HEBRUTE 9
9
Thukhun Lui Etsakna
1Huchi in thukhun masa in leng Pathian nasepna a zuih ding thukhun leh lei lam mun siangthou leng anei hi. 2Biakbuk alam ua, pindan tuah masak ah khawnvak koihna mung, dohkan leh tanghou koihna a-om hi; huai tuh Mun Siangthou achi uhi. 3Puanzak nihna ban ah biakbuk, Mun Siangthoupen achih uh a-om hi. 4Huai sung ah dangka-eng gimlim halna bawm leh thukhun bawm dangka-eng a kiluan a-om a, huai thukhun bawm sung ah Manna omna dangka-eng bel, Aaron chiang sel leh thukhun gelhna suangpek a-om hi. 5Atunglam ah zahngaihna tutphah liah in, thupina cherubte a-om ua; huaite tu in zaw akim sipsip in i gen thei kei ding uh.
6Huai thilte huchibang a bawl ana hi ua, siampute'n Pathian nna sem in, biakbuk tuah masak ah alut zel uhi. 7Pindan sungnungpen ah bel siampu lianpen kia, kum teng in khatvei sisan tawi in alut a; ama khelhna a ding leh mite khelhna a ding in alan zel hi. 8Kha Siangthou in hon theihsak nop bel, biakbuk masa adin lai teng Mun Siangthou a luttheihna lampi akilang nai tadih kei, achihna ahi. 9Biakbuk a thilpiak leh kithoihna kilan zelte'n abemite sia-le-pha theihna asiangsak thei kei chih tu hun a eite hon etsakna ahi. 10Huaite nek-le-dawn, kisilna dan tuamtuamte, ataktak bawlhoihna hong tun ma a kizang salam thilte ahi.
Thukhun Thak Sisan
11Himahleh Khrist bel thil hoih hong om dingte siampu lianpen ding a hong pai in, khut a lam louh biakbuk thupizaw leh bukimzaw sung ah alut hi, huai tuh thilsiamte lak a ahi kei chihna ahi, 12ama'n ei a ding a tangtawn tatkhiakna ngah khin in, kelte leh bawngtalte sisan hilou, ama sisan mahmah tawi in khatvei a setdet ding in mun siangthou sung ah alutta hi. 13Kel leh bawngtalte sisan leh bawngla vu, minin tung a theh in bawn sa siang khop a ahihsiangthouleh, 14Khrist, tangtawn Kha ziak a gensiatbei a Pathian kiang a kilan sisan in, Pathian hing nasem ding in na sia-le-pha theihna uh thilhih sisa a pan nak hihsiangthou na tel in chia!
15Hiai ziak in amah thukhun thak palai ahong hi a, sapte'n tangtawn a gouluah ding thuchiam atantheihna ding un thukhun masa nuai a tatleknate lak a kipan hon tankhe ding in amah ahong sita, chihna ahi.
16Thusiah omna peuh ah asiahmi sihna leng a-om teitei ding ahi. 17Mi asih nung un thusiah in thu anei nak hi, asiahmi adam lai teng bel thu anei kei hi. 18Huchi in thukhun masa leng sisan lou in ahihkip kei uhi. 19Dan thupiak peuhmah Mosi in mipi tengteng kiang a apuan nung in, bawngnoute leh kelte sisan tui, samulkhau sandup leh hissop in ala a, laibu leh mipi tengteng atheh a, 20huai Pathian in na kiang ua anamkip thukhun sisan ahi, chi in. 21Huai lou leng biakbuk leh nasepna van tengteng huchi mah bang in sisan in atheh hi. 22Huan dan in sisan a bangkim hihsiangthou angiat bang in, sisan suak lou in ngaihdamna himhim a-om kei hi.
Khrist Sisan In Khelhnate Alamang
23Huai thilte van a om batpih laksawnte huaite a hihsiangthou a-om ding him uh ahi; van thil taktakte bel huai sang a kithoihna hoihzawte a hihsiangthou a-om ding ahi. 24Khrist khut a lam mun siangthou, atak batpih ah alut ngal kei a; tu'n ah bel Pathian ma ah i sik ua dingh ding in van ah alut zawta hi. 25Himahleh kum teng a siampu lian, ama sisan toh hilou, sisan tawi kawm a mun siangthou a alut zihzeh bang a, amah kilan ding a van a lut ahi kei; 26huchi hi keileh leilung pian tung a kipan tamveipi athuakta ding hi; himahleh tulai hun tawp ah amah kithoihna pansan a khelhna hihmang ding in khatvei a setdet ding in amah ahong kilangta hi. 27Huan mihing a ding in khatvei sih seh ahi, huai nung in vaihawmna a-om ding hi; 28huchi mah bang in Khrist leng mi tampi khelhnate paipih ding a khatvei lat khit a om in, hotdamna mu ding a amah ngakte kiang ah khelhna pang lou in anihveina ah ahong lang nawn ding hi.
Currently Selected:
HEBRUTE 9: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
