HEBRUTE 13
13
Pathian Deihlam Thuhilhna
1Unau ki-itna om zel hen. 2Mikhualte tung ah itna suah ding mangngilh kei un; huchibang hih in khenkhat in theiloupi in angelte azintun uhi. 3Hen a omte hen hi sam bang in theigige unla; gimthuakte sa a om sam na hih ziak un theigige un.
4Mi tengteng lak ah kitenna pahtawi in om henla, lupna leng hihbuah louh in om hen; kingaite leh angkawmte tung a Pathian in vaihawm ding ahi.
5Na lungsim putdan uh dangka deihtakna pang lou hi hen; na thil neihsun tung uah lungkim un; amah mah in, “Bangchik mah in ka hon don lou kei ding a, pai leng ka hon paisan kei ding,” achi hi.
6Huchi in hangsantak in,
“Toupa hon panpihpa ahi,
ka lau kei ding; mihing in bang ahon chih thei dia?” i chi uhi.
Heutute Thumanna
7Noute hon heu, Pathian thu hon hilhte, theigige unla, a-omdan ua thilsuakte ngaihtuah in a-omdan uh ching un. 8Jesu Khrist tuh zan, tuni leh tangtawn in angeingei in a-om gige hi. 9Kisinsakna tuamtuam leh thugin lamdangte mutleng in om kei un; lungtang hehpihna a hihkip a om ahoih ngal a, nek dingte bang a hihkip a om lou in; huchibang lam lungkhamte'n huaite ah phattuamna amu tuan kei uhi.
10Eite'n maitam khat, biakbuk nasemte'n anek theihlouhna mun i nei hi. 11Gan sisan, siampu lianpen in mun siangthou a khelhna a dia lan a alutpih zel luangte dainawl ah ahal uhi. 12Huchi in Jesu in leng amah sisan mahmah a mite ahihsianthouna ding in kulh kongkhak polam ah ana thuakta hi. 13Huchi in amah amuhsitna uh pu in dainawl ah akiang lam ah i paikhe ding uhi. 14Hiai lai ah zaw khomun kip i nei ngal kei ua, kho hong om ding i zong uh ahi zaw hi. 15Huchi in amah vang in phatna kithoihna Pathian kiang ah i lan gige ding uh, amin gupna mukte gah ahih ziak in. 16Himahleh thil hihhoih leh thilphal mangngilh kei un; huai bang kithoihna tung ah Pathian alungkim mahmah hi.
17Nou hon heutute thu mang unla, athuthu un om un, anasepte uh tanchin gen nawn ding a, na khate uh ching a hon veng ahi uhi, lungkham kawm hilou in, kipaktak in semsak un; huchi lou in zaw nou a ding a khawk ahi zaw ding hi.
Mangpha Khakna Thukhahte
18Hon thumsak un; bangkim a diktattak a om a, sia-le-pha theihna siangtak nei ka hi uh chih diktak in ka kithei uhi. 19Huan kintak a na kiang ua sawl nawn a ka omtheihna ding in, huai ding in ka hon ngen nawn sem hi.
20Tu in, lemna Pathian, tangtawn thukhun sisan ziak a misi lak a kipan a, i Toupa Jesu, belamchingpa thupitak, kaithou nawnpa'n, 21amitmuh a akipah lam peuhmah Jesu Khrist ziak in eimah a sem in, adeihlam hih ding in thil hoih chiteng lam ah nou hon hihkim hen; Jesu Khrist kiang ah thupina tangtawn in om hen. Amen.
22Himahleh unaute aw, ka hon ngen ahi, hanthawn thuhilhna ngaithei teitei un; na kiang uah thu tomchik ka gelh uhi. 23I unaupa Timothi apawtsakta uh chih na thei un; ahong pai baihleh, amah toh nou ka hong mu ding uhi. 24Nou hon heute tengteng leh misiangthoute tengteng chibai hon buksak un. Itali gam a mite'n chibai ahon buk uhi. 25Na vek ua kiang ah hehpihna om hen, Amen.
Currently Selected:
HEBRUTE 13: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
