HEBRUTE 7
7
Melkizedek Siampu
1Abraham in kumpipate athah zoh a hong kiklam na dawn a vualzawlpa, hiai “Melkizedek, Salem kumpipa, Tungnungpen Siampu,” ahi a, 2Abraham in, “Bangkim ah sawm-a-khat,” apia hi. Amin khiakna genchian in amasapen in, “Diktatna Kumpipa,” azom nawn in, “Salem Kumpipa,” ahi nawn a, huai tuh “Lemna Kumpipa,” chihna ahi. 3Amah pa nei lou, nu nei lou, khangthu nei lou, om pat ni nei lou hin tawp ni leng nei sam lou in, Pathian Tapa bang a siam tangtawn a siampu hi gige ahi zaw hi.
4Huchi in suangtu, Abraham in agallak hoih peuhmah lak a sawm-a-khat apiakna pa, huai mipa thupidan ngaihtuah un. 5Levi suante lak a siampu nna tang peuhmah in dan bang in mite lak ah sawm-a-khat lak ding thu a-unaute uh lak ah amu uhi, huaite Abraham khal a pawt hi sam mah le uh leng. 6Himahleh alak ua asuante suikhawmsak sam louhpa'n Abraham lak ah sawm-a-khat ala a, thuchiamte kempa avualzawlta hi. 7Himahleh sel vual louh in aneuzaw tuh alianzaw vualzawlsak in a-om hi. 8Huan hiai ah mihing si zelte'n sawm-a-khat amu ua, huai ah bel, ahing gige pen chi a athu atheisak in amu zaw hi. 9Levi, sawm-a-khat la zelpa nangawn in Abraham khut ah sawm-a-khat apeta, chih theih ahi; 10Melkizedek in ana dawn lai in apa khal ah a-om lai hi.
Aaron Siampu Hihna Set Theih louh
11Huchi in Levite'n siampu hihna ziak a bukimna muhtheihna hileh huai nuai ah mite'n dan thu ana mu ngal ua, Aaron omdan bang hilou a Melkizedek omdan bang a siampu dang hong om, bang kiphamoh ding ahia? 12Siampu hihna ahong kilamdan ziak in dan leng hihlamdan sam ahong kiphamoh hi. 13Hiai a thugenpa nam tuam ahi ngal a, huai namte lak a akuamah maitam ah agamtang ngei kei uhi. 14I Toupa, Judah nam lak a hong suak ahi chih akichian hi; huai nam thu ah Mosi in siampute lam thu bangmah agen kei hi.
Melkizedek Bang Siampu
15Melkizedek bang a tangtawn siampu dang hong suahna in nakpitak in i thugen achiangsak nawn sem hi; 16amah khangthu dan leh dan thupiak ziak a siampu hilou in, hin tawp nei lou leh thilhihtheihna bang zaw in siampu ahong hi.
17“Nang zaw, Melkizedek omdan bang a tangtawn siampu na hi,”
chih theihsak ahi.
18Ahat louh leh aphattuamlouhna ziak in thupiak om masa paihkhiak ahi. 19Dan in bangmah ahih bukim louh ziak in Pathian in lametna hoihzaw hon lalut in huai pansan in amah i naih theita uhi.
20Huan kichiamna tel lou a amah siampu a bawl ahi kei hi; 21siampu dangte ahihleh kichiam lou a siampu a bawl ahi ua;
Jesu bel, nang zaw tangtawn siampu na hi chi in Toupa
akichiam hi, ka khelkik kei ding chi a akiang a
genpa khut ah akichiam hi.
22Huchitak a thupi in Jesu thukhun hoihzaw hihkippa ahong hita hi. 23Huan siampu tampi ana om tak ziak bel amaute asi zel ua, kuamah omden thei lou ahih ziak uh ahi. 24Hiai mi bel tangtawn a omden ahih ziak in, asiampu hihna khen theih vual louh aneizaw hi. 25Huchi in amah tawn a Pathian kiang a hong paite atawp dong in ahondam thei hi, amaute thumsak a tangtawn a ahin gige ziak in ahi.
26Huchibang siampu lianpen, misiangthou, poikhoih lou, nin baang lou, khialte lak a om tuam, vante sang a tungnungzaw a siam eite a ahong hita hi. 27Ama'n siampu lianpen dangte lat bang in, niteng in ama khelhna a ding kithoihna lan masa phot in, huai nung a mite khelhna kithoihna alat akiphamoh kei hi; amah akilat laitak in setdet ding in khatvei ana lan khinta hi. 28Dan in mihing hatlouhna neite, siampu lianpen ding in asep a; himahleh tua kichiam thu, dan nung a hong om in, Tapa mahmah tangtawn siampu ding a hihkim khitsa asep zawta hi.
Currently Selected:
HEBRUTE 7: PAITBSI
Highlight
Copy
Compare
Share
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
