15Huan utna pai ahih chiang in huai in khelhna apiangsak a, huan, huai khelhna ahong pichin in, sihna atun hi.
16Ka nau deihtakte aw, khem in om kei un. 17Thilpiak hoih leh thilpiak buching tunglam a kipan a vakte Pa kiang a kipan a hong suk ahi a, amah ah lamdanna leh kikhekna lim a-om kei hi. 18Athilsiamte lak a gah masa i hong hihtheihna ding in, amah deihlam in thutak lak a pan in ahon suangkhia hi.
Sabiak Dik
19Unau deihtakte aw, huaite na thei uhi, himahleh michih ngaihkhiak kilawp henla, thugen kituhpih kei henla, heh hak hen. 20Mihing thangpaihna in Pathian diktatna abawl kei hi. 21Huaiziak in nin tengteng leh gilou dim val koihmang unla, thu kipawi, na kha uh hondam thei, thunuailuttak in pom un.
22Himahleh noumau kikhem in ngaikhete leltak hilou in thuzuite hi zaw un. 23Kuapeuh thu ngaikhia a zui tuan lou zaw limlang a apianpih maitang hoihtak a ki-en bang ahi. 24Hoihtak in aki-en a, apaimang zoh in mi bangchi ahia ahih akimangngilh nawn pah hi. 25Himahleh kuapeuh dan bukim, noplenna dan vel a, huchibang a om gige a, ngaikhia a, mangngilh nawn maimah nak bang hiloute zui a nasem gige, huai mi athilhih ah vualzawl in a-om ding hi.
26Kuapeuh sabiak limsak hi a kigingta a, alei venghoih lou a, amah lungtang kikhem zaw mi sabiakdan bangmah ahi kei hi. 27I Pathian leh Pa mitmuh a sabiak siangthou leh gilou pang lou zaw, tagah leh meithaite agimthuak lai ua veh leh khovel buahna bang lou a kibawl zel ahi.
Currently Selected:
JAKOB 1: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
