HEBRUTE 10
10
Setdet Khrist Kithoihna
1Dan bel thil hoih hong om ding lim kia ahih ziak in, ataktak lohkhiakna nei lou in, kum teng a kithoihna ngeingei alat zelte un, abe ding a hong paite bangchi mah in abukimsak thei ngei kei hi. 2Huchi hi keileh lat tawp thamta lou ding uhia? Abemite khatvei a hihsiangthou pah hileh khelhna kitheihna anei nawn kei ding uhi. 3Himahleh huai kithoihna ah kum teng in khelhnate theih nawnna ahong om nak hi. 4Bawngtal leh kelte sisan in khelhnate lamang theivual ahi kei hi.
5Huchi a khovel a Khrist ahong lut lai in;
“Kithoihna leh thillat na deih kei a,
kei a ding in pumpi na hon bawlsak zaw hi.”
6Halmang a pumpiaknate leh
khelhna ding a kithoihnate ah
kipahna himhim na nei kei hi.
7Huaitak in ke'n, “Pathian aw,
Ngai in, laibuzial a ka tungthu gelh ahih bang in na deihlam hih ding in ka hong pai,” ka chi hi.
8Atung ah, “Kithoihnate, thillatte, halmang pumpiaknate, khelhna ding a kithoihnate dan bang a lat ahih ziak in na deih kei a, amaute ah kipahna na nei sam kei,” achi hi. 9Huaitak in ama'n, “Ngai in, Pathian aw, na deihlam hih ding in ka hong pai,” achita hi. Anihna atunding theihna ding in amasapen alamangta hi. 10Huai deihlam in Jesu Khrist pumpi khatvei thu a setdet ding a alat tak ziak in, hihsiangthou in i omta hi.
11Huan siampu tengteng in kawl a nisuak sim a nna sem in, khelhnate bangchik mah a hihmang thei lou kithoihna ngeingei lan gige in adingh uhi. 12Amah bel tangtawn a ding akhelhnate a dia kithoihna khat kia alat nung in, “Pathian taklam ah ava tu zawta hi.” 13Huai nungsiah, “Amelmate akhepek ngakna a siam ahih masiah uh angak nilouh hi.” 14Huchi in khatvei thillat in hihsiangthousate tangtawn a ding in ahih bukimta hi.
15Huan Kha Siangthou in eite ahon theihpih sam a, amasa in hiai bang in agen hi,
16“Huai nite khit chiang in akiang ua ka thukhun ding hiaite ahi, Toupa'n achi;
alungtang uah ka thupiakte ka koih dia,
alungsim uah ka gelh nalai ding chi a agen khit in,
17akhelhnate uh leh atatleknate uh ka theigige nawnta kei ding,” achi hi.
18Huchi in khelhna ngaihdam ahih nung in khelhna a ding in thillat a-om nawnta kei hi.
Hanthawnna Leh Vauhilhna
19Huchi in unaute aw, Jesu sisan ziak a mun siangthou a lutngamna nei in, 20lampi thak leh hing tawn a puanzak sung a luttheihna, ama pumpi tawn in i nei uhi. 21Pathian inkuante tung a siampu thupitak i neih ziak in, 22i lungtang a sia-le-pha theihna siang lou a pan thehsiang a om in leh i pumpi leng tui siang a sil a om in, ginna a theihchetna kim nei in lungtang diktak mah pu in amah i naih ding uhi. 23I lamet thugin ling lou in i pomkip ding uh, thuchiampa amuanhuai hi. 24Huan itna leh thil hoih hih a kitokthou ding in i kingaihtuah ding uhi. 25Khenkhatte hihdan bang a i kikhopnate uh tawpsan lou in, kihanthawn chiat ni; ni hong nai hulhul a na theih un kihanthawntuah sem un.
26Thutak theihna kim i tan nung a thil i hihkhelh teitei in zaw, khelhnate a dia kithoihna a-om tak louh ziak in, 27Vaihawmna lauhuai mulkimhuaitak, dou mite kangmang ding thangpaihna mei maban a nei in i om zawta ding hi. 28Mosi Dan khawk saloumi, “Theihpihtu mi nih hiam thum hiam nuai ah, zahngaihna bei in asi zel uhi.” 29Pathian Tapa sikden a, thukhun sisan amah hihsianthouna pen thil namai a bawl a, hehpihna Kha hihvuimi, huai mi sang a bangchi phet a gawtna thupizaw thuak tak in na sep uhiam? 30“Phulakna himhim keimah lak ding ahi, keima'n ka thuk ding chih leh Toupa'n amite vai ahawmsak ding,” chi nawnpa lah i thei ngal uhi. 31Pathian hing khut a puk thil mulkimhuaitak ahi.
Hangsan Zel Ding A Thuhilhna
32Himahleh tuma lam a hihvak a na om nung ua thuakna buaina thupitak na thuak lai nite uh thei nawn un; 33kong khat ah zaw muhsit leh haksatna thuak in etnop a bawl in na om ua, kong khat ah lah huchibang a bawl a omte thuakpihte na hong hi uhi. 34Kolbunte na lainat ua, gou hoihzaw leh a-omden ding noumau in na neih uh kithei in na van hon laksakte uh leng kipaktak in na na thuakzou behlap uhi. 35Huchi in kipahman piak thupitak ngahna ding na ginna uh paimang kei un. 36Pathian deihlam na hih nung un thilchiam na muhtheihna ding un kuhkalna na kiphamoh uhi.
37Sawt lou nung chiang a hong pai dingpa, hong pai ding ahi,
sawt ahal nawn kei ding hi.
38“Tu in ka midiktat tuh
ginna in ahing ding;
anungtolhleh bel ka kha in amah ah kipahna anei kei ding,”
chih ahi ngal a.
39Himahleh eite zaw mangthang ding a nungtolh pawl a pang i hi kei ua; hinna humbit ding a ginna nei pawl a pang i hi zaw uhi.
Currently Selected:
HEBRUTE 10: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
