HEBRUTE 8
8
I Siampu Lian Jesu
1Huchi in i thugente lak a poimohpen hiai ahi; vanmun a Thupipen laltutphah taklam a va tu siampu lianpen neite i hi uhi. 2Amah mun siangthou leh biakbuk taktak, mihing lam hilou, Toupa lam zaw a nasempa i nei uhi.
3Siampu lian peuhmahte thilpiak leh kithoihnate lan ding a seh ahi ua; huchi in hiai siampu lianpen in banghiam bek lat ding neih akiphamoh hi. 4Amah leitung a om lai hileh zaw, dan bang zel a thilpiakte lan ding om khinta ahih ziak un, siampu hilou ding ahi. 5Amaute'n van lam thilte etsakna leh aliim in nna asem uhi. Mosi biakbuk lam dia akisak lai in Pathian hilh a om in, “Tang tung a etton ding ka hon etsak bang a biakbuk lam ding in pilvang in,” achi hi. 6Tu in bel thuchiam hoihzaw tung a kinga thukhun hoihzaw a dia nasem palai ahih bang in, nasepna hoihzaw ana tangta hi. 7Thukhun masa dembei na hileh, anihna hong om kul lou ding ahi.
Thukhun Hoihzaw
8Amaute dem in hiai thute agen hi, “Ngai in, nite ahong tung dek, Toupa'n achi, huai ni chiang in Israel inkuante leh Judah inkuante kiang ah thukhun thak ka bawl ding,”
9“Api-le-pute uh
Aigupta gam a kipan pikhe ding a akhut ka let ni a
akiang ua ka khun bang hilou in;
ka thukhun ah a-om gige kei uhi,
huchi in amau ka limsakta kei,”
Toupa'n achi hi.
10“Huai ni zoh chiang in Israel
inkuante kiang a thu ka khun ding hiaite ahi,
Toupa'n achi;
alungsim uah ka thupiakte ka koih dia,
alungtang uah ka gelh nalai dia,
huan amau a ding in Pathian ka hi dia, kei a ding in amaute ka mite ahi ding uhi.
11Huan michih in Toupa thei in,
chi in ama inveng leh ama unau athuhilhta kei ding uhi;
aneupen a kipan alianpen tan in avek un ahon thei chiat ding uhi.
12Atatleknate uah ka zahngai dia,
akhelhnate uh leng ka theigige
nawnta kei ding,” chi in.
13Thukhun thak chi a agen ziak in amasa zat nawn louh ding in aluisakta hi. Huchi in aluita a, zat tak louh mang pah thei ahita hi.
Currently Selected:
HEBRUTE 8: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
